Германскиот Парламент усвои предлог-закон со кој луѓето полесно ќе го менуваат името и полот

Германските пратеници денеска изгласаа закон со кој на трансродовите, интерсексуалните и небинарните лица ќе им биде полесно да го сменат името и полот на нивните официјални документи.

„Законот за самоопределување“ е една од неколкуте социјални реформи што ги вети либералната коалициска влада на канцеларот Олаф Шолц и ќе стапи во сила на 1 ноември. Во Долниот дом на Парламентот „за“ нацрт-законот гласаа 374 пратеници, „против“ беа 251 и 11 „воздржани“.

Усвоената законска регулатива ќе им овозможи на возрасните да го менуваат своето име и пол на документите во писарницата без дополнителни формалности. Тие ќе треба да ја известат канцеларијата три месеци пред промената.

Законот, кој моментално е во сила, бара лицата кои сакаат да го променат регистрираниот пол, прво да добијат оценки од двајца експерти „доволно запознаени со конкретните прашања на транссексуалноста“, а потоа судска одлука. Тој закон беше донесен пред околу 40 години, а германскиот Врховен суд оттогаш укина некои од неговите одредби со кои се бараше луѓето да се разведат, стерилизираат и да се подложат на операција за промена на полот.

Новото законодавство се фокусира на правниот идентитет на физичките лица. Не вклучува никакви промени во германските прописи за операциите за промена на полот.

Новите правила ќе им овозможат на малолетниците на возраст од 14 и повеќе години да го променат своето име и законскиот пол со одобрение на нивните родители или старатели. Доколку не се согласат, тинејџерите ќе можат да побараат од семеен суд да ја дозволи промената.

Во случај на деца помлади од 14 години, нивните родители или старатели ќе треба да поднесат барања до надлежните служби во нивно име.

Откако ќе стапи во сила официјалната промена на името и полот, нема да бидат дозволени други промени една година. /МИА

Сервисот поскап од автомобил: Ролс Ројс чини 65.000, а за сервис се потрошени 73.000 евра

Половените луксузни автомобили можеби на почетокот имаат добра цена, но тие се јама без дно кога станува збор за одржување.

Веројатно сте фантазирале да купите малку постар премиум автомобил по изненадувачки ниска цена, посакувајќи да можете да возите во луксузен автомобил за многу помалку пари отколку што чини нов.

Како, на пример, овој „Rolls-Royce Phantom“ од 2004 година.

Наведен на 69.950 долари, изгледа како добра зделка за некој што планира да издвои толку пари за автомобил, со оглед на тоа што чинеше (тогаш) нов 320.000 долари, што е еквивалент на нешто повеќе од 531.000 американски долари денес кога ќе се земе предвид инфлацијата .

Љубителите на автомобили без сомнение ќе бидат воодушевени што ќе можат да возат таков луксузен автомобил со 6,8-литарски V12 мотор кој има 459 КС (338 kW).

Но, тој мотор, како и сите други луксузни карактеристики, се причина купувачот да се држи настрана од овој „Phantom“.

Затоа што кога нешто ќе тргне наопаку со едно од овие стари луксузни возила, трошоците за поправка се астрономски.

Во овој случај, како што покажува приложената фактура, дури 78.913,57 долари се потрошени на последниот сервис на автомобилот извршен во 2023 година!

Иако рекламата го истакнува ова како предност и показател за „внимателно одржување и внимание што е посветено на ова возило“, во реалноста тоа е сериозно предупредување за потенцијалните купувачи кои мислат дека добиваат луксузен автомобил за „мали пари“, освен ако тие се подготвени за трошоците за одржување.

Илјадници се собраа на испраќањето на иранскиот претседател, но помалку од очекуваното (ВИДЕО)

Илјадници луѓе се собраа денеска во Табриз за да ја оплакуваат смртта на претседателот Ебрахим Раиси во хеликоптерската несреќа во која загинаа и министерот за надворешни работи и седум други членови на делегацијата.

Илјадници луѓе се собраа денеска во Табриз за да ја оплакуваат смртта на претседателот Ебрахим Раиси во хеликоптерската несреќа во која загинаа и министерот за надворешни работи и седум други членови на делегацијата, но се чини дека немаше јавна жалост како некои претходни комеморации.

Државната телевизија емитуваше снимки во живо од толпата, многумина од нив облечени во црно, како се удираат во градите додека камионот со ковчег покриен со бели цвеќиња полека се пробива низ толпата.

Сепак, иако државната телевизија известува за голем број луѓе во Табриз, познавачите на ситуацијата во Иран го гледаат сосема спротивното од јавната жалост во споредба со претходните комеморации за смртта на други високи функционери во текот на 45-годишната историја на Исламската Република.

Иако Иран прогласи петдневна жалост за Раиси, емоционално наполнетата реторика што следеше по смртта на Касем Сулејмани, командантот на Револуционерната гарда кој беше убиен во американски ракетен напад во Ирак во 2020 година, беше отсутна. Неговиот погреб привлече огромна толпа луѓе кои плачеа и лелекаа од тага и бес.

Телото на Раиси ќе биде преместено во светиот шиитски град Ком, каде се планирани понатамошни обреди, а утре телото на поранешниот претседател ќе биде пренесено во Големата џамија Мосала во Техеран, каде што иранскиот врховен лидер Али Хамнеи ќе одржи молитва за Раиси и другите жртви на несреќата. Раиси ќе биде погребан во четврток во неговиот роден град Машхад во источен Иран.

Смртта на претседателот доаѓа во време на продлабочување на кризата меѓу верското раководство и иранското општество поради низа прашања, од заострување на политичката и социјалната контрола до економските проблеми.

Со цел да се врати одреден легитимитет по историски нискиот одѕив на парламентарните избори во март од само 41 отсто, иранските свештеници мора да дадат сѐ од себе за да ги привлечат луѓето на предвремените претседателски избори закажани за 28 јуни.

Но, Иранците сè уште болно се сеќаваат на бруталноста на исламскиот режим во задушувањето на протестите предизвикани од смртта на младата 22-годишна Махса Амини во притвор од полицијата, вклучувајќи масовни апсења и егзекуции.

Дополнително, раширеното незадоволство и гнев поради сѐ потешките услови за живот и распространетата корупција, исто така, ќе ги натера многу Иранци да останат дома.

Според Ројтерс, аналитичарите велат дека милиони Иранци изгубиле надеж дека владејачките мули и ајатоласи би можеле да ја решат тешката економска криза предизвикана од лошото управување, западните санкции и корупцијата.

И додека Иранците живеат сѐ потешко и потешко, светските медиуми пред неколку години нашироко пишуваа за огромното богатство што го поседуваат иранските мули и ајатоласи.

Написот на Форбс со наслов „Мула-милионерите“ ја открива сета алчност за моќ и пари на шиитските лидери по нивното доаѓање на власт во Иран, а се наведува дека само ајатолахот Али Хамнеи „тежи“ 95 милијарди долари.

Се вели дека иранските мули и ајатоласи собрале огромни милијарди врз основа на нивниот монопол над добротворните организации и верските светилишта, како и контролата врз целата иранска економија, банки, хотели, аптеки и бизниси.

Санофи и ОпенАИ ќе соработуваат за развој на лекови користејќи вештачка интелигенција

 Францускиот фармацевтски гигант Санофи (Sanofi) е подготвен да соработува со развивачот на технологија ОпенАИ (OpenAI) за да изгради софтвер за вештачка интелигенција за забрзан развој на лекови, јави ДПА.

Компаниите ќе соработуваат и со американската фармацевтска групација Формација Био за да ги проучат потенцијалните позитивни ефекти на вештачката интелигенција врз пациентите кои чекаат нови третмани.

Според договорот, компаниите ќе комбинираат податоци, софтвер и модели за да развијат приспособени, прилагодени иновативни решенија за развој на лекови.

Неодамна беше објавено и дека технолошкиот гигант „Епл“ („Apple“) е во завршна фаза на постигнување договор со ОпенАИ за вклучување на неговите функции во претстојниот мобилен оперативен систем - iOS 18. /МИА

притисни ентер