Балкан

Грција доби инвестициски степен од агенцијата Мудис

Мудис ја надгради грчката економија и на земјата ѝ додели инвестициски степен, за што премиерот на Грција Кирјакос Мицотакис коментираше дека се „истакнува значителниот напредок на Грција“.

Агенцијата за рејтинг Мудис ја надгради грчката економија и на земјата ѝ додели инвестициски степен, за што премиерот на Грција Кирјакос Мицотакис коментираше дека се „истакнува значителниот напредок на Грција“, јави дописничката на МИА од Атина.

- Надградбата на Мудис на Грција на Baa3 го означува последниот чекор во враќањето на нашиот инвестициски степен од сите големи агенции за рејтинг, нагласувајќи го значителниот напредок на Грција. Остануваме целосно посветени на реформите кои привлекуваат инвестиции, создаваат работни места и поттикнуваат одржлив раст, напиша Мицотакис на Икс.

Весникот „Катимерини“ коментира дека Грција по 14 години доби инвестициски степен од Мудис, но и дека беше очекувано, со оглед на тоа што е единствената од трите врвни агенции за кредитен рејтинг што не го имаше надградено нивото на грчката економија.

Министерот за национална економија и финансии на Грција Костис Хаѕидакис, кој по реконструкцијата на Владата од денеска ќе биде заменик-претседател на Владата, доцна синоќа изрази задоволство што неговата „последна изјава како министер за национална економија и финансии се однесува на доделувањето инвестициски степен за грчката економија од страна на Мудис, една од најважните агенции за кредитен рејтинг на меѓународно ниво“ и порача дека „Грција го остава минатото зад себе“.

- Денешната надградба го означува затворањето на големиот циклус за грчката економија и го потврдува враќањето на земјата во европската нормала. Тоа е резултат на систематските напори направени во последните пет и пол години, што не беше лесно, во услови на меѓународни кризи и геополитичка нестабилност. И очигледно тоа е успех не само за Владата, туку и за сите Грци, исткан Хаѕидакис.

Дополнително, посочи дека по надградбата од Мудис, „сите рејтинг агенции признати од Европската централна банка ја класифицираат грчката економија со инвестициски степен“. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Николоски на средба со в.д. амбасадоrката на САД во Македонија, Никол Варнс: Во фокусот инфраструктурните проекти и стратешкото партнерство

Заменик претседателот на Владата и министер за транспорт, Александар Николоски, денеска оствари работна средба со Никол Варнс, вршител на должноста амбасадор на Соединетите Американски Држави во Република Македонија.

На средбата се разговараше за тековните инфраструктурни проекти, економската соработка и можностите за понатамошно продлабочување на стратешкото партнерство меѓу двете земји.

Министерот Николоски истакна дека Владата е силно посветена на реализацијата на капиталните инфраструктурни инвестиции како значаен двигател на економскиот раст, регионалното поврзување и подобрувањето на квалитетот на живот на граѓаните.

На средбата беше потврдена заедничката определба за натамошно продлабочување на соработката во сите области од заемен интерес, во духот на традиционалното пријателство и партнерство меѓу двете земји.

Со почит,

Министерство за транспорт

Тагови: Александар Николоски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Петмина загинаа во украински напад кај Москва

Најмалку пет лица загинаа, а десет се повредени во украински напад со дрон врз склад во близина на Москва, соопшти гувернерот на московската област, Андреј Воробјов.

Нападот предизвикал голем пожар во индустриски објект во Новоселки, околу 70 километри јужно од Кремљ. Според украинските медиуми, цел на нападот бил магацин поврзан со компанијата „Вајлдберис“, која Киев ја обвинува дека обезбедува логистичка поддршка за руската армија. Во текот на ноќта биле погодени и складишта на компанијата во регионите Санкт Петербург и Твер. Mеѓувреме, Русија продолжи со воздушни напади врз Украина. Во нападите врз Миколаев, Суми и други украински градови загинаа најмалку четири лица, меѓу кои и деца, а повеќе лица се повредени.

Тагови: напад

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Седница на главниот штаб за кризи: Водата во Гостивар останува забранета за употреба

Водата во Гостивар се уште не е безбедна за пиење и останува да се користи исклучиво за технички потреби.

Ова денеска го соопшти министерот за внатрешни работи Панче Тошковски по седницата на Главниот штаб за управување со кризи. На состанокот било одлучено во наредниот период да се интензивираат контролите на квалитетот на водата, се додека не се добијат три последователни исправни микробиолошки анализи. До тогаш, жителите ќе продолжат да добиваат флаширана вода, а според Тошковски, досега се дистрибуирани речиси 600 илјади литри. Во меѓувреме, продолжува хиперхлорирањето на водоводниот систем. Тошковски вели дека присуство на хлор е регистрирано на сите контролни точки, што е показател дека дезинфекцијата се одвива успешно. Паралелно се испира примарната мрежа, за што упати и апел граѓаните да ги отвораат чешмите за да се исчисти и секундарната водоводна мрежа во домовите.

Од ЈП „Водовод и канализација“ велат дека бактеријата Proteus mirabilis ( проетус мирабилис), која беше пронајдена во дел од примероците, е очекувана поради застојот на водата во системот за време на целосната забрана за користење.

Во меѓувреме, Министерството за здравство информира дека вчера биле регистрирани 78 прегледи, шест помалку од претходниот ден. За споредба, на 18 јули, кога беше врвот на кризата, биле евидентирани 650 прегледи. Според здравствените власти, во овој момент состојбата е стабилна, а бројот на пациенти постепено се намалува.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.