Грчката економија закрепнува, но покачувањата на цените и понатаму најголем проблем - Канал 5

Балкан

Грчката економија закрепнува, но покачувањата на цените и понатаму најголем проблем

Леб над едно евро, млеко меѓу едно и две евра, се само дел од цените во грчките супермаркети, додека пак во рестораните порцијата е над десет евра, во кафулињата, кафето ретко е под четири евра.

Грчката економија закрепнува, но покачувањата на цените и понатаму најголем проблем

По речиси десет години финансиска криза, по излегувањето од програмите за спасување на грчката економија, Грција веќе шест години „работи“ на своето економско закрепнување, нешто што според Владата е успешно постигнато. Но, за граѓаните, во изминатиот период, покачувањата на цените е нивниот главен проблем, барем според истражувањата на јавното мислење, јави дописничката на МИА од Атина.

Леб над едно евро, млеко меѓу едно и две евра, се само дел од цените во грчките супермаркети, додека пак во рестораните порцијата е над десет евра, во кафулињата, кафето ретко е под четири евра, а бензинот е меѓу 1,6 и 1,7 евра за литар.

Во маркетите, цената на млекото е од 1 до 2 евра, лебот е околу 1.20 по килограм, популарната грчка фета од 13 до 17 евра итн.

- Секако дека е сè поскапено, сега веќе чекаме попусти, намалувања, понуди за да ги купиме оние работи што ни се неопходни. Сега и намалената цена е многу повисока од цената пред неколку години. Се плашам дека овој тренд на зголемување ќе продолжи, вели за МИА повозрасна Гркинка додека пазари во атински супермаркет.

Истовремено, сопствениците на кафулиња и ресторани во Атина со кои поразговара дописничката на МИА, велат дека оваа година немаат големи промени на цените во споредба со лани, барем засега.

-Гирото е 4,20, порциите се од 10 до 13 евра, салатите се околу осум евра. Истите цени ги имавме и лани, велат од популарна таверна во центарот на Атина.

Од друга страна, омилените кафиња на Грците, ладното (фредо) еспресо и ладното (фредо) капучино, најчесто се околу 4-4.50 евра.

Дополнителен проблем за граѓаните, за оние кои немаат свои станови се и кириите, особено во Атина, кои континуирано и вртоглаво се зголемуваат.

Според индексот на цени на една од платформите за недвижнини, во првиот квартал на 2025 година има зголемување на цените и на продажбата на станбени објекти во Грција, но и на цените за изнајмување, споредбено за истиот период лани.

Во периодот јануари-февруари-март 2025 година, просечната цена на становите на продажба била највисока во јужните предградија на Атина, со 4.000 евра за квадратен метар, а најниска во Касториа (Костур) од 518 евра за квадратен метар.

За изнајмувањата, најниската цена е регистрирана во Килкис (Кукуш) од 4,00 евра за квадратен метар, а највисока на Халкидики со 27,5 евра за квадратен метар.

Минималната плата во изминатите шест години зголемена за 35,4 отсто

Од 1 април годинава минималната плата во Грција се зголеми за шест отсто или за 50 евра, односно од 830 на 880 евра, што беше петто зголемување откако Нова демократија дојде на власт во 2019 година кога беше 650 евра, додека пак намерата на Владата е во 2027 година кога ѝ завршува мандатот, минималната плата да изнесува од 950 евра.

Станува збор за бруто износ, додека пак нето е нешто помалку од 750 евра и се однесува на околу 1,6 милини вработени, како во приватниот, така и во државниот сектор.

Со зголемувањето на минималната плата, индиректно се зголеми и просечната плата што минатата година изнесуваше 1.342 евра.

- Работам над осум часа седмично, платена сум со минимална плата, односно 880 евра бруто, што значи добивам околу 740 евра, од кои над две третини ми одат на стан и сметки, киријата ми ја поскапеа, па принудена сум сега да се преселам заедно со брат ми за да ги поделиме трошоците и да може да се истера месецот, вели за МИА 35-годишната Александра, која работи во приватна фирма со канцелариски мебел.

Младата девојка е само еден од многуте примери во земјата за, како што самата вели, „преживување со минимална плата во период на голема инфлација“.

Иако годишната инфлација за април беше два отсто, сепак цените на одредени производи, но и услуги, особено кириите и понатаму се високи, а граѓаните живеат своја секојдневна голгота, барем оние со кои поразговара МИА.

Велат дека понекогаш со мака врзуваат крај со крај, иако минималната плата веќе втор месец е за 50 евра повисока, што според дел од Грците, не е доволно да се покријат сите покачувања.

Од друга страна, официјалните податоци покажуваат дека земјата ја остави зад себе кризата и се чини дека актуелната Влада е цврсто решена да оди напред.

- Постоеше период кога Грција честопати се сметаше за „проблематично дете на Европа“, дури и беше доведено во прашање местото во европското семејство, рече неодамна грчкиот премиер Кирјакос Мицотакис во Берлин, кога беше награден за владините реформи и закрепнувањето на грчката економија.

Посочи дека економијата „расте многу побрзо од просекот во Еврозоната“, а овој раст се должи пред сè на странските, но и домашните инвестиции.

– За 2024 година, се очекуваше нашиот примарен суфицит да биде близу 2 отсто. На крајот изнесуваше 4,8 проценти. Нашиот долг како процент од БДП, што е најважниот индикатор за агенциите за рејтинг и за сите економисти кои ја гледаат макроекономската состојба на грчката економија, се намалува со најбрзо темпо од која било земја на ОЕЦД, посочи Мицотакис.

Јавниот долг на Грција за 2024 година изнесуваше 153,6 отсто од БДП, додека пак според последните предвидувања од Европската комисија ќе продолжи да се намалува на 146,6 отсто за оваа и на 140,6 проценти во 2026 година, а намалувањето се должи на зголемувањето на номиналниот БДП, како и на буџетските суфицити.

Според истите предвидувања инфлацијата што минатиот месец беше 2 отсто, за оваа година се очекува во просек да биде 2,8 проценти и во 2026 година да се намали на 2,3 проценти.

Согласно мајскиот извештај за финансиска стабилност објавен од Банката на Грција, минатата година економијата бележи раст „со задоволително темпо, значително повисоко од она во еврозоната четврта година по ред“, додека пак „опасностите за финансиската стабилност во Грција се главно егзогени и поврзани со геополитички тензии и пораст на трговскиот протекционизам“.

- Годишната стапка на раст на бруто домашниот производ (БДП) во реални услови достигна 2,3 отсто во 2024 година, повеќепати поголема од соодветната стапка во еврозоната. Приватната потрошувачка, инвестициите и извозот на услуги, главно позитивно придонесоа за економскиот раст. Поконкретно, приватната потрошувачка се зголеми со забрзано темпо, поткрепена од зголемувањето на реалниот расположлив доход на домаќинствата. Инвестициите го задржаа својот тренд на раст во 2024 година, пишува во извештајот.

Годишната инфлација во април 2 отсто – цените во маркетите и понатаму високи

По пандемијата и војната во Украина, цените во Грција се зголемија, цени што се однесуваат како на основните прехранбени продукти, така и на останатите производи и услуги, иако инфлацијата постепено се стабилизира.

Како што истакнавме, покачувањата на цените и понатаму остануваат главните проблеми за граѓаните нешто што се констатира и од истражувања на јавното мислење во Грција, спроведени во изминатиот период.

Согласно официјалните податоци од Службата за статистика, годишната инфлација во април била 2 отсто, а од лани до оваа година во конкретниот месец, зголемувања на цените има кај прехранбените продукти и безалкохолни пијалаци, кај облеката и обувките, станбените кирии; кај фармацевтски производи и медицинските слуги, како и на цените на хотелите и во кафулињата и рестораните.

Поконкретно, за една година, најголемо зголемување, за 29,9 отсто има кај природниот гас, за 27,6 проценти е поскапо патувањето со авион, кириите се зголемени за 10,8 отсто, кафето, какаото и чајот за 10,6 проценти, свежите риби се за 8,9 отсто поскапи, овошјето за 8,2 проценти, месото за 5,7 отсто, струјата за 4,7 проценти, зеленчукот, лебот, јајцата меѓу 2,8 и 3,3 отсто.

Од друга страна, намалување на цените има кај маслиновото масло (за 28,3 проценти) и нафтата за греење (за 12,9 отсто).

За да се задржат на исто ниво цените на одредени основни производи или да има минимално зголемување, од ноември 2022 година со одлука на Владата во супермаркетите беше воведена т.н. „Кошничката за домаќинствата“ со над 50 производи, меѓу кои ориз, леб, двопек, брашно, макарони, свинско и пилешко месо, риба, млеко и млечни производи, јогурт, јајца, различни видови сирење и кашкавал, зејтин, шеќер, кафе, какао, сокови, бебешка храна, средства за чистење, детергенти, тоалетна хартија, паста за заби, производи за лична хигиена, влошки, сапун, антисептик, пелени, храна за кучиња и мачки итн.

Податоците од Службата за статистика за месец април, покажуваат за 6,4 отсто зголемување на цените во хотелите, кафулињата, рестораните споредбено со лани.

Туризмот придонесува во грчката економија

Минатата година беше рекордна за грчкиот туризам, земјата ја посетија речиси 36 милиони туристи, бројка што е за 9,8 отсто повисока споредбено со 2023 година, а зголемување за 5,4 проценти има и во приходите за земјата што достигнаа до 21,7 милијарди евра.

Според анализата на Институтот на Здружението на грчки туристички бизниси (ИНСЕТЕ) директниот придонес на туризмот во грчката економија се проценува на 30,2 милијарди евра во 2024 година, износ што одговара на 12,7 отсто од БДП со што „туристичкиот сектор ја покажува својата водечка улога како стратешки столб на растот, конкурентноста, отпорноста и перспективата на грчката економија во нестабилна и постојано менувачка меѓународна средина“.

Дополнително, согласно анализата, ако се земат предвид многубројните придобивки, вкупниот придонес на туризмот во економијата на земјата во 2024 година се проценува меѓу 66,5 и 80,1 милијарди евра, бројки што одговараат на 28,0-33,7 отсто од БДП.

Грција помина тешки десет години во периодот од 2009 до 2010 година со три меморандум што донесоа мерки за штедење, меѓу кои и кратења на плати и пензии, зголемување на невработеноста, но и заминување на над половина милион млади во странство.

Тагови: грција цени

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Поплава на проектот на Барселона од 1,5 милијади евра, сцените се апокалиптични (ВИДЕО)

Барселона ја отвори новата сезона во Лигата на шампионите со убедлива победа од 5:1 против Феенорд, но необичните сцени на Камп Ноу привлекоа големо внимание и надвор од теренот. 

Поплава на проектот на Барселона од 1,5 милијади евра, сцените се апокалиптични (ВИДЕО)

Силен дожд ја погоди Барселона за време на натпреварот, а водата почна да се пробива во просторијата за новинари. Прес-трибината стана неупотреблива на некои места.

Видеото го објави холандскиот новинар Микос Гука, кој известува за Феенорд за „Алгемин Дагблад“. На него може да се види како водата се истура врз седиштата и масите на новинарите, додека претставниците на медиумите се обидуваат да ги заштитат компјутерите и другата опрема. Особено е интересно што сè се случи на стадионот, чија огромна реконструкција е еден од најскапите инфраструктурни проекти во историјата на фудбалот.

Проектот е вреден 1,45 милијарди евра

Во 2023 година, Барселона обезбеди финансирање до 1,45 милијарди евра за проектот „Еспаи Барса“, чиј централен дел е целосната реконструкција на Камп Ноу. Клубот ги обезбеди парите со помош на 20 инвеститори, а отплатата беше распределена во неколку транши во период од пет до 24 години.

Барселона тврди дека стадионот не е хипотекарен и дека долгот ќе се отплаќа со приходите што треба да ги генерира реновираниот Камп Ноу. Клубот проценува дека новата содржина треба да донесе околу 247 милиони евра дополнителен приход годишно.

Првичниот план на проектот предвидуваше до 900 милиони евра само за реновирање на Камп Ноу, додека остатокот од инвестицијата вклучува нова Палау Блауграна, уредување на околниот кампус и други објекти. Конечното финансирање на целиот проект Еспаи Барса порасна на 1,45 милијарди евра.

Новинарите не беа единствените што имаа проблеми

Токму затоа протечените снимки предизвикаа бројни реакции. Камп Ноу, сепак, сè уште не е целосно завршен. Барселона се врати на стадионот додека работите се уште се во тек, а конечниот капацитет треба да биде околу 105 илјади гледачи. Во моментов, се користи само дел од стадионот, а последните фази од реконструкцијата вклучуваат завршување на покривот и бројни внатрешни простори. Силен дожд ги погоди и трибините, па многу навивачи се обидоа да се сокријат од водата. Тревникот беше екстремно влажен, но натпреварот не беше прекинат. На теренот, за разлика од ситуацијата на трибините, Барселона направи сè без поголеми проблеми. Го победија Феенорд со 5:1, со два гола на Рафиња и голови на Карим Адејеми, Ламине Јамал и Габриел Жесус. Сем Стејн постигна гол за гостите.

Тагови: БАРСЕЛОНА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Пакистан со предупредување до Иран- прв сериозен испит за „исламското НАТО“

Пакистан испрати предупредување од Саудиска Арабија до Иран да ги совлада своите јеменски сојузници, бунтовниците Хути, откако тие ги засилија нападите врз кралството, изјавија за Ројтерс саудиски, пакистански и ирански извори. 

Пакистан со предупредување до Иран- прв сериозен испит за „исламското НАТО“

Овој потег е дел од координирани напори за спречување на понатамошна ескалација на кризата.

Хутите во вторник нападнаа воздухопловна база во Хамис Мушаит и нафтена инфраструктура во блиските градови, при што беа повредени 73 лица. Тоа беше еден од најголемите напади врз Саудиска Арабија од почетокот на американско-израелската војна против Иран во февруари.

Портпаролот на војската на Хутите, Јахја Сари, во вторник изјави дека саудиските воени авиони извршиле 54 воздушни напади врз различни јеменски провинции во последните 12 часа, додавајќи дека тие „нема да останат неодговорени и неказнети“.

Пакет за одбрана на Пакистан, Саудиска Арабија и Турција

Предупредувањето на Пакистан до Иран има голема тежина поради пактот за одбрана на Пакистан со Саудиска Арабија и Турција. Пакистанскиот министер за одбрана, Хаваџа Асиф, потврди дека нападите што ќе се прелеат во кралството би можеле да предизвикаат заеднички безбедносен договор меѓу Ријад, Анкара и Исламабад.

„Агресијата против една земја ќе се смета за агресија против сите три земји. Нема двосмисленост или сомнеж. Неиспровоцирана агресија или прелевање на конфликтот во Саудиска Арабија дефинитивно ќе го активира овој договор“, рече Асиф на пакистанската телевизија.

Интервенцијата на Пакистан, по години балансирање на односите со Саудиска Арабија и Иран, ја нагласи сериозноста на нападите на Хутите. Пораката до Техеран е јасна: содржете ги Хутите или ризикувајте конфликт преку посредник да се претвори во поширока регионална безбедносна криза, велат изворите.

Ирански извори тврдат дека Техеран помогнал во координирањето на нападите

Висок регионален дипломат рече дека Пакистан ја пренел пораката до Иран и го повикал Техеран да го искористи своето влијание за да ги запре нападите на Хутите врз Саудиска Арабија. Висок ирански функционер потврди дека Пакистан ја пренел пораката до Техеран во вторник, а Техеран одговори дека „Иран не ги контролира Хутите“.

Сепак, два ирански извори рекоа дека Техеран им рекол на Хутите минатата недела да извршат напади врз Саудиска Арабија. Техеран ветил дополнително финансирање и оружје, велат изворите, додека неколку команданти на Иранскиот корпус на Револуционерната гарда отпатувале во Јемен за да помогнат во координирањето на нападите.

Регионален дипломат изјави дека Исламабад се обидувал да ги ограничи Хутите пред ескалацијата да достигне точка каде што Ријад би можел да побара од Пакистан да преземе поактивна улога во одбраната на Саудиска Арабија.

„Пакистан има договор со Саудиска Арабија, но се надевам дека ситуацијата нема да достигне точка каде што Пакистан практично ќе мора да интервенира. Засега, тие ќе се обидат да најдат дипломатско решение“, изјави регионалниот дипломат за Ројтерс.

Притисокот би можел да има спротивен ефект од она што Техеран го посакува.

Пакистански извор изјави дека саудиските претставници во Ријад се сретнале со високи пакистански и турски воени претставници за да го координираат одговорот. Трите земји се согласиле дека нивните трупи нема да влезат во Јемен и дека каков било одговор ќе биде лансиран од саудиска територија, додаде изворот.

Друг пакистански извор истакна дека не е донесена одлука за приклучување кон одмаздата, нагласувајќи дека воениот договор со Ријад е одбранбен по природа и ограничен исклучиво на заштита на саудиската територија. Пакистанските сили би можеле да обезбедат воена, техничка, копнена или воздушна поддршка во Саудиска Арабија, но нема да се вклучат во борбени операции на странска почва, рече изворот.

Притисокот што го вршат Иран и Хутите би можел да има спротивен ефект од она што Техеран го посакува, предупреди регионален дипломат.

Со насочување на безбедноста во Персискиот Залив за да се изврши притисок врз Вашингтон поради блокадата на иранските пристаништа, Техеран ризикува да ги поттикне Саудиска Арабија, Пакистан, Турција и другите сојузници на САД кон поблиска безбедносна соработка, наместо да ги наруши нивните односи.

Трамп решен да ја одржи блокадата

Регионалните претставници, исто така, гледаат малку знаци дека Вашингтон е подготвен да попушти. Претседателот Доналд Трамп се чини решен да ја одржи блокадата на САД сè додека Иран не постигне договор со Вашингтон, рече дипломат, додека Катар тивко разгледува нови предлози насочени кон враќање на двете страни на преговарачка маса.

Друг регионален извор рече дека воениот одговор на Саудиска Арабија ќе продолжи да ги таргетира Хутите, а не самиот Иран. Саудиските претставници, исто така, не веруваат дека нападите на Хутите ќе ја постигнат пошироката цел на Техеран за прекин на блокадата на САД.

Не се очекува Ријад да побара од Вашингтон да ја укине блокадата, рече изворот, нагласувајќи дека Трамп го гледа одржливиот економски притисок како најефикасниот пат кон преговорите. „Прашањето е колку болка може да издржи Иран и колку долго. Трамп не сака воено решение. Тој сака да изврши притисок врз нив со блокада“, заклучи регионалниот извор.

Тагови: Иран Пакистан

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Невреме пустоши во Италија- жена загина во поплавен подвозник (ВИДЕО)

Силното невреме што ја погоди Италија од вчера продолжува да предизвикува големи проблеми низ целата земја. 

Невреме пустоши во Италија- жена загина во поплавен подвозник (ВИДЕО)

Една жена загина, десетици луѓе беа евакуирани, а поплави, лизгање на земјиштето и паднати дрвја беа регистрирани во текот на денот во Рим, Тоскана, Лигурија и други делови од земјата, пишува ANSA.

Во Латисана, град во североисточна Италија помеѓу Венеција и Трст, една жена почина откако со автомобилот влета во поплавен подвозник. Автомобилот беше целосно потопен.

Силните поплави ја зафатија целата област помеѓу Латисана и крајбрежниот град Лињано Сабиадоро, во североисточна Италија покрај Јадранското Море и западно од Трст. Лињано Сабиадоро е делумно под вода, а пожарникарите работат на бројни локации со часови. Подруми, гаражи, куќи и патишта беа поплавени.

Во источниот дел од регионот Венето, во пошироката област на Венеција, пожарникарите до утрото добија 130 барања за интервенција. Околу четириесет интервенции беа завршени, додека околу 90 сè уште чекаа да бидат решени. Областите Сан Дона ди Пјаве, Ераклеа, Каорле и Сан Микеле ал Таљаменто се особено погодени.

45 лица се евакуирани поради свлечиштето

Во Валтелина во Ломбардија, во текот на ноќта се случи големо свлечиште над селото Катаеџо. 45 лица се евакуирани и престојуваат во три хотели, а училиштата се затворени. Во тек се проверки за да се утврди дали постои ризик од нови свлечишта.

Бурата, исто така, го наруши железничкиот сообраќај. Железничкиот сообраќај помеѓу Портогруаро и Трст беше прекинат поради временските услови, а некои возови доцнеа повеќе од еден час. Воведени се резервни автобуси.

Повеќе од 63.000 удари од гром се регистрирани во Тоскана во текот на 12 часа. Во Чечина, наврнаа повеќе од 80 милиметри дожд за помалку од два часа, што ги поплави подрумите и подземните гаражи. Бројни улици во Трст беа поплавени, а водата на некои места достигна 15 сантиметри. Пукнаа капаците на шахтите, имаше проблеми со сообраќајот и прекини во електричната енергија.

Тагови: жена италија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер