Според Филипче политичките промени во Србија можат да имаат последици и врз позицијата на македонскиот премиер, а до опозицијата, како што рече, пристигнувале информации за можни трансфери на пари од Србија во Македонија. Мицкоски остро ги отфрли наводите од опозицијата, оценувајќи дека СДСМ се обидува политичките случувања во Србија да ги искористи за напади врз македонската Влада, правејќи аналогија со неоснованите обвинувања за унгарскиот кредит.

-Па ќе се отворат прашања за кинеските пари од Унгарија, за Алта банка, за тоа дали има навистина, како што сè повеќе имаме информации, трансфер на пари од Србија тука. Некои документи видов пред неколку дена. Ако е тоа стварно така, мене ми е вака човечки жал за тебе, да ти кажам право, не политички, ама патот сам си го избираш. Веројатно ќе одговараш на прашања и за трансферот на дрога преку граница, е тогаш на тие инстанци веќе нема да може да се дефокусира и да се даваат лажни информации. Можеби си ја промашил професијата, бил добар уредник на Информер или на Колегиум, изјави Филипче.

- Истото го зборувавте и за Орбан пред 6 месеци, истите прес конференции од А до Ш. Споредете ги и во овие 6 месеци, и тогаш велевте ќе се откриеле криминалиите на Мицко со Орбан, не знам што е се случуваше итн....Ме обвинивте дека сум бил човекот којшто трансферирал дрога, пари, што уште не се изнаслушав од тоа дека сум идиот и не знам уште што уште не слушнав од вас за себе и нема да се спуштам на тоа ниво и да одговорам, мислам дека не заслужувате. Бидејќи тоа се работи што се учат во првите 7 години од животот. Најверојатно тие ваши први години биле полни со фрустрација, па тоа сте го испуштиле. Моите 7 години беа среќни, изјави Мицкоски.

Во фокусот на опозициските пратеници беа меѓуетничките односи и изборите во Брвеница.

На критиките од пратеникот Скендер Реџепи дека повикувал на етничко гласање, премиерот Мицкоски дециден - никој од ВМРО-ДПМНЕ не повикал на етничко гласање, тоа го правите вие и коалицијата на ДУИ.

Премиере, вие пред неколку дена истакнавте од општина Брвеница дека опцијата на кандидатот од опозицијата е криминална и ова за мене беше срамно бидејќи не знам дали зборувавте како премиер, претседател на партија или како обвинител, изјави Скендер Реџепи.

- Сите до еден и Македонци и Албанци, со кои разговарав, најмногу Албанци ми рекоа овие што не избркаа од тука, ги избркаа нашите братучеди, тетки, вујковци, чичковци кои се некаде на Запад, сега доаѓаат повторно да не делат. Дваесет години еден проект нема за Брвеница, еден проект. Христијан Мицкоски како претседател на Владата, Јовица покоен како градоначалник, Александар Николоски како потпретседател и министер за транспорт ќе го гради патот за Гургурница, нагласи премиерот Мицкоски.

Во дуелот меѓу Мицкоски и Филипче се најде и темата за отворањето рудници во Македонија. Според Филипче доколку Владата ги започне постапките за отворање рудници, на неколку локации ќе се соочи со сериозен отпор од граѓаните, кој СДСМ ќе го поддржи, а доколку е потребно, како што рече ќе се формира и жив ѕид за да се спречи нивното отворањето. Мицкоски одговори- го поддржува отворањето рудник за антимон во селото Луке, Крива Паланка, посочувајќи дека ист став има и градоначалникот на општината од редовите на СДСМ.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Советот на јавните обвинители ги објави конечните резултати од гласањето, на кое Хаџи Василева освои 64 гласа, седум повеќе од Трајче Пеливанов, кој доби 57. Од останатите кандидати Јован Цветановски освои 30 гласа, Фатон Азизи 14, а Лидија Раичевиќ шест. По изборот на Хаџи Василева, пред неа остануваат сериозни предизвици почнувајќи од обезбедувањето доволно финансиски средства и зголемувањето на ефикасноста на обвинителите, вели за Канал 5 поранешната антикорупционерка Билјана Ивановска.

-Значи новата обвинителка, односно раководителка на ова обвинителство ќе се соочи со големи предизвици. Пред сè во обезбедување на финансиските средства, нели, законот сè уште не е донесен, би требало да се избори за барем да го има истото ниво што досега го имаа во претходниот закон. Да се обиде да ја зголеми ефикасноста на постојните обвинители, значи првин со ресурсите со коишто располага обвинителството да ги искористи максимум,- изјави – Билјана Ивановска – Поранешен претседател на ДКСК.

Ивановска предупредува и на податоците од анализата за влијанијата врз обвинителите. Од новата шефица ќе се очекува не само да ги продолжи постапките по предметите за организиран криминал и корупција, туку и да покаже дека обвинителството може да работи поефикасно, без селективност и без надворешни влијанија.

-Сè уште постоеше процедура на рачна распределба на предметите, таа кажа дека ќе се залага за дигитализација, го поздравувам тоа и сметам дека треба да има еден објективен начин на распределба на предметите. И што е најважно, да се справат со директните и индиректните притисоци или сугестии. Значи, 36% од јавните обвинители искусниле обиди за влијание од членови на извршна власт, а 29% од претставници на политички партии. Ова се загрижувачки бројки и мислам дека треба во своите редови да се справат со овие ризици и предизвици,- изјави – Билјана Ивановска – Поранешен претседател на ДКСК.

Новата шефица на ова обвинителство има 10 - годишно обвинителско искуство, а во октомври 2024 година беше избрана за обвинителка во ОЈО ГОКК. Меѓу позначајните предмети на кои работeше е обвинението против судијата Ѓоко Ристов во чиј семеен дом во Неготино беа пронајдени заѕидани 350 илјади евра, передмет за кој судската постапка е во тек. Хаџи Василева го застапуваше и обвинението против докторот Жан Митрев, кој беше обвинет за измама поврзана со информирањето на пациентите за хемофилтрацијата за време на пандемијата, како и корупцискиот предмет против ексдиректорот на Државниот инспекторат за земјоделие Васе Анакиев. На раководната позиција таа ќе го наследи Ислам Абази чиј мандат истекува на 8 ноември.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

За операција на очи, но и други здравствени услуги во приватна болница, еднаш плаќал Фондот, а вторпат самиот пациент, а ланец на неказнивост овозможил повеќегодишна масовна злоупотреба на народните пари од здравствената каса, но и џебот на пациентите.

Ова го потврди Министерот за здравство Сашо Клековски кој кажа дека засега истрагата на МВР и Обвинителството за организиран криминал и корупција се однесува на три лица од Фондот и две од приватната клиника, но не откри детали дали станува збор за штета врз буџетот од над 1,5 милион евра и противправно стекна материјална корист за болницата од 4 милиони евра.

-Јас бев иницијатор на истрагата бидејќи станува збор за здравствена установа која имаше повторувачки прекршоци со години – значи не е еднаш, двапати, трипати, туку постојано повторување на слични прекршоци за кои не било соодветно казнувана. Јас предложив на Комисијата за прекршоци и таа прифати да се раскине договорот со таа здравствена установа за да се прекине ланецот на неказнивост. Истовремено побарав да се покрене истрага. Според моите информации станува збор за три лица од Фондот и две од здравствената устанува во моментов,- изјави министерот за здравство Сашо Клековски.

Пред официјалната акција на претреси на десетина локации, во Скопје, Куманово и Тетово, во детектирање на криминалот и обезбедување на докази биле инволвирани поголем број на институции како што е секторот за контола при Фондот и здравствениот инспекторат, потврди Клековски.

-Станува збор за повеќе врсти на прекршоци, една од најмасовните е двојна наплата на пациентите. За иста услуга под различни превези и изговори е наплаќана од пациентите. МВР заедно со секторот за контрола на ФЗО напорно работеше да се завршат сите работи, беа вклучени и ДСЗИ и Агенцијата за контрола на лекови, но и други установи за од сите аспекти да се затвори истрагата,- - изјави министерот за здравство Сашо Клековски.

Според првичните неофицијални информации, дел од медиумите шпекулираат дека во центарот на истрагата е Ден Дончев, поранешниот директор на ФЗО во времето на владата на СДСМ, а се споменуваат и поранешни и актуелни функционери во Фондот, меѓу кои поранешен претседател на Управниот одбор, поранешен раководител на Секторот за контрола во ФЗО и директори на скопската подрачна единица.

Неофицијално се споменуваат и имиња на поранешни сопственици и управители, но и сегашни раководители на една приватна болница во Скопје.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.