Фон дер Лајен: Мора да ставиме крај на бизнис моделот на шверцување мигранти - Канал 5

Европа

Фон дер Лајен: Мора да ставиме крај на бизнис моделот на шверцување мигранти

Водечкиот принцип во Европската Унија е дека ние Европејците одлучуваме за тоа кој доаѓа во Европа, кој ги преминува нашите граници и под кои околности, а не шверцерите и трговците со луѓе.

Фон дер Лајен: Мора да ставиме крај на бизнис моделот на шверцување мигранти

Водечкиот принцип во Европската Унија е дека ние Европејците одлучуваме за тоа кој доаѓа во Европа, кој ги преминува нашите граници и под кои околности, а не шверцерите и трговците со луѓе, порача денеска претседателката на Европската комисија, Урсула фон дер Лајен во обраќањето на Меѓународната конференција на Глобалната алијанса за борба против шверцот со мигранти во Брисел, на која учествува и македонскиот министер за внатрешни работи Панче Тошковски.

- Пред две години, ветивме дека ќе изградиме Глобална алијанса за борба против шверцот со мигранти. Тоа е духот што нè доведе денес овде, рече Фон дер Лајен.

Според неа, како резултат на мерките преземени против мрежите на шверцерите на луѓе, од почетокот на годината во ЕУ е забележано намалување на приливот на мигранти за 26 отсто, по ланскиот пад од 37 проценти.

- Но, разоткривањето на мрежите останува исклучително предизвикувачко. Не е доволно да се таргетира само една алка во синџирот на шверцување. Мора да се бориме против целата мрежа. Затоа, на оваа Конференција, ја подигнуваме нашата Глобална алијанса на следно ниво. Денеска поддржуваме заедничка Декларација, план за ставање крај на бизнис моделот на шверцување мигранти низ целиот свет, рече Фон дер Лајен.

Таа посочи дека тој план се базира на три принципи – пресекување на мигрантските рути, мерки за спротивставување на шверцерскиот бизнис модел и укажување на потенцијалните жртви на шверцот дека секогаш постојат побезбедни алтернативи.

- Нашата цел е да го спречиме илегалниот превоз што го нудат шверцерите. Секое спречено шверцување е потенцијално спасен живот. Превенцијата е витален дел од сеопфатните партнерства што ги градиме. Јадрото на овие партнерства е да се привлечат инвестиции и да се изградат локални работни места, така што многу повеќе луѓе ќе имаат можности дома. Но, додека го правиме тоа, инвестираме и повеќе во управувањето со миграцијата, граничната контрола и борбата против шверцот, рече Фон дер Лајен.

Како зајакнат одговор на шверцот на мигранти, Фон дер Лајен најави дополнителни средства и персонал на Фронтекс, со тројно зголемување на неговите гранични сили на 30.000 службеници, бидејќи како што рече, безбедните граници се од витално значење за праведно и безбедно управување со миграцијата.

Според неа, потребни се повеќе заеднички акции на земјите членки вклучени во Глобалната алијанса за разбивање и банкротирање на мрежите на шверцерските банди.

- Мора да го подобриме и следењето на парите до бандите. Така ги лоцираме шверцерите, ги прекинуваме нивните финансиски текови и ги запленуваме нивните нелегално стекнати добивки … Затоа Европа развива строг нов режим на санкции против шверцерите – во координација со нашите партнери од Г7. Сакаме да можеме да ги замрзнеме средствата на шверцерите, за да ја уништиме нивната финансиска база, рече Фон дер Лајен.

Таа потенцира дека шверцерите на луѓе сè почесто ги напуштаат традиционалните начини на превоз на мигранти со чамци или камиони и наместо тоа сè повеќе го користи комерцијален транспорт.

- Затоа мора тесно да соработуваме со транспортните компании на клучните рути. Благодарение на нашата иницијатива, меѓународниот регулатор за авиокомпании ИЦАО сега ќе ги засили своите напори за спречување на шверцувањето мигранти и илегалната миграција. Операторите за воздушен транспорт и аеродромите ќе соработуваат многу потесно со органите за спроведување на законот за да ги спречат илегалните текови и да им помогнат на луѓето во неволја, додаде Фон дер Лајен.

Таа посочи дека кога луѓето илегално ги преминуваат границите, не само што го ризикуваат својот живот, туку многу често стануваат и жртви на трудова експлоатација и модерно ропство, па затоа Глобалната Алијанса мора да направи повеќе за да се бори против ваквите појави.

- Сите имаме заедничка цел: Да ги потиснеме шверцерите од бизнисот и да ги спасиме животите на илјадници луѓе кои сонуваат за подобар живот. Имаме долг пат пред нас, но нашата Алијанса расте. Затоа, од денеска, Алијансата се префрла на поформална структура, со постојан Секретаријат и финансирање, со цел подобро да одговара на нашите растечки амбиции. Ќе ги продлабочиме нашите врски со организации со слични размислувања, како што се Г7, Советот на Европа и агенциите на ОН. Ги повикувам и другите земји и организации кои ја делат нашата посветеност да се приклучат на нашите напори и да ја поддржат Декларацијата, додаде Фон дер Лајен.

Тагови: Фон дер Лајен

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ВМРО-ДПМНЕ: Реакција на прес-конференција на СДСМ

Добро е што Кузеска дава признание што од брусење шахти и казни на тие кои не употребуваат Северна, стигнавме денес и европските челници да употребуваат македонски идентитет и култура

ВМРО-ДПМНЕ: Реакција на прес-конференција на СДСМ

Прес-конференцијата на Богданка Кузеска каде посочува дека Урсула фон дер Лајен употребува македонски јазик, култура и идентитет, со оглед на фактот што доаѓа од партијата позната по тоа што кога беше на власт ги брусеше капаците од шахтите зошто имале сонце, ја разбираме единствено како големо признание на оваа Влада која од состојба каде Заев како премиер ги корегираше и казнуваше сите кои не употребуваат Северна дојдовме до ситуација европските челници да ја прифатат придавката македонски и да се јакне македонскиот идентитет.

ВМРО-ДПМНЕ

Тагови: ВМРО-ДПМНЕ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Делегација на МЕРМС во Женева

58% од инсталираниот капацитет е од обновливи извори – следен чекор модерна мрежа и складирање.

Делегација на МЕРМС во Женева

Делегација од Министерството за енергетика, рударство и минерални суровини учествуваше на UNECE Sustainable Energy Week која се одржа во Палатата на нациите во Женева, со фокус на прашањата поврзани со енергетската транзиција, енергетската безбедност, достапноста на енергијата и одржливиот развој.

Во рамки на настанот се одржаа состаноци на Групата експерти за енергетска ефикасност (GEEE), Групата експерти за почисти електроенергетски системи (GECES) и Групата експерти за обновлива енергија (GERE), како и 35-тата сесија на Комитетот за одржлива енергија на UNECE (CSE).

Во рамки на 13-тата сесија на Групата експерти за обновлива енергија (GERE-13), на панел-дискусијата Exchange of experiences on how to increase the uptake of renewable energy, Марко Минов од Секторот за обновливи извори на енергија, го претстави напредокот во спроведувањето на регулаторната рамка од Законот за енергетика и новиот Закон за користење на енергијата од обновливи извори, со кои се унапредува интеграцијата на енергетскиот пазар и се создаваат предвидливи услови за развој и инвестиции во обновливите извори.

Како клучни реформи беа опфатени прекуграничната распределба на капацитети, балансирањето, оперативната сигурност, гаранциите за потекло, активните потрошувачи, енергетските заедници и конкурентните механизми за поддршка на производството од обновливи извори на енергија.

Во излагањето, Минов го истакна и значителниот раст на капацитетите од обновливи извори на енергија во Македонија, особено на фотонапонските електроцентрали, а ги претстави и Годишните планови за изградба на енергетски објекти како инструмент за предвидлив и координиран развој на енергетскиот сектор и систематско планирање на нови производни капацитети и системи за складирање на енергија.

Во рамки на дискусијата, меѓу другото беше нагласено и дека: „зголемувањето на капацитетите од обновливи извори е само дел од енергетската транзиција. Следниот предизвик е електроенергетскиот систем да стане пофлексибилен, поотпорен и способен да интегрира сè поголеми количини на варијабилни обновливи извори. Интеграцијата на нови капацитети од обновливи извори, модернизацијата на мрежна инфраструктура, пазарните механизми и складирањето на енергија ќе биде важен дел од идниот развој на енергетскиот систем“.

Во рамки на 35 сесија на Комитетот за одржлива енергија (CSE-35) на тема Strengthening Energy Security, Affordability and Sustainability in an Uncertain World, меѓу другото беше одржана и дискусија на високо ниво, посветена на приоритетите, предизвиците и можностите за зајакнување на енергетската безбедност, достапноста и одржливоста.

Во рамки на сесијата, Елена Ивановска, кабинетски службеник задолжен за следење на стратешките приоритети на Владата, која воедно претседаваше и со сесијата System-wide Solutions to Strengthen Energy Security, Affordability and Sustainability, се обрати во име на Македонија, претставувајќи ги приоритетите на земјата и конкретните активности за унапредување на сигурноста, достапноста и одржливоста на енергетскиот систем.

Во своето обраќање, Ивановска истакна дека за Македонија, трите цели (енергетската сигурност, достапноста и одржливоста) се тесно поврзани и дека забрзувањето на развојот на обновливите извори, намалувањето на зависноста од увоз на електрична енергија и обезбедувањето сигурно снабдување бараат модерна, отпорна и регионално поврзана електроенергетска мрежа.

Посебен акцент беше ставен на потребата развојот на мрежната инфраструктура да го следи брзиот раст на обновливите извори. Во таа насока, беше посочено дека Македонија од 2021 година, кога обновливите извори сочинувале околу 38% од инсталираниот производен капацитет, до 2025 година достигнала учество од околу 58%, со повеќе од 1.750 MW инсталирани капацитети од обновливи извори.

Брзиот развој на сончевата енергија носи и нови барања за преносниот систем, особено поради децентрализираното варијабилно производство, двонасочните текови на електрична енергија и потребата од балансирање на системот.

Ивановска посочи и на потребата од значителни инвестиции во преносната мрежа, унапредување на регионалната соработка и развој на механизми за флексибилност, батериски системи за складирање енергија и управување со потрошувачката.

Учеството на претставниците од Министерството: Елена Ивановска, Билјана Матевска, Марко Минов, Сара Кочева, Ангела Алексова, Ненад Стојковски и Љубица Трајковска Лешоска претставуваше можност за размена на искуства со земјите членки на UNECE, претставници на меѓународни организации и експерти од областа на енергетиката, особено во делот на забрзувањето на енергетската транзиција и создавањето пофлексибилни, сигурни и одржливи енергетски системи, но и можност за претставување на реформите и искуствата на нашата земја.

Државата останува посветена на сигурна, достапна и одржлива енергетска транзиција, со фокус на понатамошно зголемување на производството од обновливи извори, модернизација и проширување на мрежната инфраструктура, развој на складирањето на енергија, унапредување на пазарната интеграција и создавање предвидлива регулаторна рамка за нови инвестиции.

Пораката од Женева е јасна: амбициозниот развој на обновливите извори мора да биде проследен со инвестиции во мрежата, флексибилност, складирање, регионална поврзаност и институционален капацитет.

Само преку интегриран пристап може да се изгради енергетски систем кој истовремено ќе биде сигурен, отпорен и одржлив.

Со почит,

Министерство за енергетика, рударство и минерални суровини

Тагови: МЕРМС

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Лишени од слобода се 12 возачи поради сторено кривично дело „безобѕирно управување возило“

Во текот на изминатото деноноќие, на различни локации во државата, лишени од слобода се 12 возачи поради сторено кривично дело „безобѕирно управување возило“.

Лишени од слобода се 12 возачи поради сторено кривично дело „безобѕирно управување возило“

Од нив, осуммина управувале возило без положен возачки испит и тоа: М.Љ.(40), А.Ш.(22) и Ј.Б.(30) сите од Скопје, И.Р.(24) од с.Света Петка, скопско, А.Р.(23) од с.Беловиште, гостиварско, С.А.(35) од с.Мелница, велешко и Н.М.(28) од с.Зрновци, кочанско и 17-годишник од село во Општина Градско.

Под дејство на алкохол управувале две лица и тоа: Н.П.(29) од Куманово и М.Н.(19) од Скопје. Додека пак, со забрана за управување со моторно возило управувале С.Н. (37) од Кичево и Р.Х.(37) од с.Рашче, скопско.

По целосно документирање на случаите, ќе бидат поднесени соодветни кривични пријави.

Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит или доколку имаат изречена мерка за забрана за управување или доколку се под дејство на алкохол и сите заеднички да придонесеме за побезбеден сообраќај.

Тагови: безобѕирно управување

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер