Дваесет патници морале да го напуштат авионот на „Бритиш ервејс“ што летал од Фиренца до Лондон бидејќи било премногу тешко да се полета поради топлината, а експертите предупредуваат дека ваквите инциденти би можеле да станат почести поради климатските промени, пишува „Мирор“.

Инцидентот се случил на 11 август на аеродромот „Америго Веспучи“. Поради високата температура, воздухот бил поредок, што барало повеќе гориво за авионот да ја достигне потребната надморска височина. Дополнителната тежина на горивото значела дека вкупната маса ги надминала безбедносните ограничувања за полетување.

„Беше околу 35 степени и им требаше дополнително гориво“

Ситуацијата дополнително ја комплицирала кратката писта на аеродромот во Фиренца, која е околу половина од должината на онаа на лондонскиот Гетвик.

Патник кој морал да го напушти авионот опишал што се случило: „Пилотот рече дека луѓето морале да се симнат поради екстремната топлина. Беше околу 35 степени и им требаше дополнително гориво за ефикасно да работи моторот. Персоналот рече дека 36 патници ќе мора да се симнат, но на крајот околу 20 луѓе морале да си одат“.

„Бритиш ервејс“ се извини

Авиокомпанијата им се извини на патниците погодени од оваа ситуација.

„Поради уникатната природа на аеродромот со кратки писти, екстремните температури влијаат на воздушниот притисок, па затоа тежината на авионот мора да се намали. Се извинуваме за непријатностите. Нашите тимови работеа напорно за да ги донесат патниците до нивната дестинација што е можно побрзо“, рече портпаролот.

„Треба да се навикнеме на вакви сцени“

Џони Вилијамс, експерт за авијација од Универзитетот во Рединг, предупреди дека ова не е изолиран случај и дека треба да се навикнеме на вакви сцени.

„Топлите летни денови, кога помалите аеродроми мора да ја намалат тежината на авионите, ќе станат почести. Условите што се случуваа околу еднаш дневно во лето би можеле да се појават три или четири дена во неделата до 2060-тите. Летањето до Шпанија, Италија или Грција би можело да стане поскапо бидејќи авионите ќе превезуваат помалку луѓе поради климатските промени“, рече Вилијамс.

Хаос на друг лет

Овој настан следеше по уште еден инцидент на лет на „Бритиш ервејс“, кога жена беше прогласена за „најлош патник од пеколот“. Други патници изјавиле дека таа повраќала врз семејство што седело зад неа, плукнала вино врз нив и ја влечела жената за коса.

Патниците ја виделе како пие вино што го прошверцувала во рачниот багаж, а потоа нарачала уште алкохол во авионот. Сведок рекол: „Откако се напила, станала од седиштето и намерно им плукнала вино во лица. Беше одвратно и ужасно.“

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.