Одлуката на новоизбраниот американски претседател Доналд Трамп да го именува Роберт Ф. Кенеди Помладиот за американски секретар за здравство и човекови услуги предизвика широки критики кон Кенеди, познат антивакцинален активист кој поддржува бројни дискредитирани теории за здравјето, пишува Гардијан.

Во синоќешната објава на Truth Social, Трамп тврдеше дека Американците биле „потиснати од индустрискиот комплекс на храна и фармацевтските компании“ и дека Кенеди „ќе ги врати овие агенции на традициите на златниот стандард на научни истражувања и транспарентност, за да стави крај на епидемијата на хронични болести и да ја направи Америка голема и здрава повторно!“

Во одговор на номинацијата на Кенеди, организацијата Public Citizen, прогресивна непрофитна организација фокусирана на заштита на потрошувачите, рече: „Роберт Ф. Кенеди Помладиот е јасна и присутна закана за здравјето на нацијата. Не треба да му биде дозволено дури ни да влезе во зградата на Одделот за здравство и човекови услуги (HHS), а камоли да биде поставен на чело на националната агенција за јавно здравје“.

„Неуспешното справување на Доналд Трамп со јавната здравствена политика за време на пандемијата од Ковид чинеше стотици илјади животи. Со назначување на Кенеди за секретар на HHS, Трамп ја носи нацијата во нова, политика-управувана здравствена катастрофа,“ додаде организацијата.

Апу Акад, специјалист за заразни болести на Универзитетот на Јужна Калифорнија, ја нарече најавата „страшен ден за јавното здравје“. - Јас ова го повторувам, но ќе биде од огромно значење одлуките за јавно здравје или промените да се прават исклучиво врз основа на робусни докази. Се надевам дека барем толку научивме од Ковид,“ додаде Акад на социјалната мрежа Икс.

Конзервативниот аналитичар и адвокат Џорџ Конвеј, исто така, коментираше за номинацијата на Кенеди, како и за номинациите на Тулси Габард и Мет Гец. „Малку од она што Трамп го прави денес ме изненадува. Секоја од последните три номинации за ниво на Кабинетот (Габард за директор на националната разузнавачка служба, Гец за главен обвинител, Кенеди за HHS) сама по себе можеби би била најлоша во американската историја. Фактот дека Трамп ги направи сите три за околу 24 часа е вџашувачки,“ напиша Конвеј.

Демократскиот претставник од Калифорнија Роберт Гарсија ја нарече номинацијата „целосно лудило“, пишувајќи на X: „Тој ги негира вакцините и е теоретичар на заговори. Тој ќе го уништи нашиот јавен здравствен систем и нашите системи за дистрибуција на вакцини. Ова ќе чини животи“.

Аластер МекАлпин, педијатар во детската болница во Британска Колумбија, напиша: „Тешко е да се прецени колку е ужасна оваа одлука. Кенеди нема медицинска обука. Тој е тврдокорен антивакцинален активист и дистрибутер на дезинформации. Последниот пат кога се вмеша во здравствените прашања на една држава (Самоа), 83 деца починаа од мали сипаници“.

Според FactCheck.org, во 2018 година, две бебиња во Самоа починале откако медицинските сестри по грешка подготвиле ММР (морбили, заушки и рубеола) вакцина со истечен релаксант на мускулите наместо со вода. По смртта на бебињата, владата на Самоа привремено ја суспендираше програмота за вакцинација. Привремената суспензија го поттикна Кенеди и неговата антивакцинална организација Children’s Health Defense да шират различни невистини за вакцините на островот, што доведе до драстичен пад во стапката на вакцинација. Година подоцна, на островот избувна епидемија на морбили предизвикана од заразен патник, која зарази повеќе од 57.000 луѓе и уби 83, меѓу кои и деца. Во интервју за документарниот филм Shot in the Arm, Кенеди изјави дека не сноси одговорност за исходот.

Во однос на друго здравствено прашање, Кенеди изјави дека Трамп ќе се залага за отстранување на флуоридот од водата за пиење, минерал кој ги зајакнува забите и ги намалува кариесите, според Центрите за контрола и превенција на болести.

Во текот на својата независна кампања, Кенеди исто така ја промовираше ефективноста на необработеното млеко и ивермектинот, анти-паразитски лек кој е докажано неефикасен како лек за Ковид.

Покрај здравствените заговори, Кенеди призна дека отсекол глава на кит на плажа и ја собрал како трофеј, и дека фрлил мртво мало мече во Централниот парк на Њујорк пред една деценија затоа што немал време да му ја одере кожата и да го подготви за храна подоцна.

Кенеди исто така изјави дека имал црв во мозокот кој „изел дел од него и потоа умрел“ и се заколна дека „ќе изеде уште пет црви во мозокот и ќе ги победи“ Трамп и Џо Бајден на симулиран дебатен натпревар порано оваа година.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.