Илјадници студенти со недели мирно протестираат против образовната реформа за која тврдат дека ќе ја намали вредноста на дипломите добиени на државните универзитети, но некои повеќе не можеа да го задржат својот гнев кога премиерот Киријакос Мицотакис ги повика пратениците да го прифатат законот, објави Јаху Њуз.
„Се плашам дека ако успееме да дипломираме, никаде нема да можеме да се вработиме“, вели 25-годишниот Стратос Кацелис.
„Ниту еден млад човек денес не може да планира за иднината. Сè што гледаме се безизлезни ситуации“, додаде тој.
Мицотакис, кој освои втор мандат во јуни минатата година, рече дека законот ќе помогне да се запре егзодусот на десетици илјади грчки студенти кои студираат во странство, што е товар за економијата што сè уште се опоравува од 10-годишната финансиска криза.
„Законот, исто така, ќе помогне во усогласувањето на Грција со остатокот од Европската унија и ќе ја поттикне конкурентноста во високото образование, рече тој.
Многу е веројатно законот да биде усвоен бидејќи конзервативната влада има 158 од 300 претставници во парламентот.
„Парламентот не само што е повикан да гласа за клучниот закон, туку да одобри радикална и храбра образовна реформа за раст и социјална правда. Конечно ќе им овозможи на недржавните, непрофитни институции да работат во нашата земја“, рече Мицотакис.
Студентите, со поддршка на дел од наставниците и универзитетскиот персонал, не се убедени. Една група се отцепила од демонстрациите и фрли молотови коктели врз полицијата, која ги растера со солзавец.
Законот е дел од реформите на Владата, во кои е вклучен и законот за истополови бракови, кој беше донесен минатиот месец.
Грција годишно троши меѓу три и четири отсто од својот БДП за образование, што е под просекот на Европската унија. Сепак, Мицотакис рече дека нацрт-законот вклучува повеќе средства за државните универзитети.