Иако првиот човек на македонската Централна банка – Трајко Славески, беше повикан од новинарските здруженија да покаже почит и транспарентност кон новинарите и да се воздржи од омаловажување и етикетирање на медиумите, во телевизиско гостување Славески продолжи со јавни напади врз националната телевизија Канал 5 и нејзините новинари. Во емисијата Трилинг, Славески своето поведение кон новинар на Канал 5, кое новинарската фела веќе го оцени како потценувачко и недозволиво, тврди дека било „одговор на насилство„.

Новинар: Имаше ли потреба за таков обид за дискредитација на седмата сила?

Трајко Славески: Немало обид за дискредитација, тоа е одговор на едно насилство од страна на ваш колега, кој што прекинува собир каде што гувернерот дава на дадена тема одговори на прашања. Јас одговорив на сите негови прашања.

Новинар: Кои се мотивите за атакот, како што рековте, врз Централната банка? Бидејќи на прес конференцијата рековте дека има атак врз Народната банка?

Трајко Славески: Добро, ќе се откријат а мислам дека вашата фела може да ги претпостави бидејќи доаѓаат од само една медиумска куќа.

Славески пред три дена беше прашан за случајот со двете вицегувернерки кои и пет месеци по истекот на нивниот мандат на 22 октомври минатата година работат и одлучуваат во Советот на НБРМ, но наместо да даде одговор, тој прашањето го оцени како тенденциозно.

„Добро за тоа разговарајте со вашиот уредник и прашајте го кои се мотивите за овој напад на Централната банка, јас многу добро ги знам. Ви кажуваме по 10ти пат. Дали има прашања во врска со темата? – Не, ви одговорив. “

Сепак, за дел од адвокатската фела, законските одредби кои го определуваат рокот за постапување како обврска на гувернерот се јасни, а функционирањето на Народната банка со состав кој може да биде правно оспорен, значи дека е потребна и ревизија на донесените одлуки во спорниот период.

„Определениот рок не може да се пробива, односно секое пробивање на таквиот рок од страна на оној кој има таква обврска да го испочитува би претставувало прекршување на Законот. Секое оправдание за пробивање на рокот всушност е оправдание за незаконско постапување. Секое постапување кое што е надвор од роковите во кои што не постои легитимитет на оние кои ги носеле одлуките е проблематично и од тој аспект неспорно е дека ќе треба и да се направи ревизија. ЈО по закон е должно да ги испита сите оние аспекти кои што веќе се изнесени во јавноста.“

Од СДСМ кои веќе побараа од Обвинителството да отворат предмет по допрен глас, велат дека размислуваат дали од партијата ќе поднесат кривична пријава против Славески.

„Имаше разговори во рамки на партијата, денеска ќе заседаваат дел од органите на партијата, па ќе излеземе со став.“

На прашањето на Канал 5 дали ВМРО ДПМНЕ ќе ја поддржи Ана Митреска како предлог за вицегувернер, од владеачката партија одговорија дека тоа дополнително ќе се разгледува.

„Тоа прашање ќе биде дополнително разгледано, и ќе биде донесена одлука која ќе биде во согласност со законот и важечките прописи и никако поинаку.“ - соопштија од партијата.

Канал 5 претходно прашање испрати и до кабинетот на претседателката Гордана Сиљановска Давкова, но се уште нема одговор дали по сериозните индиции за повреда на службените овластувања, ќе го искористи правниот механизам и ќе препорача разрешување на гувернерот, согласно Законот за Народната банка.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.