Здравје

Истражување: Околу 13,4 милиони бебиња во 2020 година се родени предвреме

 Околу 13,4 милиони бебиња во 2020 година во светот се родени предвреме.

Студијата за предвремено породување ја објавија авторите на Светската здравствена организација (СЗО), Детскиот фонд на Обединетите нации (УНИЦЕФ) и Лондонската школа за хигиена и тропска медицина.

„Проценетите 13,4 милиони бебиња се родени предвреме (пред 37 недели од бременоста) во 2020 година, што претставува приближно едно од десет од сите живородени деца“, се вели во извештајот.

Наведувајќи дека предвременото раѓање е водечка причина за смрт кај децата во првите години од животот, во извештајот се наведува дека постои итна потреба да се зајакне грижата за предвремено родените бебиња за да се зголеми стапката на преживување.

Утврдено е дека предвреме родените имаат голема веројатност да заболат од сериозни болести, попречености, доцнење во развојот, како и хронични болести како дијабетес и срцева слабост во зрелата возраст.

„Нема значително намалување на стапката на предвремено породување во ниту еден регион во светот во последната деценија. Годишното глобално намалување на предвремено породување помеѓу 2010 и 2020 година беше само 0,14 отсто“, се наведува во извештајот.

Соопштено е дека околу 65 отсто од предвремените раѓања во 2020 година биле регистрирани во субсахарска Африка и Јужна Азија.

Во извештајот се објаснува дека предвременото породување не е проблем кој се гледа само во земјите со низок и среден приход, туку дека оваа ситуација ги погодува семејствата насекаде во светот.

Додека стапката на предвремено раѓање беше 11,6 отсто во Грција и десет отсто во САД, оваа статистика е забележана и во некои земји со високи приходи.

Лошото здравје на мајките и неухранетоста, исто така, придонесуваат за високата стапка на предвремено породување.

Аншу Банерџи, директор на Институтот за мајчинско здравје при СЗО, рече дека бебињата родени предвреме се особено ранливи на здравствени компликации опасни по живот.

Посочувајќи дека бројките за предвремено породување покажуваат дека има потреба од итно инвестирање во постоечките услуги за поддршка на предвремено родените бебиња и нивните семејства, Банерџи посочи дека постои потреба да се постави фокусот на пристап до квалитетни здравствени услуги, особено пред и за време на бременоста.

Фудбал

Ибрахимовиќ: Тешко ми беше да се откажам од фудбалот поради моето его

Поранешниот напаѓач Златан Ибрахимовиќ зборуваше за подкастот на „АБТалкс“ каде што разговараше за неговото пензионирање од фудбалот, неговото враќање во Милан како главен советник на сопственикот на клубот и за смртта на неговиот агент Мино Раиола.

-Добро сум, така ме третира животот. Секако, се повлеков од фудбалот пред повеќе од осум месеци, така што мојот живот сега е поинаков. Прифатив да се откажам од фудбалот, што беше тешка работа поради моето его и начинот на кој се доживував себеси. Мислам дека сум најдобар и сè уште сум таков. Можев да продолжам, но решив да престанам. Зошто? Сакам само добар живот за моето семејство. Сакав да правам работи со моите синови, а пред тоа не беше можно бидејќи имав проблеми со едното колено. Така го прифатив тоа и дојде момент кога си реков: „Во ред е, откажи се и отвори ново поглавје од твојот живот, вели популарниот Ибра.

Потоа, неколку месеци подоцна, го запознава Гери Кардинале, кој го надгледува фондот „РедБрд“ што го купи Милан.

-Ми даде понуда што не можев да ја одбијам. Така почнав да работам со Милан, откако бев во клубот три-четири месеци. Добро се однесуваат со мене таму, морам да признаам. Кога почина мојот агент Мино Раиола, тоа беше голем удар за мене. Многу плачев. Сè уште не е исчезнато чувството, бидејќи спомените постојано ми се враќаат. Скршен сум затоа што многу ми недостига. Секој што го познава знае колку бевме блиски. Да можам би му напишал: „Ми недостигаш“, сподели Ибрахимовиќ. /МИА

Шоу биз

Почесна Златна палма за Мерил Стрип на Канскиот филмски фестивал

 Познатата американска актерка Мерил Стрип (74) ќе добие почесна Златна палма за време на церемонијата на отворањето на овогодишниот Меѓународен филмски фестивал во Кан на 14 мај, соопштија денеска организаторите.

Холивудската актерка со рекордни 21 номинација за престижниот Оскар само еднаш била на Канскиот фестивал. Тоа беше пред 35 години кога филмот „Плач во темнината“ во кој играше, доби една од наградите на Канскиот фестивал.

Мерил Стрип освои три Оскари за улогите во филмовите „Крамер против Крамер“ (1980), „Изборот на Софија“ (1983) и „Челичната дама“ во 2012 година.

Актерката се прослави во филмовите „Лов на елени“, „Жената на францускиот поручник“, „Мојата Африка“, „Мостовите на округот Медисон“, „Сомнеж“ и „Заљубување“.

Почесна Златна палма годинава ќе добијат креаторот на серијата „Војна на ѕвездите“, Џорџ Лукас и колективно Студио Гибли на јапонскиот режисер за анимација Хајао Мијазаки.

Канскиот фестивал ќе се одржи од 14 до 25 мај, а за Златната палма се натпреваруваат повеќе од 20 филмови, меѓу кои и новиот филм на Френсис Форд Копола „Мегалополис“. /МИА

Фудбал

ФА го суспендираше Тонали на два месеци

Сандро Тонали беше суспендиран од фудбалот на два месеци. Нему му пресуди Независната регулаторна комисија откако призна дека учествувал во забрането обложување.

Покрај тоа, тој е казнет со 20.000 фунти и предупреден за понатамошно однесување.

Суспензијата е таква што Тонали нема да може да се врати на терените до крајот на сезоната, до кога ќе истече десетмесечната казна што му ја изрече Италијанската фудбалска федерација на 27 октомври 2023 година.

Доколку не го повтори истиот прекршок до крајот на сезоната, нема да мора да ја одлежи оваа двомесечна суспензија.

Фудбалскиот сојуз и Регулаторната комисија оценија дека Тонали соработувал и признал се за што е обвинет „на исклучителен и досега неевидентиран начин“.

Тонали целосно ги признал сите свои прекршоци, а тоа го направил во ситуација кога доказите практично не постоеле.

Тој продолжува да оди на терапија и едукативни програми на кои е должен да присуствува со целосна поддршка од клубот и продолжува да тренира со екипата./МИА

притисни ентер