Истражување: Повеќе од две третини од германските болници работат со загуба

Германските болници се соочуваат со растечка финансиска криза, според  истражување спроведено во оваа индустрија, јави ДПА.

Повеќе од половина од 650 директори на болници кои беа анкетирани, сметаат дека ликвидноста на нивните институции е „ризична“ или дури „многу ризична“ во второто тримесечје од 2024 година, покажува истражувањето на консултантската фирма Роланд Бергер.

Во просек, 28 отсто од болниците би можеле да се соочат со несолвентност до крајот на годината, според самоевалуацијата.

Петер Магунија, експерт за болници и партнер во консултантската фирма, изјави дека и малите и бројни големи болници - вклучувајќи ги и болници за максимална нега и универзитетските клиники - се под значителен притисок. - Јавните болници особено се под дополнителен притисок, додаде тој.

Минатата година, 70 отсто од германските болници пријавија загуби. - Ние веруваме дека во многу блиска иднина ќе дојде до дополнителни затворања, имајќи ја предвид економската и ситуацијата со ликвидноста, рече Магунија.

Истражувањето е во согласност со песимистичката проценка на Германската асоцијација на болници. На почетокот на оваа година, асоцијацијата спомена невидена економска криза.

Според Асоцијацијата на болници, 40 болници низ целата земја прогласија несолвентност во 2023 година, а оваа година би можела да постави нов негативен рекорд.

Германската влада вети дека ќе ги стави финансиите на болниците на цврста основа. Реформата треба да стапи во сила на почетокот на 2025 година. Меѓутоа, ова не ја смири неизвесноста во болниците, изјави Магунија, пренесува ДПА.

Мицкоски: Владата останува партнер на бизнисот

 Владата останува партнер на бизнисот, компаниите да аплицираат за обезбедената поддршка.

Не сакаме да играме во шеста лига, сакаме во прва, му порачаа бизнисмените денеска на премиерот Христијан Мицкоски. Тие побараа и Владата да го комплетира тимот со искусни економисти.

-Со Владата сакаме да ја направиме најголемата инвестиција, а потенцијал имаме, истакна сопственикот на ИГМ - Кавадарци, Илија Гечев.

Премиерот Мицкоски кој ги ислуша барањата и сугестиите на компаниите, рече дека транспарентноста и отчетноста ќе и бидат приоритет на Владата. Наскоро, напомена, преку интернет страница граѓаните ќе можат да гледаат како и за што се трошат парите и на национално и на локално ниво.

-Имаме намера да бидеме ваш партнер и да помагаме. Сакам да ве уверам во тоа. Чуда се невозможни, но тоа што може, ќе го направиме во рамки на Уставот и законите. Наш интерес е домашната економија да се развива, потенцира Мицкоски и ги повика компаниите да аплицираат за 250-те милиони евра, обезбедени од Унгарија.

Мицкоски денеска од Комората, која одбележува 102 години постоење, доби награда за соработка и посветеност.

На настанот, покрај бизнисмени - членови на Комората, се и министрите за финансии, за енергетика, за транспорт и врски и за јавна администрација.

Стопанската комора му додели награда на премиерот Мицкоски

Стопанската комора му додели награда на премиерот Христијан Мицкоски за градење партнерство и заедничко дејствување за просперитетна Македонија.

На денешниот настан по повод 102 години од постоењето, Комората им врачи награди и на бизнисмени во различни категории.

Како што рече претседателот на Комората, Бранко Азески, Мицкоски го поддржувал бизнисот и додека бил во опозиција.

-За мене ова е голема чест, но и одговорност. Изминативе први 30 дена оставаме срце на терен за да направиме нешто. Настапуваме патриотски, тоа што е интерес за граѓаните е и наш интерес, работиме посветено, не се штедиме, истакна Мицкоски во обраќањето пред присутните, изразувајќи благодарност за наградата.

Повторно активиран еден крак од пожарот на Јасен

Еден крак од пожарот на Јасен е повторно активиран, а во гаснење на пожарот се вклучени и специјалци на МВР и припадници на Армијата, информираат од Центарот за управување со кризи.

- Синоќа и утрово, а и до сега, во предел на пожарите кај селото Тажево и ЈП „Јасен“ - заштитеното повеќенаменско подрачје, имаше малга помешана со чад, од којашто покрај тоа што се немало прегледност, не било безбедно да се дејствува по земја. По дигањето на маглата и појава на ветер, се створија услови за распоредување на триесетте припадници на специјалните сили на МВР, но повторно се појави огнот на дел од кракот којшто беше изгаснат во „Јасен“, информираат од ЦУК.

Воздухопловите утрово биле префрлени на страната кон селото Тажево и Брезница, Општина Македонски Брод.

Според планот на Главниот штаб при ЦУК, специјалците е предвидено да се во линија за дејство кон сртот на Тажево, кон репетиторот и кога ќе стасаат и заштитат планираната линија е потребно да стапат во контакт и комуникација со лицето за координација за дејство по земја.

- Додека, специјалците од МВР го изведуваа маневарот за распоредување според планот, припадниците на Армијата се движеа кон зборното место кај репетиторите во Тажево и откако стасале за кратко се распоредени и се вклучени во гаснењето заедно со вработените на „Јасен“, според специфичноста на теренот и условите за гаснење на пожарот. Од ЈП „Јасен“ известија дека има еден крак од пожарот, што во моментот е повторно активиран, при што предложија армиските припадници да се поделат во два дела. Притоа, едниот армиски дел да помогне во активностите на справување со кракот кон Тажево и Брезница, а другите да се вратат назад кон „Јасен“ и да помогнат да се изгасне и тој крак, соопштуваат од ЦУК.

Дејствувањето врз пожарот е во координација со Главниот штаб при ЦУК, согласно глобалните планирани активности утрово и согласно моментните ситуации после расчистувањето на маглата во реонот за дејство по пожарот кај село Тажево и повторното активирање на дел од изгасениот пожар во „Јасен“.

Дачиќ: Очекувам екстрадиција на Рамадани, но тоа е внатрешно прашање на Македонија

Српскиот министер за внатрешни работи Ивица Дачиќ, очекува македонските власти да го екстрадираат поранешниот припадник на ОВК Блерим Рамадани, но истакнувајќи притоа дека тоа е внатрешно прашање на Македонија.

-По многу луѓе кои учествуваа во тие злосторства за време на војните имаше распишано потерници, тие се и уапсени врз основа на тие потерници. Ние очекуваме дека ќе биде донесена одлука за екстрадиција, но тоа е внатрешно прашање наМакедонија, одговори Дачиќ на прашањето дали добил одговор од македонската Влада дали ќе го екстрадираат поранешниот припадник на ОВК Рамадани.

МВР на 18-ти овој месец на граничниот премин Јажинце, на влез во државата го лиши од слобода Б.Р.(47) од Косово, затоа што при пасошка контрола и извршени проверки било констатирано дека во службената евиденција е со мерка „апси“, по барање на Интерпол Србија. Од косовското МНР потоа информираа станува збор за Блерим Рамадани, поранешен припадник на Ослободителната војска на Косово (ОВК) во оперативната зона Неродиме. Оттаму од македонските власти побараа негово ослободување.

Ден по приведувањето, на 18 јули, Основниот кривичен суд Скопје, на барање на Обвинителството за гонење организиран криминал и корупција на Рамадани му определи екстрадициски притвор. Неколку дена подоцна, ветерани и членовите на семејството на поранешниот припадник на ОВК Рамадани, протестираа пред Основниот кривичен суд во Скопје и бараа негово ослободување.

На друго новинарско прашање дека косовските власти барале екстрадиција на Милан Радојчиќ, за којшто косовскиот премиер Албин Курти кажал дека Радојчиќ се подготвувал за нови нереди и дали Србија е подготвена да го екстрадира, Дачиќ одговори дека секој облик на комуникација се одвива преку ЕУЛЕКС.

-Не знам вие дали разбирате дека Србија не го признава Косово и тоа е апсолутно небулозно. Ние се што работиме, работиме со ЕУЛЕКС, и на таков начин баравме и добивавме информации врзани за сите тие процеси. Така што, никаква екстрадиција внатре во Србија не е возможна, а Србија е држава која во својот состав го има и Косово, така велат и Обединетите нации. Полициската соработка се одвива исклучиво преку ЕУЛЕКС, одговори Дачиќ.

притисни ентер