Тој управува со сите витални активности неопходни за организмот да преживее.

Мозокот е најважен и најкомплексен орган во човечкото тело. Тој управува со сите витални функции кои се неопходни за опстанок на организмот. Ги контролира нашите емоции, меморијата и сите други активности преку испраќање безброј сигнали од останатите делови на телото и надворешното опкружување. Мозокот нè прави свесни, емотивни и интелигентни суштества.

Човечкиот мозок е составен од околу 10 милијарди нервни клетки (неврони), кои се единствени во телото без способност да се регенерираат, освен невроните за мирис кои се обновуваат на секои два месеци. Затоа е исклучително важно да го зачуваме функционирањето на нашиот мозок, особено на постара возраст.

Бројни научни студии докажале дека следниве 10 намирници го штитат мозокот и неговите функции, а за тоа пишуваше и веб-страницата UnityPoint Health.

1. Јаткасти плодови и семиња

Јаткастите плодови, бадемите, оревите, кикиритките, индиските ореви, како и семките од сончоглед и тиква се храна за мозокот богата со протеини и омега масни киселини. Протеинот е втора по големина материја во мозокот, по водата, па затоа е важно мозокот да се храни со намирници богати со протеини кои им помагаат на невроните во мозокот да комуницираат меѓу себе преку невротрансмитерите сочинети од аминокиселини. Аминокиселините кои се наоѓаат во протеините, содржат омега 3 и омега 6 масни киселини кои нашето тело не ги произведува, па затоа мораме да ги внесуваме преку храната.

2. Лосос

Масните риби, како лососот, се богати со омега 3 масни киселини, особено со DHA (докозахексаеноинска киселина) која ја подобрува функцијата на мозокот. Се покажало дека поголемото внесување на оваа омега 3 масна киселина ја подобрува меморијата дури и кај пациентите со Алцхајмерова болест.

3. Грав

Гравот е богат со растителни влакна, витамини од групата Б и омега масни киселини. Влакната ни помагаат подолго време да останеме сити и постепено го ослободуваат шеќерот, помагајќи во концентрацијата и меморијата. Витамините Б помагаат да се конвертира хемиското соединение, хомоцистеин, во други важни хемиски соединенија за мозокот, како што е ацетилхолинот, кој помага во формирањето на нови сеќавања. И секако, омега масните киселини се неопходни за развој на мозокот.

4. Боровинки

Боровинките и другите темни бобинки се богати со антиоксиданси, кои го штитат организмот од слободните радикали, што ги прави одлична храна за мозокот. Тие исто така помагаат во борбата против дегенеративни промени во мозокот и го подобруваат невронското функционирањето и комуникација.

5. Зелен зеленчук

Темнозелениот зеленчук како кељ, спанаќ и брокула е богат со витамин Е, како и со фолати. Витаминот Е помага да се заштитат клеточните мембрани од слободните радикали кои ги напаѓаат клетките во нашето тело. Причини за настанување на слободните радикали се стресот, загадувањето, радијацијата и преработената храна.

6. Црвено вино и грозје

Црвеното вино не само што има добар вкус, туку и содржи ресвератрол, антиоксиданс кој помага за подобрување на протокот на крв во мозокот и поволно влијае на концентрацијата. Умереноста е клучна кога станува збор за консумирањето алкохол, вклучително и вино. Ресвератролот во виното доаѓа од лушпата на грозјето, па затоа е добро да се јаде грозје.

7. Темно чоколадо

Темното чоколадо содржи антиоксиданси кои го штитат организмот од слободните радикали. Тоа помага во подобрувањето на когнитивните функции на мозокот, меморијата и учењето.

8. Киноа

Киноата е богата со сложени јаглехидрати, железо и витамини од групата Б. Мозокот користи 20% од внесените јаглехидрати, кои обезбедуваат стабилно снабдување на енергијата потребна за нормално функционирање на мозокот. Железото помага за полесен транспорт на кислородот низ крвта и е важен за одржување на вниманието и концентрацијата.

9. Зелен чај

Зелениот чај исто така содржи антиоксиданси кои помагаат во заштитата на организмот од слободните радикали, штитејќи го на тој начин од болести.

10. Авокадо

Авокадото има кремаста структура и е богато со омега масни киселини, како и со витамин Е. Омега масните киселини се неопходни за раст на клетките и развој на мозокот, а витаминот Е помага во заштитата на клеточните мембрани од слободните радикали. Овој витамин ја забавува прогресијата на дегенеративните болести, како што е Алцхајмеровата болест.

Извор: srecna.republika.rs

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.