Меган Маркл, војвотката од Сасекс, утрово за првпат се појави во јавноста со својот сопруг, принцот Хари, откако нејзиниот татко Томас Маркл беше уапсен.

Светските медиуми повторно будно го следат секој чекор на Меган Маркл, иако овој пат причината не се нови бизниси или изјави што често ја поларизираат јавноста.

Војвотката од Сасекс утрово за првпат се појави во јавноста откако нејзиниот татко се најде во центарот на скандал поради сериозни обвинувања.

Иако планираше да одржи говор заедно со својот сопруг во Европскиот парламент во Брисел, во последен момент таа одлучи да се откаже од обраќањето.

Според британските медиуми, Меган Маркл (45) „не се чувствува доволно силна за јавен настап“, а најверојатната причина се актуелните обвинувања против нејзиниот татко.

Сепак, таа одлучи да отпатува со својот сопруг во Брисел и да биде покрај него за време на еден важен настан посветен на безбедноста на најмладите на интернет.

Томас Маркл (82) беше уапсен на Флорида на 6 ноември, под обвинение за поседување материјали што прикажуваат сексуална злоупотреба на деца. Неговата ќерка кратко изјавила дека е длабоко потресена од овие сознанија и потсетила дека нивниот однос драстично се влошил уште пред нејзината венчавка со Хари во 2018 година.

Според нејзини претходни изјави, таа со години знаела вознемирувачки информации за својот татко, па затоа одлучила да му оневозможи контакт со семејството, со цел да ги заштити Арчи и Лилибет.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Градоначалникот на Град Скопје, Орце Ѓорѓиевски, заедно со шефот на Мисијата на ОБСЕ во Скопје, Килијан Вал, денеска им оддадоа заслужено признание на професорите кои со својата посветеност, знаење и ентузијазам ги поврзуваат младите преку заедничките наставни часови.

- Позади секој час стојат труд, трпение и искрена верба дека секое дете заслужува да биде прифатено, почитувано и охрабрено да го покаже најдоброто од себе. Токму професорите создаваат простор во кој учениците учат заедно, градат пријателства и откриваат дека различностите се богатство што нѐ зближува. Посебна благодарност упатувам до професорите и училишните тимови од сите осум средни училишта: „Браќа Миладиновци“, „Здравко Цветковски“, „Боро Петрушевски“, „Цветан Димов“, „Д-р Панче Караѓозов“, „Арсени Јовков“, „Димитар Влахов“ и гимназијата „Јосип Броз Тито“. Вашата професионалност, истрајност и секојдневна посветеност се срцето на оваа иницијатива и причината таа да трае и да создава резултати – изјави Ѓорѓиевски.

Од 2018 година, деветта година по ред, Град Скопје континуирано го поддржува овој модел во сите осум средни училишта во градска надлежност во кои наставата се одвива на различни наставни јазици.

- Горди сме што сме единствената локална самоуправа во државата со ваков континуитет, но уште повеќе сме свесни за одговорноста да продолжиме да го унапредуваме. Заеднички создаваме образовни можности што оставаат трајна вредност за младите и за целиот град. На професорите им честитам за заслужените признанија. Град Скопје ќе продолжи да стои зад вашиот труд и зад секоја иницијатива што гради доверба, почитување и заедништво. Иднината на Скопје расте во нашите училници. Наша обврска е секое дете во нив да го најде своето место и својата можност за успех – рече Ѓорѓиевски.

Градоначалникот Ѓорѓиевски изрази благодарност и до Мисијата на ОБСЕ во Скопје за долгогодишното партнерство, стручната помош, обуките и поддршката за нашите професори и училишта.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.