Во извештајот на националниот институт за здравство на Португалија „Рикардо Хорхе“, се вели дека делта сојот, првпат откриен во Индија, е причина за инфекција во 51 процент од случаите во континентална Португалија, што покажува дека тој вид се шири „рапидно“, како што беше и во Обединетото Кралство.
Вчера биле пријавени нови 1604 случаи на инфекција со коронавирус, најголем пораст од 19 февруари кога земјата, која има над 10 милиони жители, сè уште била во карантин. Португалија досега има евидентирано 871.483 случаи на инфекција со коронавирус, а од почетокот на пандемијата во таа земја, 17.081 лице починале од ковид.
Иако повеќето нови случаи сè уште се концентрирани во густо населениот регион на Лисабон, најголемиот репродуктивен број (Р), 1,34, е во јужниот португалски регион Алгарве, познат по своите плажи и терените за голф, според извештајот на Португалскиот национален институт за здравство .
Зголемувањето на случаите се случило откако Португалија, чија економија е во голема мера зависна од туризмот, ги отвори своите граници за граѓаните на Европската унија и Велика Британија во средината на мај. Така, со почетокот на новата туристичка сезона, повеќето деловни активности се рестартирани, а плажите се преполни.
Португалија во четвртокот ги заостри правилата поради зголемувањето на бројот на случаи на инфекција; меѓу другото, рестораните во Лисабон и познатиот туристички град Албуфеира, во регионот Алгарве, особено популарни меѓу Британците, мора да работат со скратено работно време за време на викендот.
Велика Британија на почетокот на јуни ја отстрани Португалија од списокот на земји на кои не им е потребен карантин, а Германија во четвртокот ја прогласи Португалија за „ зона на делта варијанта на вирусот“. Оваа мерка подразбира строги ограничувања на патувањето до и од земјата.
Во Португалија се зголеми и бројот на хоспитализирани лица за кавид. Во моментов, 71 пациент со ковид е на интензивна нега во Лисабон, што претставува учество од 86 проценти во вкупниот број на легла наменети за третман на коронавирус. Инаку, состојбата во Португалија била најтешка во јануари годинава.
За да се справи со наглиот пораст на случаите на корона, Португалија ја забрзале вакцинацијата кај помладите. Досега, околу 30 проценти од населението во земјата се целосно вакцинирани.