Инцидентот што се случил во четвртокот ја вклучи фрегатата ХНЛМС Евертсен, која е дел од воздушната и поморската група на британскиот разурнувач ХМС Дефендер. Според Москва, во средата биле испукани предупредувачки истрели кон бродот поради повреда на неговите територијални води во близина на анектираниот Крим.
Според холандското Министерство за одбрана, руските авиони „континуирано ја малтретирале“ фрегатата пет часа, додека таа била југоисточно од Крим.
Авионите „летаа опасно ниско и близу, симулирајќи напади“, додаде Министерството во соопштението, велејќи дека тие биле вооружени со бомби и ракети.
„По неколку часовно заплашување, нарушувања на електронската опрема беа забележани и во Евертсен“, додаде Министерството.
Холандската министерка за одбрана Анк Бијлевелд-Шутен го осуди „неодговорното“ однесување и рече дека Евертсен „има целосно право да плови таму. Ништо не го оправдува таквото агресивно однесување што исто така го зголемува ризикот од несреќа“, рече таа.
Москва не одговорила на овие изјави.
Последниот инцидент на Црното Море се случи ден пред овој за што се жали Холандија.
Русија тврди дека британскиот разурнувач ХМС Дефендер во средата влегол во водите во близина на Крим, полуостров што Москва го припои на нејзината територија во 2014 година и „доби предупредување дека ќе користи оружје во случај на нарушување на руската граница“.
Бидејќи британскиот брод „не реагираше на предупредувањето“, соопшти руското Министерство за одбрана, рускиот „граничен патролен брод испука предупредувачки истрели“, а авионот Су-24М изврши „бомбардирање по трасата на разурнувачот заради предупредување“.
Лондон негира, повикувајќи се на руски „стрелачки вежби“ и „безопасен премин низ украинските територијални води“.
Во такви напнати околности, Украина и Соединетите држави вчера започнаа заедничка воена вежба во Црното Море, како дел од соработката на Запад со Киев.