Француската десница ја одбива поканата на Лекорну – условите на премиерот ја продлабочуваат кризата - Канал 5

Свет

Француската десница ја одбива поканата на Лекорну – условите на премиерот ја продлабочуваат кризата

 Министрот за внатрешни работи на Франција во оставка, Брено Ротојо, кој е лидер на конзервативната десница „Републиканците“, изјави дека нема да учествува во новата влада на Себастијан Лекорну, јавува весникот „20 минути“.

Француската десница ја одбива поканата на Лекорну – условите на премиерот ја продлабочуваат кризата

Ротојо, како и претседателот на францускиот Сенат Жерар Ларше, исто така член на „Републиканците“, сметаат дека нивната партија воопшто не треба да биде дел од новата влада. Прашањето било разгледано на денешната средба на пратеничката група на партијата.

– Според мене, не треба да учествуваме во оваа влада, нагласи Ротојо, мислејќи и на свое лично отсуство од кабинетот.

Ларше предупреди дека социјалистите ќе се обидат да го уценуваат Лекорну да се откаже од сите досегашни реформи во замена за нивна поддршка при евентуален предлог за недоверба во Парламентот. „Во такви услови, ‘Републиканците’ не треба да бидат дел од кабинетот“, рекол Ларше.

И пратеникот Франсоа-Ксавие Белами изјави дека евентуално вклучување на „Републиканците“ во владата би било „негирање на нивните принципи“.

Себастијан Лекорну беше повторно номиниран од претседателот Емануел Макрон да формира влада, помалку од една недела по поднесената оставка. Оставката следуваше еден ден по објавата на составот на неговиот претходен кабинет, што предизвика незадоволство кај „Републиканците“, кои очекуваа една третина од министерските места, но добија значително помалку.

Ротојо предложил неколку кандидати од својата партија за местото министер за вооружени сили – позиција што се испразни откако Лекорну беше назначен за премиер. Сепак, Лекорну ја изненадил десницата назначувајќи го поранешниот министер за финансии Брено Ле Мер, кого многумина го обвинуваат за државниот дефицит. Ле Мер претходно изјави дека не сака да се враќа во политиката и го критикуваше Макрон што го распушти парламентот, што, според него, ја доведе Франција во политичка парализа.

По објавата на составот на таа влада, Ротојо објави порака на мрежата „Икс“, во која напиша дека составот на кабинетот „не ја одразува најавената дистанца од минатото“. Се смета дека токму оваа реакција го поттикнала Лекорну да поднесе оставка, објаснувајќи дека некои партнери од коалицијата се воделе од „лични амбиции“ – алудирајќи на Ротојо, за кого се шпекулира дека ќе се кандидира на претседателските избори во 2027 година.

По неговата оставка, Макрон му довери на Лекорну да одржи консултации со политичките партии, а два дена подоцна повторно го номинира за премиер.

Според „Фигаро“, Лекорну поставил услов дека во неговата нова влада нема да има лица кои планираат претседателска кандидатура, со што ги исклучил Жералд Дарманен, Брено Ротојо и Едуар Филип, лидерот на центристичката партија „Хоризонти“.

Тагови: Лекорну

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Бензините поскапи за 1,5 , дизелот за 3,5 денари

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши зголемување на малопродажните цени на нафтените деривати во просек за 2,62%

Бензините поскапи за 1,5 , дизелот за 3,5 денари

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши зголемување на малопродажните цени на нафтените деривати во просек за 2,62% во однос на одлуката од 17.8.2026 година.

Референтните цени на нафтените деривати на светскиот пазар во споредба со претходната пресметка бележат зголемување и тоа во просек: кај бензините за 3,795%, кај дизелот за 4,842%, кај екстра лесното масло за 3,958% и кај мазутот зголемувањето е за 6,467%.

Курсот на денарот во однос на доларот во изминатиот период по кој беа формирани цените со претходната пресметка е понизок за 0,5340%.

Од 25.8.2026 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС - 95 93,00 (денари/литар)

Моторен бензин ЕУРОСУПЕР БС - 98 95,00 (денари/литар)

Дизел гориво ЕУРОДИЗЕЛ БС (Д-Е V) 101,50 (денари/литар)

Масло за горење Екстра лесно 1 (ЕЛ-1) 100,50 (денари/литар)

Мазут М-1 НС 45,576 (денари/килограм)

Малопродажните цени на бензините ЕУРОСУПЕР БС-95 и ЕУРОСУПЕР БС-98 се зголемуваат за 1,50 ден/лит.

Малопродажната цена на ЕУРОДИЗЕЛ (Д-Е V) се зголемува за 3,50 ден/лит.

Малопродажната цена на Екстра лесното масло за домаќинство (ЕЛ-1) се зголемува за 2,00 ден/лит.

Малопродажната цена на Мазутот М-1 НС се зголемува за 1,850 ден/кг. и сега ќе изнесува 45,576 ден/кг.

Напоменуваме дека ова се максималните цени на нафтените деривати од 00:01 часот на 25.8.2026 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Министерството за јавна администрација ја започна оперативната фаза за воспоставување на Академијата за обука и стручно усовршување на јавните службеници

„Академијата не е само институционална новина. Таа е инвестиција во квалитетот, интегритетот и ефикасноста на јавната администрација, а со тоа и во довербата на граѓаните во институциите.“ 

Министерството за јавна администрација ја започна оперативната фаза за воспоставување на Академијата за обука и стручно усовршување на јавните службеници

„Академијата не е само институционална новина. Таа е инвестиција во квалитетот, интегритетот и ефикасноста на јавната администрација, а со тоа и во довербата на граѓаните во институциите.“ Со овие зборови министерот за јавна администрација, Горан Минчев, ја отвори првата работна сесија со тимот кој ќе биде дел од Академијата за обука и стручно усовршување на јавните службеници, која треба да започне со работа на полетокот од 2027 година.

Во изминатиот период беа поставени основите за формирање на Академијата, беше спроведена анализа на постојната состојба и потребите, а во наредниот период следува дефинирањето на организацискиот модел, клучните функции и оперативната поставеност на новата организациска единица во рамките на Министерството за јавна администрација.

Во рамките на дводневната работна сесија тимот ќе работи на подготовка на клучните документи за воспоставување на Академијата, како и на преточување на стратешката рамка и четирифазниот патоказ на реформата во конкретен, реалистичен и временски дефиниран акциски план. Овие документи ќе ја постават основата за започнување на оперативната фаза и функционирањето на Академијата во состав на Министерството за јавна администрација.

„Работата во овие два дена бара од секого од нас конкретност и посветеност. Не бараме уште еден документ на хартија, бараме јасен, реалистичен и спроведлив акциски план, со прецизно распределени одговорности, идентификувани ризици и временска рамка на која можеме да се потпреме. Тоа е она што ќе го означи вистинскиот почеток на оперативната фаза на Академијата“ истакна министерот Минчев.

Работната сесија се реализира во соработка со Регионалното училиште за јавна администрација – РеСПА. Преку менторската поддршка, регионалната експертиза и споделените искуства и практики од земјите во регионот, Министерството за јавна администрација добива значајна поддршка во процесот на градење на одржлив и функционален институционален модел на Академијата.

Воспоставувањето на Академијата претставува важен чекор во создавањето современа, професионална и ефикасна јавна администрација, во која континуираното учење, развојот на компетенции и стручното усовршување ќе бидат составен дел од професионалниот развој на јавните службеници.

Министерството за јавна администрација продолжува посветено да работи на реформите кои значат поквалитетна администрација, подобри услуги за граѓаните и создавање услови во кои јавните службеници ќе имаат можност континуирано да ги развиваат своите знаења и професионални компетенции.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Се урна борбен авион во Унгарија, пилотот се катапултирал

Борбен авион „Грипен“ на Унгарските вооружени сили се урна во близина на Солнок доцна претпладнево, а пилотот успеа безбедно да се катапултира. Информацијата ја потврди премиерот Петер Маѓар, пренесува „Еуроњуз“. 

Се урна борбен авион во Унгарија, пилотот се катапултирал

Премиерот на својот профил на мрежата „Икс“ (X) напиша: „Од засега непознати причини, пред неколку минути во близина на Солнок се урна борбен авион 'Грипен' на Унгарските одбранбени сили. Пилотот успешно се катапултираше. Во тек е истрага, а министерот за одбрана е на пат кон местото на несреќата“.

Министерот за одбрана Ромулус Русин-Сенди подоцна извести дека пилотот е пренесен во болница и дека нема други повредени. Според него, пилотот направил сè што е во негова моќ за да обезбеди авионот да падне на воен терен.

Во близина на Солнок се наоѓа и унгарска воена воздухопловна база. Унгарската флота на авиони „Грипен“ Унгарските вооружени сили располагаат со вкупно 14 борбени авиони „Грипен“. Сите тие се стационирани во воздухопловната база Кечкемет и редовно учествуваат во меѓународни операции.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер