"Овие денови во Авганистан, гледаме човечка трагедија за која ние самите сме виновни. Тоа е пресвртница што не` тресе и што ќе го промени светот", рече германскиот претседател Франк - Валтер Штајнмаер.
Тој рече дека драматичните слики од Кабул и настаните во Авганистан „никого не оставаат рамнодушен“.
„Сликите на очај од аеродромот во Кабул се срам за политичкиот Запад“, рече Штајнмаер на прес -конференцијата во Берлин.
Тој рече дека Германија сега мора да стори сé што е во нејзина моќ за да ги спаси германските граѓани од Авганистан, но и сите оние Авганистанци кои со години и помагаат на германската мисија.
Во исто време, Штајнмаер бара да најде начини со сите партнери да им помогне на оние на кои сега им се заканува смрт и насилство во Авганистан, а тоа особено важи за „многу храбри жени“.
Германскиот претседател изјави дека настаните во Авганистан, и пред се поразот на демократските сили што Западот се обиде да ги воспостави, ќе го смени идниот став кон таквите мисии.
„Неуспехот на нашите долгогодишни обиди да изградиме стабилен систем во Авганистан, поставува основни прашања за минатото и иднината на нашата надворешна политика и воен ангажман“, рече Штајнмаер.
Тој заклучил дека има многу „горчливи прашања“ на кои треба заеднички да се одговори во рамките на западната алијанса.
„Поради солидарноста во рамките на овој сојуз, отидовме во Авганистан пред дваесет години“, заклучил германскиот претседател.
Првиот германски авион што слета во Кабул откако Талибанците ја презедоа власта, евакуира само седум лица поради хаосот на аеродромот во Кабул.
Министерот за надворешни работи Хајко Мас на Твитер напиша дека ситуацијата на аеродромот во Кабул се стабилизира и дека новите евакуации ќе продолжат.