Контроверзноста избувна откако Абдул Бари Омар, шеф на Администрацијата за храна и лекови предводена од Талибанците, се појави во џамијата во Келн во четвртокот, обраќајќи им се на публиката, главно авганистански иселеници.
Билд пишува дека никој не знае каде е Омар по скандалозното појавување во џамијата и дека не се знае кој му ја одобрил визата за влез во земјата.
Тој наводно ги посетил Холандија, Германија, Белгија и Словачка за време на неговата европска „турнеја“.
Германското Министерство за внатрешни работи го осуди појавувањето на Омар на Х како „целосно неприфатливо“, велејќи дека за членовите на Талибанците нема место во земјата.
Од организаторите, Турско-исламскиот сојуз или ДИТИБ, итно било побарано да разјаснат како се случило тоа.
„Никој не смее да им нуди платформа на радикалните исламисти во Германија. Талибанците се одговорни за масовното кршење на човековите права. Надлежните органи интензивно го истражуваат случајот“, објави Министерството.
ДИТИБ се огради од настанот, велејќи дека изнајмиле простор на Авганистанската културна асоцијација со седиште во Келн за верски собири и не знаеле дека талибански функционер бил поканет.
„Шокирани сме од овој инцидент“, рече ДИТИБ во петокот, инсистирајќи дека од медиумите дознале дека говорникот бил претставник на Талибанците.
„Спротивно на договорот, ова се претвори во политички настан на кој беше поканет непознат говорник“, се вели во соопштението.
Ова беше „еклатантно прекршување на договорот“ и на здружението му е забрането да работи во просториите, се додава.
Во петокот, германското Министерство за надворешни работи соопшти дека нивните официјални досиеја покажуваат дека ниту една од визните канцеларии на земјата не му издала виза на Омар, ниту пак биле известени за неговата посета. Министерството нагласи во соопштението објавено на X дека Германија не ја признава талибанската влада.
„Сѐ додека талибанците во Авганистан јасно ги газат човековите права, особено правата на жените и девојчињата, нема да има нормализација со талибанскиот режим“, додава Министерството.
Главниот портпарол на талибанците, Забихула Муџахид, во петокот го потврди присуството на Омар во Германија, објавувајќи слики од контроверзниот настан во четвртокот.
„Тој ги охрабри авганистанските учесници да се вратат во земјата и да го искористат својот капитал за да придонесат за обновата и развојот на земјата, велејќи им дека безбедноста е вратена во земјата“, напишал Муџахид.
ДИТИБ, наводно, е најголемата сунитска муслиманска организација во Германија и е поврзана со турската влада.
Исто така, холандскиот министер за здравство и спорт се извини во саботата што се сликал со Омар додека двајцата присуствувале на Вториот светски форум за локално производство во Хаг од 6 до 8 ноември.
Ернст Кајперс напиша на X дека се залага за човековите права, особено за правата на жените, и не сака да биде поврзан со, како што тој го осуди, „страшниот“ талибански режим.
„Не знаев кој е тој човек во тоа време. Ова беше грешка и не требаше да се случи, и жалам за тоа. Истражуваме како ова лице беше присутно на оваа конференција“, рече тој.
Талибанците ја вратија власта во август 2021 година, кога западните трупи предводени од САД хаотично се повлекоа по речиси две децении учество во војната во Авганистан.
Ниту една странска земја не го призна талибанскиот режим, главно поради тоа што им забранува на жените да се школуваат по шесто одделение во Авганистан и им забранува на жените да работат на повеќето работни места во јавниот и приватниот сектор, вклучително и во канцелариите на Обединетите нации.