Балкан

Германски медиуми: Трамп назад во Белата куќа - крилја на „реваншистичката“ политика на Србија

Враќањето на Доналд Трамп во Белата куќа би и дало крилја на „реваншистичката“ политика на Србија, пишува Ноје цирхер цајтунг.

Тоа би значело обид за поместување на границите на Балканот и можеби нова војна, оценува весникот, пренесоа белградски медиуми. „Што ако победи Доналд Трамп? А веќе во поднасловот швајцарскиот весник го нуди овој одговор: „Војна на Балканот би била поверојатна отколку што беше долго време“, пренесува Дојче веле.

Авторот на анализата пишува:

„Националистичките сили во Србија се надеваат на втор мандат за Доналд Трамп. „Трамп, Србине!“ - неговите обожаватели поставија плакати во различни градови по неговиот избор во 2017 година. Ричард Гренел, поранешен пратеник на Трамп за Балканот, го поддржува Белград. Власта му се додворува и го опсипува со награди. А Џаред Кушнер, зетот на Трамп, планира да изгради хотелски комплекс во центарот на Белград. Сето ова ја поттикнува желбата да се промени повоениот поредок во регионот создаден од САД во корист на Србија“,пренесе Н1/рс.

Авторот потоа наведува дека „државниот поредок во Западен Балкан е резултат на Пакс Американа“ и дека „САД беа тие што воено ги завршија војните во Босна и Херцеговина и Косово и воведоа нов поредок“.

Сепак, како што се додава, тој поредок создаден со американски интервенции не би бил стабилен без друг актер:

„Во 2003 година, во таканареченото „солунско ветување“, Европската унија им вети на земјите од Западен Балкан дека во иднина сите ќе станат членки на Унијата. Со тоа ветување земјите добија перспектива за просперитет, а националистичките актери со реваншистички планови беа привремено политички маргинализирани“.

„Пакс Американа, плус изгледите за влез во ЕУ, беа формула за стабилност за регионот. Но таа формула денес важи само во ограничена мера“, се наведува во анализата на швајцарскиот весник.

Авторот потоа наведува дека „српскиот ревизионизам почива на две премиси“.

„Геополитички, од средината на 2010-тите, претседателот на Србија, Александар Вучиќ, успешно водеше еден вид „политика на неврзаност“ која намерно се стреми да се надоврзува на југословенскиот модел. (...) Идеолошки, терминот „српски свет“ е во оптек веќе неколку години. Се заснова на етнонационален концепт од 19 век и според него „српското прашање“ треба да се реши со обединување на сите Срби во една земја“, наведува Ноје Цирхер Цајтунг.

Авторот потоа му се враќа на Трамп и наведува дека нема да го наруши кревкиот поредок на Западен Балкан, а тоа е само затоа што тој регион не му е приоритет.

„Во тој поглед, српските надежи и стравови на нивните соседи се претерани“, велат германските медиуми, а пренесува Дојче веле.

Но, се додава, „Трамп ќе ја ослаби трансатлантската оска“, а за Западен Балкан „клучно е дали курсот на Трамп ја зајакнува или ослабува Европската унија како геополитички актер“.

Тоа зависи од внатрешната ситуација во ЕУ, пишува авторот.

„Европските избори можеби дадоа повод за десничарски тенденции, но политичкиот центар го отфрли тој напад. Сепак, постојат поважни односи меѓу земјите-членки и нивната внатрешна организација и во тој поглед изгледите се загрижувачки“, се наведува во анализата, потсетувајќи на успехот на „националистичката национална алијанса“ во Франција и на фактот дека во Германија владејачката коалицијата „може да дејствува само во ограничен обем“.

„Економскиот или политичкиот притисок однадвор ќе доведе до фрагментација на Унијата наместо консолидација“, пишува швајцарскиот весник. „Резултатот може да биде ренационализација на политиката, во комбинација со формирање на коалиции на некои земји. Во однос на односите со Русија, на пример, Австрија, Унгарија, Словачка, а можеби и Бугарија би можеле да го следат својот курс. Ако Националната лига ја преземе власта во Франција, тој курс на смирување веројатно ќе добие поттик од Париз“.

Авторот заклучува дека сето тоа „би отвори простор на Западен Балкан кој би можел да го искористи реваншистичка Србија“. На дневен ред би била реинтеграцијата на северно Косово населено со Срби, како и отцепувањето на Република Српска од Босна и Херцеговина со цел обединување со Србија. Тие цели би биле поддржани од Русија, која на тој начин би можела да го зголеми своето влијание во Европа. Во исто време, немоќта на Европската унија би станала очигледна“.

Затоа, како што се наведува, „мора да се преформулира прашањето дали Трамп го дестабилизира Западен Балкан: дали човекот во Белата куќа ја дестабилизира Европа и со тоа отвора простор за конфликти на Балканот?

„Таа опасност е многу реална со оглед на неизвесната ситуација во ЕУ“, се вели во анализата на швајцарскиот Ноје Цирхер Цајтунг. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Фото: Ријана блесна на карневалот: Ги привлече сите погледи во раскошна комбинација од накит и пердуви

Светската музичка ѕвезда Ријана повторно блесна на карневалот во нејзиниот роден Барбадос, појавувајќи се во спектакуларен костим украсен со скапоцени камења и пердуви.

Креацијата е дело на нејзината долгогодишна соработничка, Лорен Остин. Иако во последно време ретко се појавува на црвениот тепих, 38-годишната пејачка привлече големо внимание на парадата „Гранд Кадумент“ (Grand Kadooment) во Барбадос, со која беше заокружен традиционалниот карипски фестивал „Кроп Овер“ (Crop Over).

Веднаш по нејзиното појавување, социјалните мрежи беа преплавени со видеа и фотографии од пејачката во раскошната креација, која беше специјално изработена за оваа прослава.

Ријана носеше впечатлив костим украсен со накит и реси, кој дополнително ја истакнуваше нејзината фигура.

Според списанието „Вог“, таа се придружи на групата на нејзиниот брат наречена „Аура“, а за нејзиниот изглед се погрижи локалниот дизајнер Лорен Остин.

Посебен впечаток оставија големиот украс за глава со шарени детали и накит, како и раскошната опашка од пердуви што се спушташе сè до земјата.

Лорен Остин, кој уште од 2013 година изработува карневалски костими за пејачката, претходно за „Вог“ изјави дека Ријана има смел и впечатлив моден стил. – Таа не се плаши да носи што сака и кога сака – рече дизајнерот.

Тагови: Ријана

Балкан

Реките во Хрватска на историски ниски нивоа

Хрватска е зафатена од силен топлотен бран кој, во комбинација со долготрајната суша, ги спушти водостоите на реките на историски ниски нивоа и почна да предизвикува проблеми во енергетскиот сектор, пловидбата и водоснабдувањето.

Поради високите температури на реката Сава, Нуклеарната централа „Кршко“ ќе го намали производството на електрична енергија за 20 проценти.

На истокот од земјата, реките Дунав и Драва достигнаа рекордно ниски водостои.

„Хрватски води“ предупредуваат дека реките Орљава кај Пожега и Плитвица кај Вараждин би можеле да пресушат во наредните денови.

Ниските водостои веќе ја попречуваат пловидбата, го запреа фериботскиот сообраќај кај Оборово и предизвикуваат проблеми за рибниците и за делови од системот за водоснабдување во Славонија и Далмација.

ДХМЗ издаде црвено предупредување за екстремни горештини за цела Хрватска за денес и утре, додека метеоролошката служба „Severe Weather Europe“ предвидува дека температурите на истокот од земјата до утре би можеле да достигнат и до 42°C.

Тагови: реки Хрватска

Економија

МФ: Изворните приходи од даноци во Буџетот се реализираат согласно планираното, расходите редовно се сервисираат

Приходите во Буџетот од почетокот на годината се прибираат согласно планот и со раст во споредба со претходната година.

Истовремено и на расходната страна се исплаќаат обврските согласно планираното. Податоците за реализација на Буџетот за 2026 година на заклучно со 31 јули 2026 година покажуваат дека вкупните приходи се реализирани во износ од 204,553 милијарди денари што е 53,9% од планираното и бележат раст од 9,3% во споредба со истиот период претходната година.

Приходите од даноци, како изворни приходи, се реализирани во износ од 117,963 милијарди денари или 55,33% од планот и со раст во споредба со истиот период претходната година од 10%.

Кај даночните приходи најголема реализација согласно планот од 62,8% е евидентирана кај Данокот на добивка од којшто во Буџетот се слеани 16,687 милијарди денари што е раст од 20,6% во споредба со седумте месеци од 2025 година. Реализација од 56,78% од планираното има кај ДДВ со остварени 53,026 милијарди денари или раст од 13,4% во споредба со периодот 01.01.-31.07.2025 година. Од Данок на личен доход се остварени 20,925 милијарди денари или 53,93% од планот и раст во споредба со истиот период лани од 11,9%. Увозните давачки се реализирани во износ од 9,361 милијарди денари што претставува 56,4% од планот и бележат раст од 10,3%.

Истовремено е извршен и поврат на ДДВ кон компаниите во износ од 23,333 милијарди денари што е за 3,5% повеќе од извршениот поврат во периодот јануари-јули 2025 година. Имено податоците за реализацијата на овие изворни приходи упатуваат на одржување на тренд на стабилност и раст во економијата, на што упатуваат и за последните податоци објавени за индустриското производство во јуни кога е забележан раст од 6,5% во споредба со истиот месец минатата година.

На расходната страна значајна реализација има кај капиталните расходи во износ од 21,288 милијарда денари што е раст од 39,6% во споредба со реализацијата на капиталните расходи во првите седум месеци од 2025 година. Исто така, за поддршка на проекти во домашните компании се трансферирани и 717 милиони денари кон Развојната банка.

Исто така, извршена е исплата на 49,351 милијарда денари обврски по основ на стари долгови на странскиот пазар, како и 11,665 милијарди денари отплати кон домашни кредитори. Во овој период се исплатени и обврзници по основ на денационализација во износ од 308 милиони денари.