Признанието Најдобар спортист на Кочани за 2022 година го доби капитенот на ГФК „Осогово“, Тоше Манов, кој во есенскиот дел од првенството на третата фудбалска лига беше најдобар голгетер и е меѓу најзаслужните за лидерската позиција на својот тим.
Изборот на најдобрите спортисти го организираше Општина Кочани, а плакетата на Манов му ја додели градоначалникот Љупчо Папазов.
- Ова признание за мене е дополнителна мотивација да продолжам со добрите настапи во „Осогово“, и понатаму да ги радуваме љубителите на фудбалот и да го вратиме клубот во повисок ранг на натпреварување, каде што му е местото. Очекуваме во претстојната пролетна сезона да прикажеме уште подобра игра, да го задржиме првото место на табелата и да го вратиме „Осогово“ во Втората лига, истакна Манов.
Во изборот на најдобар спортист за минатата година признанија добија и каратистот Филип Стојанов, шахистката Јована Давиткова, гимнастичарот Мартин Андонов, каратистката Наталија Карова и фудбалерката Симона Веселинова.
За спортска личност на годината е избран фудбалерот Јован Манев, поранешен член на ГФК „Осогово“, кој имаше трансфер во турскиот фудбалски клуб „Адана спорт“, а наградата за најдобра спортска екипа му припадна на пингпонгарскиот клуб „Кочани“.
Најдобар тренер е Оливер Јовановски од ЖФК „Кочани“, а Бранко Богатинов од ГФК „Осогово“ го доби признанието за спортски работник. Плакета за придонес во спортот доби и Здружението на граѓани „Никола Мантов“ кое во изминатиот период повеќепати обезбедуваше спортска опрема за фудбалерите и помогна во уредувањето и опремувањето на просторија за кондициски подготовки во рамки на стадионот во Кочани.
Во категоријата Млади надежни спортисти на Кочани за 2022 година, без рангирање, признанија добија сите 14 предложени кандидати.