На пример, оваа одлука ја донесоа вчера Шпанија, Холандија и Португалија.

Многумина, дури и оние постари од 60 години кај кои не се пријавени тромбови (тромбоза) или тромбоцитопенија, се плашат од овие несакани ефекти.

Разбирлива е недовербата кога ќе се земе предвид фактот дека луѓето сметаат дека ако почекаат малку, би можеле даја добијат втората вакцина која сè уште не е поврзана со такви опасни несакани ефекти.

Но, кои точно се овие ретки случаи на згрутчување на крвта? Тромбозата е болест на васкуларниот систем при која се појавуваат тромбови, што потоа патуваат по крвта низ телото. Ова го отежнува лоцирањето и резултатот може да биде фатален ако достигне до мозокот или срцето. Тромбоцитопенијата е недостаток на тромбоцити кои се вклучени во згрутчувањето.

По вакцинирањето со AstraZeneca, формирањето на тромб и / или тромбоцитопенија се пријавени во ретки случаи.

За оние што ќе се вакцинираат со AstraZenecа, докторите излегоа со препораки како да се препознае формирањето на згрутчување на крвта во телото.

Секако, првенствено треба да се консултира секој со матичен лекар кој може подетално да ги објасни симптомите на тромбоза, да ги поврзе можните несакани ефекти од вакцинацијата со другите болести (доколку постојат) и да ги следи пациентите во текот на првите две недели по приемот на дозата .

Згрутчување на крвта се формира кога крвта се згуснува и формира полуцврста маса. Ова може да биде корисно при запирање на крварењето во случај на повреда, но овие маси можат да создадат проблеми доколку го запрат протокот на крвта во витално подрачје.

Згрутчувањето на крвта може да предизвика блокада на васкуларниот систем на нозете, абдоминалната празнина, мозокот и белите дробови. Повеќето од згрутчувањата на крвта поврзано со вакцината АстраЗенека се појавиле во крвните садови во мозокот. Овие тромбови, познати како тромбоза на церебрален венски синус (CVST), може да доведат до мозочен удар, напади и смрт, пишува Бизнис Инсајдер.

Досега, повеќето пријавени тромбови се појавени кај жени на возраст под 60 години во рок од две недели по вакцинирањето. Европската агенција за лекови (ЕМА) изјави дека оние кои примиле AstraZeneca и кои ги имаат следниве симптоми треба веднаш да контактираат со својот лекар.

- тешко дишење

- болка во градите

- оток (или повеќе) на нозете

- постојана болка во стомакот

- невролошки симптоми, вклучувајќи силни и постојани главоболки или заматен вид

Британската национална здравствена служба (NHS) вели дека треба веднаш да се обратите на лекар ако се сомневате во згрутчување на крвта ако имате мачна или силна болка, оток, црвенило и топлина на ногата или раката и остра болка во градите (што може да биде полошо при вдишување ), силна кашлица или ако кашлате крв.

Една од водечките страници за здравствени совети, WebMD, пишува дека ногата или раката можат да станат синкави или црвеникави во случај на тромб, додека во случај на тромб во белите дробови, кожата на пациентот може да биде бледа, синкава и леплива.

Додаваат дека ненадејната силна болка во градите може да значи дека се формирал тромб во белите дробови или дека тромбот во артеријата предизвикал срцев удар. Во случај на срцев удар, болката треба да се почувствува во раката, особено на левата страна.

Згрутчувањето често предизвикува болка таму каде што се наоѓа - на пример во потколеницата, стомакот или под грлото, а симптомите зависат и од нејзината локација.

Тромб во белите дробови може да предизвика забрзано чукање на срцето, отежнато дишење, болка во градите, кашлање крв. Згрутчување во срцето има слични симптоми со оние во белите дробови, но може да се чувствувате слабо и да имате гадење.

Згрутчувањето во мозокот може да предизвика главоболки, конфузија, напади, говорни проблеми и слабост, понекогаш само на едната страна од телото.

Блокираните крвни садови во желудникот или хранопроводот може да пукнат и да прокрварат. Може да повраќате крв или да ја имате во столицата, а столицата може да изгледа црна и да има многу непријатен мирис.

Бидејќи згрутчувањето на крвта обично се третира со антикоагуланси, може да се избегнат компликации по вакцинацијата со AstraZenecа доколку навремено се препознае формирањето на тромбот.

Секако, по вакцинирањето, некои лесни несакани ефекти се чести во првите денови, како што се болка на местото на инјектирање, треска или слично. Меѓутоа, ако лицата имаат сериозни или постојани симптоми околу четири до 20 дена по вакцинирањето, треба да побараат лекарска помош.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.