Бројката на исчезнати во најсмртоносниот пожар во Калифорнија се искачи на 1276 лица. Властите утврдиле каде се наоѓаат неколку стотици луѓе кои ги напуштиле своите домови кога огнената стихија го зафатила северниот дел на градот Парадајс.
Тимовите од форензичари кои ги пребаруваат рушевините, пронашле остатоци од уште пет загинати, со што бројката на загинати се искачила до 76, од нив 63 се идентификувани, сега се очекува потврда на ДНК анализата, пренесува Ројтерс.
Сега спасот го најавува националната метеоролошка служба, според која од вторник до петок се опчекуваат обилни врнежи од дожд, се очекува да паднат 10 сантиметри дожд во подножјето на планинскиот венец Сиера, вклучувајќи го и запалениот Парадајс.
Се очекува дожд и во Сан Франциско што многу ќе помогне во расчистувањето на воздухот од нездравото ниво на дим, иако пожарот беше оддалечен од овој град цели 280 километри.
Власта очекува дека дождот ќе им помогне многу на спасувачите и пожарникарите, но и предупредува дека може да се формираат опасни свлечишта во овие реони, во кои е изгорена целата вегетација.