Грчките земјоделци утре на протест на граничниот премин Евзони - Канал 5

Балкан

Грчките земјоделци утре на протест на граничниот премин Евзони

За МИА велат дека не отстапуваат додека не бидат исполнети нивните барања.

Грчките земјоделци утре на протест на граничниот премин Евзони

Земјоделците од северниот дел на Грција, освен секојдневните симболични блокади во вечерните часови, за утре напладне закажаа протест на граничниот премин Евзони (Богородица) кон Северна Македонија со што ќе биде блокиран сообраќајот, а во разговор со дописничката на МИА од Атина велат дека нема да отстапат од нивните барања сè додека не бидат целосно исполнети.

Во изминатите денови, по големиот протест во вторникот во Атина, кога земјоделците рекоа дека секој блок посебно ќе ги одреди своите чекори, оние од северна Грција остануваат најактивни и секојдневно во периодот меѓу 20 и 22 часот по локално, односно меѓу 19 и 21 часот по македонско време периодично го затвораат граничниот премин Евзони (Богородица).

Претседателот на земјоделското здружение од областа Пеониа, Томас Карипидис, кој воедно и ги предводи активностите на граничниот премин, во разговор со дописничката на МИА од Атина вели дека на Евзони во моментов се паркирани околу 100 трактори и пет комбајни и открива детали за утрешниот протест.

-Утре ќе се одржи голем земјоделски собир на граничниот премин Евзони со учество на активните блокови од областа централна Македонија, но ќе дојдат и други, од подалеку. Ќе започне околу 13-13.30 часот и ќе заврши според тоа колку говори ќе има, немаме одредено време кога ќе заврши, но сигурно ќе трае два-три часа, објасни Карипидис.

Во периодот додека ќе биде во тек собирот, што ќе започне од 13-13.30 по грчко, односно 12-12.30 часот по македонско време, се очекува да биде блокиран и сообраќајот на возила.

-Секако дека ќе биде затворен граничниот премин, ќе има многу народ, ќе биде големо учеството со земјоделски возила, додава претседателот на земјоделското здружение, објаснувајќи дека блокадата ќе трае сè додека не заврши протестот.

Блокада, како и секоја вечер, ќе има и денеска од 20 до 22 часот по грчко, односно од 19 до 21 часот по македонско време.

Карипидис објаснува дека доколку е потребно да се олабави сообраќајот за да не се создаваат колони, како што е впрочем пракса, и вечерва периодично ќе го отвораат преминот за да поминуваат возилата.

Земјоделците веќе над еден месец бараат од Владата да ги исполни сите нивни барања поврзани со зголемените трошоци за производство, а иако на средбата со грчкиот премиер Кирјакос Мицотакис пред десетина дена им беа соопштени дополнителни мерки, изразија незадоволство и продолжија со активностите, кои кулминираа со големиот протест во Атина.

-Нашите барања се познати, енергијата, трошоците за производство, трошоците за снабдување и сето она што го засега секој регион поединечно, барања за кои не добивме обврзувачки одговори дека ќе се исполнат во блиска иднина. И затоа остануваме на нашите блокови, без да направиме чекор кон отстапка, објасни за МИА претседателот на земјоделското здружение од областа Пеониа, Томас Карипидис.

Министрите за земјоделство на Европската Унија утре во Брисел ќе одржат состанок, па токму затоа земјоделците во Грција организираат низа активности и блокади, а паралелно не е исклучена можноста да биде затворен и граничниот премин Ники (Меџитлија) кон Македонија. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Зошто не треба да спиете голи во лето?

Кога температурите остануваат високи ноќе, спиењето без облека изгледа како најлесниот начин да се разладите.

Зошто не треба да спиете голи во лето?

Сепак, Џулиус Патрик, кој се бави со физиологија на спиењето, предупредува дека лесната облека може да биде подобар избор.

„Иако е примамливо да спиете без облека за да се разладите, ова може да го влоши вашиот сон. Кога спиете голи, потта останува на вашата кожа“, рече Патрик. Затоа препорачува лесна облека за спиење. „Ако носите лесна облека, таа ја апсорбира потта и затоа може поефикасно да ве разлади“, објасни тој.

Важно е да се запомни дека температурата на вашето тело природно паѓа во текот на ноќта, па она што се чувствува удобно на почетокот на спиењето подоцна може да стане премногу ладно.

Како полесно да заспиете кога е жешко

Еден од првите чекори е да спречите вашата спална соба да стане премногу жешка во текот на денот. Затоа е добра идеја да ги затворите завесите или да ги спуштите ролетните кога е најжешко надвор. Ако е постудено надвор отколку внатре ноќе, отворете ги прозорците и обидете се да создадете провев. Ова може да помогне да се олади просторијата пред да си легнете.

Не мора да се откажете ниту од целата постелнина. Патрик препорачува да имате при рака лесен памучен чаршаф, бидејќи може да ја апсорбира потта. Дебел јорган не е неопходен во топлите ноќи, но тенок чаршаф може да биде корисен.

И туширањето може да помогне

Патрик, исто така, препорачува брзо туширање пред спиење. Не мора да биде ладно - некои луѓе може да сметаат дека топол туш или када се поудобни. Тој вели дека топол туш може да помогне во намалувањето на телесната температура, што може да ви помогне полесно да заспиете и да останете заспани подолго.

Значи, ако ви е премногу топло во жешка ноќ, спиењето голи не е вашата единствена опција. Лесна облека, пространа памучна постелнина, ладна соба и туширање пред спиење можат да бидат едноставни начини да ви помогнат да се справите со топлината.

Фото: ВИ

Извор: Индекс.хр

Тагови: спиење

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Два инциденти за помалку од 24 часа: Уште еден воз излета од шините во Англија

Патнички воз во Есекс, источна Англија, излета од шините денес, помалку од 24 часа откако во сличен инцидент во воз на релација Лондон-Истборн беа повредени 20 лица.

Два инциденти за помалку од 24 часа: Уште еден воз излета од шините во Англија

Според фотографиите од местото на настанот, возот со девет вагони излетал од шините и удрил во надземна жичана греда кога застанал, објавува Телеграф.

Излетувањето од шините се случило само неколку часа откако лидерите во индустријата инсистирале дека железниците се безбедни за употреба во топло време.

Инцидентот се случил на најжешкиот ден во годината, кога температурите достигнале 38 степени Целзиусови.

Сликите од местото на несреќата покажуваат дека возот тргнувал од Саутенд Викторија кон Лондон Ливерпул Стрит во 13:51 часот.

Засега нема информации дали има повредени во инцидентот.

Тагови: Англија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Прекини на електричната енергија во четири азиски земји

Казахстан, Киргистан, Таџикистан и Узбекистан денес известија за прекини на електричната енергија, кои се случија „поради ненадејна промена во протокот на енергија“ од централноазиската мрежа, објави Министерството за енергетика на Казахстан.

Прекини на електричната енергија во четири азиски земји

Министерствата за енергија на сите четири земји, чии мрежи се меѓусебно поврзани, потврдија прекини на електричната енергија. Тие изјавија дека се работи на враќање на снабдувањето со електрична енергија.

Репортерите на Ројтерс во Алмати, најголемиот град во Казахстан, и Бишкек, главниот град на Киргистан, известија за прекини на електричната енергија. Локалните медиуми во Таџикистан известија за прекини во главниот град Душанбе и вториот по големина град Хуџанд.

Прекините на електричната енергија се чести во Централна Азија

Узбекистанските власти известија за прекини на електричната енергија во некои јужни делови од земјата, главно во близина на границата со Таџикистан.

Недостатокот на електрична енергија е честа појава во Централна Азија, каде што традиционалното потпирање на хидроенергија предизвикува проблеми бидејќи климатските промени ги прават хидроцентралите ранливи на недостиг на вода.

Фото: ВИ

Тагови: Азија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер