Со симболичното патување на релацијата Зелениково – Нова железничка станица Скопје денеска официјално беше пуштена во функција првата фаза од проектот „Градски воз“, со кој периферните населени места и општини се поврзуваат со централното подрачје на Скопје. На промоцијата присуствуваа премиерот Христијан Мицкоски, заменик претседателот на Владата и министер за транспорт, Александар Николоски, раководствата на железничките претпријатија „Транспорт“ и „Инфраструктура“, градоначалникот на Град Скопје и дел од скопските градоначалници.

Вицепремиерот Александар Николоски истакна дека ова е почеток на реализацијата на визија за поефикасен јавен превоз, поголема мобилност и подобра заштита на животната средина.

“Реализацијата на градскиот воз е доказ дека кога се има јасен план, концепт и визија, може да се реализираат проекти и е уште поголем доказ, дека нешто што пред две години се сметаше за заборавено и напуштено, а тоа е железничкиот превоз, еве после две години се враќа во превоз. Ако пред две години имавме напуштени и девастирани пруги, железнички станици кои што беа затворени и се распаѓаа, возови кои што не работеа и бројни композиции лежеа на македонските пруги, еве денеска после две години имаме јасен и активен карго превоз, а од вчера веќе имаме и градски воз”- истакна Николоски.

Тој посочи дека Владата го исполни ветувањето дека првата фаза од градскиот воз ќе започне на 1. септември и порала што повеќе граѓани и млади да го користат во секојдневието.

“Ветивме дека првата линија ќе почне на 1 септември и така се случи, се надевам дека ќе ја користат многумина, се надевам дека многу ќе помогне и на учениците и на средношколците, на сите оние кои што сакаат навреме да стигнат на своите работни места, пензионерите и ќе ја користиме сите ние”- рече заменик претседателот на Владата.

Николоски на крајот упати благодарност до премиерот Мицкоски, посочувајќи дека реализацијата на вакви проекти значи и реализација на идејата на првиот човек на државата, а тоа е Македонија да стане инфраструктурна крстосница на Балканот.

“Со реализацијата на Коридорите 8 и 10 и со реализацијата на вакви проекти, Македонија навистина станува раскрница на Балканот”- потенцираше вицепремиерот Александар Николоски.

Министерство за транспорт

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Министерот за внатрешни работи Панче Тошковски денеска се обрати на Регионалната конференција „Организиран криминал во затвори: Зајакнување на интегритетот, разузнавањето и соработката во Југоисточна Европа“, организирана од Мисијата на ОБСЕ во Скопје, на која учествуваат претставници на релевантни институции и експерти од земјите од регионот.

Во своето обраќање, министерот Тошковски нагласи дека организираниот криминал во казнено-поправните установи не смее да се третира како изолиран затворски проблем, бидејќи криминалните структури можат да продолжат да комуницираат, да влијаат и да ги одржуваат своите мрежи и по лишувањето од слобода, со последици врз интегритетот на институциите и ефикасноста на целиот систем на кривична правда.

„Мораме отворено да ги препознаваме ранливостите. Пренатрупаноста, начинот на примена на притворот, недоволно развиените алтернативи, ризикот од регрутирање на ранливи лица и можноста за коруптивно влијание создаваат простор кој криминалните структури го искористуваат. Истовремено, притисоците, заплашувањето и корупцијата можат директно да го нарушат интегритетот и отпорноста на затворскиот персонал. Овие предизвици се реални и не смееме да ги потцениме“, истакна Тошковски.

Министерот потенцираше дека интегритетот мора да биде една од темелните точки во справувањето со овој вид криминал, преку јасни професионални стандарди, одговорно раководење, ефикасни механизми за проверка и спречување на корупцијата, како и институционална поддршка за службениците да можат да се спротивстават на притисоците и влијанијата.

Како особено значаен сегмент го издвои и разузнавањето во казнено-поправните установи, нагласувајќи дека навременото препознавање на ризиците бара квалитетни информации, добра анализа и ефикасна размена на информации меѓу затворските служби, полицијата, обвинителството и другите надлежни институции.

„Ниту една од овие мерки не може да даде целосен резултат без соработка. Од превенцијата и истрагата, преку обвинението и судењето, до извршувањето на санкцијата – институциите мора да гледаат на криминалот како на заеднички предизвик. Само преку координирани оперативни механизми, ефикасна размена на информации, заеднички обуки и јасни процедури за заштита на интегритетот можеме да изградиме отпорни институции кои ќе ги штитат и безбедноста и човековите права“, порача Тошковски.

Осврнувајќи се на регионалната димензија, министерот посочи дека транснационалните криминални мрежи, коруптивните ризици, притисоците врз вработените и недостатокот на ефикасна размена на разузнавачки информации се предизвици кои не познаваат граници и затоа бараат координиран, интегриран и долгорочен пристап.

Тошковски ја поздрави иницијативата и улогата на Мисијата на ОБСЕ во Скопје во поттикнувањето на регионалниот дијалог и создавањето платформа за практична соработка и размена на искуства меѓу институциите и експертите.

На крајот, министерот истакна дека Министерството за внатрешни работи останува посветено на продлабочување на соработката со партнерите во регионот и размената на искуства и добри практики, со цел градење посилни институции, побезбедни казнено-поправни установи и поефикасен и поотпорен систем на кривична правда во Југоисточна Европа.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Од тој момент до денес, заедно со мојот тим работиме со една јасна определба – да решаваме конкретни проблеми, да инвестираме во развојот и резултатите од нашата работа да се гледаат на терен.

Периодот од октомври 2025 година до денес го одбележаа бројни реализирани и започнати проекти во сите делови на општината. Работевме на сообраќајната инфраструктура, образованието, детската заштита, комуналната инфраструктура, чистотата и животната средина, спортот, јавните површини, безбедноста, но и на конкретни мерки за поддршка на семејствата, младите и повозрасните граѓани.

Некои проекти веќе се завршени, а некои се во реализација. А некои од најзначајните зафати допрва ќе го покажат својот целосен резултат. Но, едно е најважно: Општината не се гради со зборови. Се гради со работа. А резултатите од таа работа треба да се гледаат таму каде што најмногу значат – во секојдневниот живот на граѓаните. Еден од најголемите инвестициски зафати што го започнавме е реконструкцијата на сообраќајната инфраструктура. Обезбедивме 138 милиони денари за реконструкција на 18 улици со вкупна должина од 5,4 километри.

Во Мичурин извршивме целосна реконструкција на улицата „Симеон Кавракиров“. Во Горно Лисиче ја реконструираме улицата „Лисец“, со левиот и десниот крак, a во соработка со Град Скопје, поставивме и нова водоводна мрежа. Граѓаните заслужуваат функционална и современа комунална инфраструктура. Продолживме и со реконструкција на повеќе краци од „Ѓорѓи Капчев“ и "Тодор Чангов". Во поширокиот инфраструктурен зафат се опфатени и „Богомилски поход“, дел од „Гаврил Константиновиќ“ како и уредување на плочници во Ново Лисиче.

Посебен зафат е реконструкцијата на улицата „Фрањо Клуз“, во должина од 1 километар, кој се реализираше благодарение на соработката со Градот Скопје. На кракот од булевар „Трета македонска бригада“,направивме уште еден важен чекор. Покрај реконструкцијата на потегот, таму за првпат е поставена и линија за улично осветлување. Тоа значи подобра видливост и побезбедно движење и во вечерните часови. Но, продолжуваме и понатаму.

Започнавме постапка за ново улично смарт-осветлување, со кое сакаме постепено да создадеме поефикасен, современ и поекономичен систем на јавно осветлување во општината. Посебен акцент ставаме на комуналната инфраструктура во Долно Лисиче. Таму работиме на една од поважните инвестиции – подобрување и унапредување на водоводната мрежа. Ова е сериозен инфраструктурен зафат кој треба да донесе постабилно и поквалитетно водоснабдување и да реши дел од проблемите со кои граѓаните се соочуваат со години.

За нас ова не е само уште еден проект. Ова е инвестиција во основните услови за живот. Тоа што особено сакам да го истакнам е дека жителите на Долно Лисиче наскоро ќе ја добијат и првата спортска сала, чијашто изградба е во тек.

Со тоа конечно инвестираме во простор каде што децата и младите ќе можат да спортуваат, да се развиваат и да поминат квалитетно време во својата населба. Поставивме нова водоводна мрежа во должина од 1.000 метри на ул. Божидар Рајковик во Горно Лисиче - капитален проект во висина од 12 милиони денари, средства обезбедени од Владата на Република Македонија. Ако сакаме развиен Аеродром, мора да инвестираме во нашите деца. Затоа образованието е еден од најважните приоритети во овој период. Во јануари го пуштивме во употреба новиот објект на ООУ „Блаже Конески“.

Создадовме современ простор за учениците, но не застанавме тука. Во тек е втората фаза од проектот, со доградба на училиштето, изградба на нова спортска сала, спортски терени и целосно уредување на училишниот двор. Во ООУ „Александар Македонски“ во Реонски центар создадовме услови за комплетна едносменска настава. Во ООУ „Димитар Македонски“ во Лисиче, од 1 септември, учениците од шесто до деветто одделение преминаа во едносменска настава. А, во ООУ „Гоце Делчев“ во Горно Лисиче го прошируваме училиштето со шест нови училници и две канцеларии.

Паралелно воведуваме и топлински пумпи за поефикасен систем за греење. Инвестираме и во енергетската ефикасност на училиштата, со современи системи за греење и фотоволтаични системи. Но, инвестицијата во образованието не е само во зградите. Обезбедуваме учебници.

Бесплатни ученички униформи. Најсовремени смарт-табли за наставата. Таблети за учениците од четврто одделение. И, секако, ги наградуваме најуспешните ученици и наставници. На првенците на генерацијата и најдобрите наставници од основните училишта во Аеродром им доделивме признанија и по 10.000 денари парична помош. Затоа што знаењето, трудот и успехот мора да се препознаат и да се истакнат.

Но, грижата за децата започнува уште пред училишните денови. Општина Аеродром постојано инвестира и во детските градинки. Токму затоа, отпочнавме постапка за урбанизација и проектирање на прва детска градинка во Долно Лисиче, со што сакаме дополнително да ги зголемиме капацитетите и да им овозможиме на семејствата подобри услови за развој на дечињата.

А, со проширениот и надградениот објект на „Изворче“ во Стар Аеродром создаваме простор за повеќе од 400 дечиња и модерни услови за престој. По цели 33 години, се изврши целосна реконструкција на горниот кат на објектот „Буба Мара“ во Ново Лисиче, оплеменет со нов мебел и комплетно нов дидактички материјал.

Во „Бамби“, во рамките на градинката „Срничка“, поставивме нова термофасада, со што ги подобруваме енергетската ефикасност и условите за престој на децата. Континуирано вршиме реконструкции и уредувања во сите објекти на детските градинки. Работиме и на унапредување на хигиенските стандарди во градинките, со современи решенија за чистење и дезинфекција, а во објектите се поставени и прочистувачи на воздух.

Затоа што за најмалите мора да обезбедиме најдобри услови. Посебно внимание посветуваме на дечињата со атипичен развој, аутизам, развојни потешкотии и попреченост. Обезбедуваме бесплатни индивидуални логопедски и дефектолошки третмани.

Создаваме подобри услови за инклузивно образование. "Заиграј со нас" е проект кој е единствен и насочен токму кон дечињата и родителите кои имаат најмногу потреба од вакви активности. И обезбедуваме стручна поддршка таму каде што е најпотребна. За нас ова не е само една мерка.

Ова е определба. Секое дете заслужува еднаква можност да учи, да спортува, да се развива, да биде прифатено и да го оствари својот потенцијал. Соработуваме со институциите и со организациите, затоа што поддршката до нашите дечиња мора да пристигне навреме. Нашата грижа за семејствата ја претвораме во конкретни мерки.

Продолжуваме со финансиска поддршка за семејствата со новороденчиња и првачиња. А за младите семејства воведовме важна мерка – „Нула комуналии – прв дом за млади“. Со ова младите до 35 години се ослободуваат од плаќање комуналии при создавање на својот прв дом. Веќе ги имаме и првите издадени одобренија со целосно ослободени комуналии за делот на Општината. Ова е порака до младите: Останете тука. Создавајте тука. Градете го својот дом во Аеродром.

Но не ги забораваме и највозрасните, оние кои ја градеа нашата иднина. За прв па остваривме официјална, институционализирана соработка со Здружението на пензионери Аеродром, со што реализираме финансиска поддршка за реализација на нивните активности во текот на годината.

Чистотата не е еднократна акција. Таа е секојдневна обврска. Затоа комуналните екипи се постојано на терен. Се расчистуваат диви депонии. Се одржуваат јавните површини. Се косат и уредуваат тревниците. Се отстранува отпадот. Во првите месеци од мандатот беа исчистени повеќе од 600 тони отпад и голем број диви депонии. Но, сакаме да направиме и чекор понатаму. Во декември започнавме со системска селекција на пластичен отпад директно од домаќинствата. Проектот се спроведува во повеќе од 100 домаќинства, со план постепено да го прошируваме опфатот. Целта е јасна – отпадот да не завршува само на депонија, туку дел од него да се селектира, преработува и повторно употребува.

Затоа што сакаме Аеродром не само да биде почист, туку и да биде општина која одговорно се однесува кон животната средина. За подобро одржување на зелените површини, набавивме нова модерна механизација. Тоа значи поефикасна работа на терен и подобро одржувани јавни простори.

Во соработка со Јавното претпријатие за комунални дејности на Општина Аеродром, покрај секојдневните и редовните активности на терен, редовно спроведуваме и големи акции за бесплатно собирање кабаст отпад од домаќинствата. А, за луѓето кои секојдневно се грижат за хигиената во Општина Аеродром, континуирано обезбедуваме нови работни униформи, затоа што мора да се грижиме и за оние кои секојдневно се грижат за нашата општина.

"Вардариште" иако не е на територија на Аеродром, преку интензивна соработка со Градот Скопје и Општина Гази Баба, веќе не претставува проблем на жителите на Аеродром. Ветивме и остваруваме, имаме НУЛА толеранција кон загадувачите. Покрај чистотата, продолжуваме да инвестираме и во зеленилото. Во Ново Лисиче поставивме нов систем за полевање во должина од 2,5 километри, со повеќе од 300 прскалки. Со тоа зелените површини се одржуваат поефикасно и порамномерно.

Продолжуваме со косење, одржување и уредување на зелените површини, како и со активности за заштита на животната средина. Направивме и значаен чекор во уредувањето на јавните простори – поставени се повеќе од 300 нови клупи и друга урбана опрема, со кои создаваме повеќе места за одмор и престој за граѓаните.

Работиме и на превентивни активности за заштита на јавното здравје и подобрување на условите во јавниот простор. Она што ни е најважно е - Децата заслужуваат безбедни и современи места за игра. Затоа го обновуваме сите детски игралишта низ општината. Старите и дотраени реквизити се заменуваат со нова и побезбедна опрема.

Создадовме и ново, модерно кошаркарско игралиште во паркот „Авионче“ кое ги исполнува светските стандарди. Тоа е простор каде што децата и младите можат активно да го поминуваат слободното време, да спортуваат и да се дружат. Паралелно продолжуваме со поставување нова урбана опрема и уредување на јавните простори. Целта е јасна: секоја населба да има место каде што децата ќе играат, младите ќе се дружат, а семејствата ќе поминуваат квалитетно време.

Аеродром е општина во која спортот е достапен за сите. Затоа поставуваме фитнес и калистеника-зони на отворено, обновуваме спортски терени и создаваме нови рекреативни содржини. Обезбедивме и бесплатно користење на тениските терени за жителите на Аеродром. Сакаме спортот да биде близу до домот. За децата. За младите. За родителите. За повозрасните. За сите. Квалитетот на животот не го прават само домовите. Го прави и просторот меѓу нив.

Затоа продолжуваме со уредување на парковите, плочниците и јавните површини. Уредивме повеќе пешачки патеки на различни локации низ општината, со цел движењето на граѓаните да биде побезбедно, поудобно и пофункционално. Во Трговскиот центар во Лисиче го уредуваме просторот со ново поплочување и урбана опрема.

Ги реконструираме јавните пешачки површини кај ТЦ „Три бисери“ и продолжуваме со истото темпо и на други локации. Аеродром не е само место каде што живееме. Тоа е заедница. Место каде што треба да има култура, дружење, настани и содржини за сите генерации.

Затоа започнавме со изградба на првиот мултифункционален културен центар во Ново Лисиче. Простор каде што во иднина ќе можат да се организираат концерти, претстави, кинопроекции, изложби и други културни настани. Во изминатиот период организиравме и дадовме поддршка на низа културни, спортски, детски и забавни содржини.

Општина Аеродром беше домаќин на значајниот светски 3х3 Ред Бул кошаркарски настан, кој привлече бројна публика и ги собра најдобрите македонски стритбол и светски ѕвезди од овој спорт. Еден од настаните што прераснува во традиција е и Aero Street Food Festival, што на почетокот од септември го збогатува јавниот и забавниот живот во општината и потврдува дека Аеродром може да биде домаќин на современи содржини за сите генерации.

Сакаме Аеродром да има свој препознатлив културен и општествен живот. Токму затоа даваме континуирана поддршка на Илинденскиот марш, меѓународниот фолклорен фестивал „Св. Троица“ и уште низа други. Безбедноста на граѓаните ни е приоритет. Затоа започнавме со реализација на проектот за видеонадзор во Општина Аеродром, со цел поголема безбедност и подобра заштита на јавниот простор.

Но, безбедноста не е само видеонадзор. Таа е и добро осветлена улица. Уреден тротоар. Функционална сообраќајна инфраструктура. Современо улично осветлување. И почитување на комуналниот ред. Затоа ги засиливме контролите на бучавата, комуналниот ред и градилиштата. Правилата мора да важат еднакво за сите! За мене, успешна локална самоуправа не е само онаа што гради. Туку и онаа што слуша. Што разговара со граѓаните. Што реагира на нивните проблеми. И што ја подобрува сопствената работа.

Затоа работиме на поголема транспарентност, подобра комуникација со граѓаните и поквалитетни услуги. Воведовме и можност за анонимно оценување на работата на администрацијата. Затоа што граѓанинот мора да биде во центарот на локалната самоуправа. Почитувани граѓани, За мене најважниот показател не се само бројките.

Најважно е што граѓаните ги гледаат промените во својата населба и ги чувствуваат во своето секојдневие. Тоа е суштината на локалната самоуправа. Да решава проблеми. Да создава услови. А работата продолжува.

Ќе продолжиме да инвестираме во инфраструктурата, образованието, децата, чистотата, зеленилото, спортот и безбедноста. Ќе продолжиме со нови проекти и конкретни решенија. Затоа што граѓаните очекуваат резултати – а наша обврска е да ги испорачаме. Ветивме работа – работиме. Ветивме развој – Аеродром се развива.

Дејан Митески, градоначалник на Општина Аеродром

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.