Исповед на Британка, која на 15 години станала џихадистка: Бев глупава (ВИДЕО)

Британката Шамима Бегум која се приклучила на Исламската држава во Сирија на средношколска возраст, изјавила дека сака да се врати во Обединетото Кралство и да се соочи со обвиненија за тероризам за да ја докаже својата невиност.

Таа, исто така, вели дека може да и помогне на Велика Британија во борбата против тероризмот.

Шамима Бегум, по потекло од Бангладеш, го напуштила Лондон во 2015 година кога имала 15 години, па отпатувала во Сирија преку Турција со двајца училишни пријатели.

Во Сирија се омажила за борец на Исламската држава и живеела во Рака, главниот град на самопрогласениот џихадистички калифат. Таа останала таму четири години, додека не била пронајдена во логор. Откако ја напуштила Британија, таа родила три деца, но во меѓувреме сите три починале.

Британското министерство за внатрешни работи и го одзело државјанството во јули минатата година, а судот и забранил враќање во земјата.

За време на нејзиното гостување на телевизија, Бегум испратила порака и до Борис Џонсон: „Можам да ви помогнам во борбата против тероризмот, бидејќи очигледно не знаете што правите“.

„Сакам да кажам дека очигледно не се справувате со борбата против екстремизмот и тероризмот во вашата земја. Сакам да ви помогнам да го искористите искуството што го стекнав со екстремистите, да ви откријам што велат, како ги убедуваат луѓето да прават што прават и зошто луѓето доаѓаат на места како Сирија “, рекла таа во емисијата „Добро утро Британија“.

Бегум додаде дека иако верува дека нејзиното единствено злосторство е тоа што била „доволно глупава“ за да се приклучи на ИСИЛ, сепак заслужува фер судење.

„Искрено, единственото злосторство што мислам дека го направам беше тоа што бев доволно глупава за да се приклучам на ИСИЛ, па дури и тоа може да се побие бидејќи имав 15 години кога дојдов и не можете, знаете, да судите некого кој има 15 години за грешка за која многу брзо се покаја “, рекла таа.

"Ако навистина мислите дека го направив тоа, зошто не ме вратите во Обединетото Кралство и не ме одведете на суд и не ја слушате мојата страна од приказната? Ако искрено верувате дека сум виновна, зарем не мислите дека треба да бидам во затвор за тоа? ".

„Факт е дека мислите дека јас попрво треба да скапам тука отколку да се соочам со судење ... Демократијата во која живеете вели дека секој заслужува фер судење“, рекла Бегум.

Таа исто така рече дека британската влада нема докази против неа.

„Нема докази бидејќи ништо не се случило“, рекла таа.

Таа додаде дека повеќе би сакала да умре отколку да се врати во Исламската држава. „Моето единствено злосторство е што бев доволно глупава за да се приклучам на ИСИЛ“, рекла таа.

Како одговор на интервјуто со Шамима Бегум, портпаролот на министерството за внатрешни работи рече: "Врвен приоритет на владата останува одржувањето на нашата национална безбедност и заштитата на јавноста. Ние рутински не коментираме поединечни случаи".

Златка од „Лајка" ги порасна фрлените кутриња од Расадник, сега се подготвени за вдомување

Улична кучка, која по пријава беше заловена од тимот на ЈП „Лајка”, откако ги загуби нејзините тукушто родени кутриња, згрижи мали непрогледани кутриња кои биле фрлени на нива во скопската населба Кисела Вода, Расадник. 

Од „Лајка” информираат дека осумте малите кутриња, кон крајот на јули годинава биле фрлени на нива од страна на несовесен граѓанин, на температури од 40 степени Целзиусови, а тие веќе го земале последниот здив. Три од нив не успеале да преживеат.

Првично, кутрињата беа згрижени од страна на здружението Асоцијација на активисти за права на животни-ААПЖ. За среќа, токму во истиот период тимот на „Лајка” залови кучка во лактација која ги загубила нејзините кутриња, а беше пријавена од страна на граѓани.

– Ние се понудивме да ги земеме малите кутриња, за да видиме дали кучката ќе ги прифати. Се случи токму она на што се надевавме. Па така, веќе месец и половина, уличната кучка Златка се грижи за малечките кучиња, ги храни и ги чува како да се нејзини, нешто што докажува дека мајчинскиот инстинкт и потребата да се спаси нечиј живот работи кај животните, еднакво како и кај луѓето. Сиот овој период тимот на „Лајка” живее со ова прекрасно семејство кое ни ја направи нашата работа уште поубава. Уличното куче Златка успеа да ги одгледа малите Вилма, Мила, Оги, Цеца и Белка, кои се веќе подготвени да бидат вдомени, со оглед на тоа што се хранат самостојно, прочистени се од паразити и ја имаат примено првата вакцина. Овие наши пет хероини, заедно со најголемиот херој, нивната сурогат мајка, се во потрага по дом, а сите заинтересирани можат да поднесат апликација за вдомување на следната адреса [email protected], посочуваат од ЈП „Лајка”.

Од „Лајка” се надеваат дека во иднина веќе нема да се соочуваат со настани од ваков тип и повикуваат на одговорно сопствеништво, односно стерилизација/кастрација на милениците, доколку сопствениците не можат да се грижат за нивниот пород. – Да се фрлаат непрогледани мали кутриња по улиците е крајно нехуман и неодговорен чин, кој оди на штета на целото општество. За среќа, а за разлика од многу други, петте наши госпоѓици преживеаја една голгота и сега се во потрага по нов дом, каде што ќе им се пружи љубов и внимание, велат од ЈП „Лајка”. /МИА

Државниот секретар Николиќ учествуваше на панел – дискусија во Охрид

Ниту една земја самостојно не може да се справи со природните катастрофи од големи размери како оние што ги видовме изминатиот период, порача Николиќ.

„И сојузниците и НАТО – Алијансата климатските промени ги карактеризира како клучно безбедносно прашање од највисок приоритет. Неодамнешните пожари со кои се соочувавме и ние и Југоисточна Европа ги ставија на тест нашите капацитети, опременоста, пополнетоста со кадар, нивната обученост, но и координираноста на целиот систем за заштита и спасување. Заклучокот беше и е јасен – системот е поставен, но простор за подобрување има“, рече државниот секретар Драган Николиќ на денешната панел – дискусија посветена на цивилно-воената поддршка на цивилни катастрофи, која се реализираше на почетокот на вежбата на НАТО, „ Македонија 2021“.

Николиќ порача дека Армијата во изминатите години секогаш се вклучувала во кризни состојби. Ефектите од учеството на Армијата во справување со кризни состојби беа особено забележливи во поплавата која го зафати главниот град во 2016 година, како и пред речиси два месеци кога целосно беше вклучена како поддршка на цивилните институции во справувањето со огнените стихии на територијата на целата земја. Во периодот од почетокот на август до почетокот на септември, ангажирани беа вкупно околу 2.000 припадници, како и армиски воздухоплови кои во овој период на гасење направија над 80 часови лет и исфрлија над 500 тони вода.

„Се боревме со сите расположливи средства и во целост се ставивме на располагање на системот за заштита и спасување зашто Армијата постои за граѓаните и нивната сигурност и безбедност, и во случаи кога се бориме со природните непогоди“, рече на панелот државниот секретар.

Членството во Алијансата беше од голема помош за справувањето со овие катастрофи, особено кога станува збор за брзината и отвореноста на сојузниците да помогнат, рече Николиќ, и додаде дека системот мора да работи за да биде уште поподготвен за справување со катастрофи од овој тип.

Николиќ посочи на неколку клучни подобрувања кои ќе го зајакнат системот за одговор на катастрофи – подобрувањето на координацијата, градењето на дуални капацитети во Армијата и подобрувањето на условите за работа во институциите за справување со природни катастрофи.

„Потребно е да имаме целосна пополнетост на противпожарните служби, на системот за заштита и спасување, на институциите кои се први во борбата со природните непогоди. И, тука правиме чекори напред – пред само неколку дена со измените на законот за заштита и спасување ги зголемивме платите на пиротехничарите и на инспекторите во Дирекцијата за заштита и спасување. Нам ни е потребен систем во кој работат млади, мотивирани, подготвени и обучени лица, и затоа ги подобруваме условите за работа во институциите кои се дел од овој систем“, рече државниот секретар.

Ниту една земја самостојно не може да се справи со природните катастрофи од големи размери како оние што ги видовме изминатиот период, порача Николиќ, и додаде дека Северна Македонија е секогаш првата земја која нуди помош, а истиот пристап го имаа и нашите соседи и нашите сојузници кои безрезервно помогнаа во справувањето со пожарите во нашата земја летово.

На панел-дискусијата покрај државниот секретар Николиќ учествуваа и Марк Ди Пауло, директор градење на капацитети во одбранбените институции во НАТО и Шефик Бајрами, помошник директор на Бирото за јавна безбедност.

За сексуално вознемирување на социјалните мрежи девојките повеќе се доверуваат на семејството

Семејството е најдоверливата и најсигурната адреса каде што анкетираните девојки ги пријавуваат сексуалните вознемирувања на социјалните мрежи.

Тоа го покажува истражувањето „Онлајн вознемирување на социјалните медиуми", спроведено од Центарот за еднакви можности „Бубамара" од Тетово. Анкетата според нив имала за цел да открие колку овие возрасни девојки се жртви на сексуално вознемирување, што подразбираат под сексуално вознемирување и дали се подготвени да го пријават тоа.

–Поголем дел од нив (29.3%) претпочитуваат да му се обратат на семејството кога се вознемирувани од такви вознемирувачки пораки или содржини. На второ место е полицијата (25%). Голем број на девојки одговориле дека не знаат каде да се обратат (21.6%). Мал број одбрале (или би одбрале) да им се обратат на новинарите (0.9%) или на невладините организации (1.4%) за да пријават вознемирување. Кога станува збор за евентуално пријавување,10% од девојките ја одбрале опцијата „друго" каде што доминираат одговори од типот „на никого", се наведува во истражувањето.

Во заклучокот од истражувањето од „Бубамара" велат дека жртвите на сексуално вознемирување, воглавно се добро информирани дека овој феномен подразбира повреда на нивната слобода и мешање во нивниот живот и нивните избори. Според нив, овие дејствија имаат последици кои кај некои од жртвите се манифестираат во поголема мера.

–Последиците се главно психолошки и жртвата често е сама и претпочитува да не го сподели искуството со некој друг. Фактот што некои од сексуално малтретираните девојки на социјалните мрежи не сакаат да го споделат своето искуство ниту со својот партнер, велејќи дека голема е веројатноста да дојде до некакво недоразбирање, покажува дека момчињата и мажите се многу малку информирани за размерите на овој реален проблем. Игнорирањето подразбира одобрување и охрабрување за сторителот, насилникот и престапникот за тој да ја прошири својата мрежа на малтретирање и да го храни тоа чувство на надмоќност врз своите жртви. Повторната виктимизација на жртвата на сексуално вознемирување од околината додава уште една по нераскинлива алка во синџирот на сексуално вознемирување, како злосторство кое го олеснија и „релативизираа" социјалните мрежи поради природата на нивните платформи, неможноста за целосна контрола и начелата на слободата на изразување, велат од „Бубамара".

Центарот за истражувањето има контактирано 208 девојки на возраст од 18 до 25 години кои одговориле на анкетата по електронски пат. Од нив 150 девојки се од Тетово, 51 од Гостивар и од другите општини во регионот. 45,1 отсто се од рурални, а 54.8 отсто од урбани средини. /МИА

притисни ентер