Политиката да ги тргне рацете од образованието – вели министерката за образование и наука Весна Јаневска откако законите за високо образование, научноистражувачка дејност и за квалитет во високото образование и науката, стигнаа до прво читање на собраниска расправа, но се блокирани од албанскиот опозициски блок кој има бадетентерово мнозинство.

-Бадентерот е уставна одредба но не треба да се злоупотребува како што имало случаи во минатото и постојано тврдам дека политиката треба да ги тргне рацете од образованието. Да, точно сум кажала дека лично сметам дека во овие три закони кои се предадени во Собранието, нема нешто што би можело да пречи за да бидат изгласани и со Бадентер како што е редот,- - Весна Јаневска, министерка за образование и наука.

Денеска од опозициската ДУИ реагираа на изјава на министерката во која зборувајќи за овие три закони, неодамна појасни дека се блокирани од како што рече, алатка за заштита на правата наречена Бадентер, но како што посочи, овие три закони се од мериторен карактер и не влегуваат во проблем во кој правата на малцинствата би биле загрозени. Од ДУИ побараа извинување од министерката и повлекување на изјавата дадена пред десет дена, бидејќи како што тврдат, таа бара селективна примена на Бадентерот.

-Изјавата на министерката за образование Весна Јаневска претставува директен напад врз еден од столбовите на Охридскиот договор. Јаневска го нарекува Бадентер „алатка“. Бара тој да не се применува таму каде што таа и Владата сметаат дека „не треба“. Уставот не ѝ дава такво право. / Уште попонижувачки е тоа што, во контекст на блокадата од албанските пратеници, министерката зборува за Албанците како за „мала заедница“,- ДУИ.

Јаневска ги негира обвинувањето на ДУИ дека ја нарекла албанската заедница во државава „мала„ и според неа, реакцијата е избрзана. Таа дополни дека очекува кон крајот на август да биде свикана собраниската седница на која ќе продолжи расправата за законите.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

На неколку локации се активирани и ер тракторите а според неофицијални податоци, се работи за подметнати пожари.

-На пожарот на територијата на Македонски Брод во атарот на селото Драгов Дол денеска ќе користиме специјална техника, односно непосредно до пожарот наместивме голем импровизиран базен од кој што хеликоптерот ќе полни вода. // Пожарот кој повеќе денови се одвива на територијата на Студеничани во атарот на селото Рамни Габер е се уште активен, тој не ја зголемува својата динамика но се движи по тешко и на делови тотално непристапен терен, поради тоа, во текот на денот најверојатно ќе делуваме со ер-тракторите,- - Стојанче Ангелов, директор на Дирекција за заштита и спасување.

Ангелов очекува до крајот на денот пожарите на територијата на општина Македонски Брод и Крушево да бидат изгаснати, но како што вели, голема е опасноста во меѓувреме да се појават и други пожари. Панични ноќни часови доживеаа и жителите на селото Зелениково во близина на Скопје, каде пожарот веќе се доближил до нивните куќи. Жителите со навремена реакција успеале да направат делумна заштита на неколку места, прскајќи со вода и сечејќи критични грмушки и дрвја. Како што изјави Ангелов, се работи за намерно подметнат пожар а МВР трага по сторителот.

-Интервениравме навремено со возило на општина Зелениково пристигнавме на лице место. Дополнително ги повикавме и доброволното противпожарно друштво Зелениково и со заеднички сили и нивна помош успеавме да го спречиме да не се рашири до најблиските куќи,- -Коста Маневски, градоначалник на општина Зелениково.

Освен учеството на редовните противпожарни сили, ангажирани се и доброволните пожарникарски друштва, поради кои, како што потенцира Ангелов, пожарите бргу се ставаат под контрола. Сепак, тој од терен повторно апелираше на внимателност од страна на граѓаните за како што вели, да се спречи трагедија, која може да биде и од национални размери.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Вирусот „западен нил“ се шири низ скопски општини каде што досега немаше ниту еден потврден случај, како што е Арачиново, па поради последната лабораториска потврда со која се детектирала западно нилска треска кај жена на 61 годишна возраст, и таму Центарот за јавно здраје синоќа прскаше против комарци. Епидемиологот д-р Љуљзиме Бајрами вели дека денес нема ново потврдени случаи, а со последните кои се детектирани во скопските општини Арачиново, Бутел, Кисела вода и Драчево, бројката се искачи на 34.

-Има случај во Арачиново, прв, жена која на возраст од 61 година. Во Арачиново е направено комплетно вчера адултицидна дезинсекција. На 11 и 12 е направена ларвицидна превентивна дезинсекција која се спроведува во местата каде што има позитивнислучаи на западно-нилска треска,- - Љуљзиме Бајрами – Епидемиолог во ЦЈЗ.

Најголем број од пациентите со тешка форма на болеста се од Драчево, е епидемија е прогласена и во Бутел, Кисела Вода, Аеродром, Илинден и Гази Баба.

Од локалната власт велат дека се преземаат сите чекори за заштита на населението, особено во општините каде што веќе алармот е вклучен поради поголем број на случаи.

Според последните официјални податоци од Инфективната клиника, од дваесетина граѓани што се хоспитализирани, седуммина се борат за живот, односно се приклучени на апарати за дишење. Досега, вирусот „западен нил“ зеде два човечки живота.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.