Свет

Христодулидис, Макрон и Мицотакис од Кипар испратија порака на солидарност и обединетост – европската мисија е само одбранбена

Лидерите на Кипар, Франција и Грција, од воената база во кипарскиот град Пафос, испратија порака на солидарност, обединетост и поддршка за Кипар, по нападот со беспилотно летало врз британските воени бази минатата седмица.

Кога некој го напаѓа Кипар, ја напаѓа Европа, порача францускиот претседател Емануел Макрон по трилатералната средба со кипарскиот претседател Никос Христодулидис и грчкиот премиер Кирјакос Мицотакис, кои од своја страна ја нагласија важноста на европската безбедност, но и повторија дека сите европски постапки и дејствија се одбранбени, јави дописничката на МИА од Атина.

Лидерите на Кипар, Франција и Грција, од воената база во кипарскиот град Пафос, испратија порака на солидарност, обединетост и поддршка за Кипар, по нападот со беспилотно летало врз британските воени бази минатата седмица.

Со оглед на тоа што Атина и Париз експресно реагираа и испратија воена помош за Никозија, кипарскиот претседател им се заблагодари истакнувајќи дека тоа е од суштинско значење за Кипар и суштинско значење за цела Европа, а паралелно изрази благодарност и до Шпанија и до Италија, нагласувајќи дека четирите земји, „одлучно покажуваат што значи во пракса европската солидарност“.

Христодулидис посочи дека е јасна е пораката дека „безбедноста на Кипар значи безбедност на Европа“, но и дека значи „колективна одговорност“, уште еднаш нагласи дека позицијата на земјата е јасна и „не се вклучуваат во никаква воена операција“ и остануваат посветени единствено на хуманитарната улога.

- Грција, Франција и Кипар испраќаат порака дека Европа стои обединета и одлучна да ја гарантира безбедноста на своите земји-членки во поширокиот регион на Медитеранот и на Блискиот Исток. Во вакви моменти, единството не е само принцип, вредност, тоа е силата на Европа, порача Христодулидис.

Францускиот претседател изрази солидарност и поддршка за Никозија, потсети дека веќе испратија фрегата и систем за воздушна одбрана, а носачот на авиони Шарл де Гол плови кон Кипар.

Се осврна на стратешките договори и односи што ги имаат трите земји, посочи дека тоа што тројцата лидери се заедно на островот, „ја покажува важноста на стратешкиот однос“.

- Нашата волја е да покажеме дека сме со вас за безбедна заштита и на европските граѓани, посочи Макрон и уште еднаш нагласи дека „нашата позиција треба да остане одбранбена“.

Се осврна и на важноста да се гарантира безбедноста на слободната пловидба, нагласи дека француското присуство ќе продолжи во Медитеранот и најави две француски фрегати во рамките на европската операција Аспидес, што ќе ги придружуваат танкерите и товарните бродови во Црвеното море.

Нагласи дека внимателно ја следат целата ситуација, а она што е неопходно е да постои деескалација.

Грчкиот премер од своја страна порача дека „Грција уште од самиот почеток како приоритет ја постави безбедноста на Кипар“, која како што нагласи е „фактор на стабилност во целиот Источен Медитеран“.

-Од овде испраќаме заедничка, јасна, гласна и решителна порака на единство и солидарност. Јасна порака дека Кипар, како дел од европското семејство, не е и никогаш нема да биде сам, порача Мицотакис.

Додаде дека „секоја педа европска територија е неприкосновена“, но и дека потезите се „исклучиво одбранбени, далеку од каква било воена вмешаност“ со една единствена цел „одбранбено зајакнување на земја-членка која се соочува со закана.“

Тројцата лидери се осврнаа и на можните последици што ќе постојат во енергетиката, економијата, како и миграцијата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ПИОМ: Пензиите се сигурни, нема ризик за исплатата и здравствените услуги

Исплатата на пензиите продолжува редовно, а здравствените права на пензионерите остануваат целосно обезбедени, уверуваат од Фондот за пензиско и инвалидско осигурување.

Реакцијата оттаму доаѓа по објавениот извештај на Државниот завод за ревизија во кој утврди слабости во начинот на пресметката и навремената уплата на придонесите за осигурениците во вториот пензиски столб. Ревизијата утврди и дека приходите од наплатен придонес за пензиско и инвалидско осигурување во 2024 година се зголемиле за 14 отсто но тоа не било доволно за полривање на расходите за пензии кои и понатаму бележат раст. Од ПИОМ велат и дека предмет на ревизија е 2024 година кога со фондот раководел кадар на претходната влада.

Бидејќи придонесот за здравствено осигурување на пензионерите се пресметува како процент од исплатената пензија и изнесува 11,8 проценти од нето исплатената пензија, а делот за вториот столб е 6 проценти од вкупните придонеси за пензиско осигурување, сосема очекувано е со растот на пензиите да се зголемува и обврската по овој основ кон Фондот за здравствено осигурување. Оттука, Фондот на ПИОМ нагласува дека зголемените обврски се директен резултат на повисоките пензии и подобриот животен стандард на пензионерите, а не последица на нарушена финансиска стабилност или нефункционирање на системот.

Околу стабилноста на вториот пензиски столб денеска реагираше и претседателот на СДСМ Венко Филипче. Повикувајќи се на изјава на премиерот Христијан Мицкоски дека корисниците на овој столб нема да бидат задоволни, Филипче тврди дека е оправдана загриженоста кај пензионерите.

Околу прашањатра поврзани со обврските и трансферите кон пензиските друшва од вториот столб, од ПИОМ истакнуваат и дека зголемувањето на овие обврски е директна последица на историски најголемото зголемување на пензиите во државата.

Македонија

Извори на Канал 5: Култура, спорт и односи меѓу заедницата ги презема Влен, ВМРО-ДПМНЕ здравство, социјала, евроинтеграции

Правда, култура, спорт, односи меѓу заедниците ги презема Вреди, ВМРО-ДПМНЕ ги добива здравство, социјална политика, евроинтеграции и вицепремиерското место за добро владеење, а земјоделство ќе оди кај ЗНАМ.

Ова неофицијално е досега договорено меѓу премиерот и коалиционите партнери за владина реконструкција. Извори на Канал 5 брифираат дека најверојатно владиниот тим ќе го напушти вицепремиерот Иван Стоилковиќ, министрите Цветан Трипуновски, Игор Филков, Борко Ристовски, Зоран Љутков и Фатмир Лимани.

Информациите засега никој не ги потврдува ниту демантира, но начелно постигнале согласност за рокада на овие ресори. Според лидерот на ЗНАМ, Максим Димитриевски, сите опции се на маса и треба да се согледаат грешките, но уверува дека односите во коалицијата се на највисоко ниво.

„ Сега во моментов разговараме само за министерските позиции, сите опции се отворени бидејќи треба да се слушнат сугестиите на владините партнери, но секако да се согладаат и сондажите на граѓаните колку тие се задоволни од реализација на проектите на одредени ресори. Ние не разговараме само за местата на ЗНАМ, туку за сите места во владата и реализацијата на владината програма во две години.“ - Максим Димитриевски – претседател на ЗНАМ

Неофицијално, конечна одлука за распределбата на ресорите ќе има вечерва, откако премиерот Мицкоски ќе се сретне со Димитриевски за да го прецизираат договорот, а потоа се очекува внатрепартиски да решаваат за новите имиња. Целиот процес на реконструкција во владата се најавува дека ќе заврши многу брзо, а според премиерот списокот до Собрание ќе биде доставен најдоцна до први јули. Тој потенцираше дека промената во кадрите нема да запре со министрите, туку следни се директорите кои во првите две години од мандатот на оваа влада не ги исполниле своите ветувања.

Македонија

Предлогот на Законот за кривичната постапка е објавен на ЕНЕР

Предлогот е усогласен со јуриспруденцијата на Европскиот суд за човекови права.

Министерството за правда го објави Предлогот на Законот за кривичната постапка на Единствениот национален електронски регистар на прописи (ЕНЕР), со што започнува јавната консултација за едно од најзначајните законски решенија во областа на правосудството.

Предлог-законот содржи решенија за унапредување на одредбите што се однесуваат на конфискацијата, правата на жртвите на кривични дела, мерките за пронаоѓање и обезбедување лица и предмети, електронските докази, посебните истражни мерки, финансиските истраги, увидот во списите, одржувањето рочишта и изведувањето докази на далечина, постапувањето по обвинителен акт, главната расправа, правните лекови, скратената постапка и други аспекти на кривичната постапка.

Предлогот е усогласен со јуриспруденцијата на Европскиот суд за човекови права, како и со меѓународните и европските стандарди. Воедно, законот е усогласен со 18 директиви на Европската Унија, особено во делот на процедуралните права на осомничените и обвинетите лица, правата на жртвите и конфискацијата.

Најзначајните новини во Предлогот на Законот за кривичната постапка се:

• Подобрување на одредбите за конфискација;

• Дигитализација на кривичната постапка;

• Ревидирање на одредбите за посебните истражни мерки;

• Унапредување на процедуралните права на осомничените и обвинетите лица, како и правата на жртвите согласно законодавството на Европската Унија;

• Усогласување со Законот за АРО, Законот за управување со конфискуван имот, имотна корист и одземени предмети во кривична и прекршочна постапка и Законот за исплата на паричен надоместок на жртви од кривични дела со насилство;

• Отстранување на недостатоците утврдени во досегашната практика.

Со предложените решенија се создава основа за поефикасна, потранспарентна и помодерна кривична постапка, усогласена со европските стандарди и потребите на современиот правосуден систем.

Тагови: Министерство за правда