– Идејата за изработка се јави откако од медиумите дознавме дека има недостиг на заштитна опрема за здравствените работници, како и тоа дека има група луѓе од Скопје кои веќе почнале да работат на решавање на проблемот. Првичната идеја за рамка за визир направена на 3Д принтер е од Чешка, од фирма која произведува 3Д принтери. Доволни беа неколку дена за да стигне до нас. Направен е мал редизајн на рамката од луѓе од скопската група и е пуштена во изработка, вели Бобан Поповски професор по информатика и програмирање од училиштето „Крсте Мисирков".
Десетмината кумановци – Бобан Поповски, Марко Стојковски, Игор Тимчевски, Миланчо Додевски, Димитриј Ѓорѓи, Борислав Николовски Трифуновски, Никола Петковски, Срѓан Јордановски, Иван Младеновски, Бобан Кусигерски, Борјан Јовановски, работат на дванаесет 3Д принери.
Визирите за маските се изработуваат од проѕирен вералит, додека пак рамките се изработуваат од филамент PLA+/PLA(Polylactic acid) – вид на пластика која се користи за 3Д принтање и е биоразградлива, но е чувствителна на висока температура. Природата на материјалите дозволува само ладна стерилизација или дезинфекција со дезинтал или алкохол, објаснуваат од групата.
– Процесот на изработка е спор. Принтерите работат скоро 24 часа на ден за да можеме да покриеме што поголем број на институции во најкраток можен рок. Една изработка е во временска рамка од еден и пол па се до три часа. Се зависи од принтерот, перформансите и Г-кодовите адаптирани на моделот. Нашите принтови некаде се движат од 1:40 до 2:30 часа. Секој ден, или секој втор ден, еден од нас поминува до сите од групата, го собира сработениот материјал и го доставува до одредена здравствена институција, вели Поповски.
Дел од материјалот е донација, дел им го испраќа скопската група како подршка, а дел се набавува од паричните средства кои се донирани во групата „Куманово 3Д принт за медицински персонал"./МИА