Во соопштение објавено на Фејсбук, Порошенко рече дека ја донел одлуката откако, како што тврди, не успеал да го убеди полскиот претседател Карол Навроцки да ја повлече одлуката за одземање на истото одликување на сегашниот претседател на Украина, Володимир Зеленски.

Порошенко истакна дека смета дека одлуката на полскиот претседател Карол Навроцки е погрешна и неправедна кон народот на Украина.

„Не е случајно што (заменик-претседателот на рускиот Совет за безбедност, Дмитриј) Медведев веќе му честиташе. Кремљ секогаш аплаудира на сè што го ослабува единството меѓу Украина и Полска“, забележа политичарот.

Според него, во случајот на Зеленски, како и во неговиот, не биле наградени шефови на држави, туку Украинци, армијата што ја брани Украина, Полска и цела Европа.

„Ако се расправаме за минатото, некој друг ќе ја добие иднината. Претседателот на Украина конечно мора да го разбере ова. И претседателот на Полска. Пред да биде предоцна“, предупреди Порошенко.

Тој оцени дека потезите поврзани со одликувањата и историските прашања дополнително ги влошија политичките односи меѓу Киев и Варшава, предупредувајќи дека ескалацијата може да им оди во прилог на трети страни.

Додаде дека оние во Полска кои „не се занимаваат со историски митови, туку ја проучуваат историјата и извлекуваат заклучоци од нејзините лекции“ знаат дека откако Украина ќе ја изгуби својата независност, и Полска ќе ја изгуби.

„Не е минатото тоа што треба да ги одредува полско-украинските односи. Не сакам Полјаците да ги уредуваат нашите учебници и во никој случај не тврдам дека ние Украинците треба да ги корегираме полските учебници, бидејќи во спротивно ќе ни испратат заеднички учебник од Москва“, истакна Порошенко.

Порошенко нагласи дека стратешкото партнерство меѓу Украина и Полска останува клучно, особено во контекст на војната со Русија и безбедносната соработка, и дека треба да се избегнуваат понатамошни политички конфликти.

Во исто време, тој повика на дипломатско решение на спорот и на единство во поддршка на Украина, особено во рамките на европската и евроатлантската интеграција.

Украинскиот претседател Володимир Зеленски претходно денес објави дека го испратил Орденот на Белиот орел по пошта до полскиот претседател Карол Навроцки, наведувајќи дека Украина останува отворена за сите „суштински форми на соработка“ со партнерите.

Навроцки во петокот изјави дека одлучил да му го одземе на украинскиот претседател Володимир Зеленски највисокото одликување на Полска, Орденот на Белиот орел, откако Зеленски преименува воена единица по националистичките бунтовници кои масакрирале Полјаци во Втората светска војна.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.