Фолк-фест Валандово на 24-ти и 25 мај, ќе се натпреваруваат 19 песни - Канал 5

Фолк-фест Валандово на 24-ти и 25 мај, ќе се натпреваруваат 19 песни

 На 24-ти и 25 мај ќе се одржува 33-тиот фестивал на народна музика Фолк-фест Валандово кој по две години одржување наесен повторно се враќа во пролетен термин. 

Фолк-фест Валандово на 24-ти и 25 мај, ќе се натпреваруваат 19 песни

Првата вечер ќе биде ревијална и ќе им биде укажана чест на тројца автори кои се најизведувани на валандовскиот фестивал - Григор Копров, Миле Барбаровски и Љупчо Трајковски-Фис. Тие ќе бидат претставени со по четири нивни композиции. Втората вечер е натпреварувачка и ќе бидат изведени 19 песни. Ќе настапи оркестар со едуцирани музичари од ФМУ, кои сега се членови на оркестрите во МОБ и Филхармонија.

Претседателот на Уметничкиот совет на фестивалот Живоин Глишиќ на прес-конференција рече дека пристигнале над 90 композиции и дека за краток период Советот ги избрал 19-те што ќе учествуваат.

- Уметничкиот совет избра 19 композиции. Аранжерите ги направија аранжманите. Во завршна фаза е снимањето на материјалот и сме задоволни од она што досега е подготвено. Очекуваме, за разлика од лани, пред фестивалот да биде издаден и компакт-диск од фестивалот, рече Глишиќ.

Новини има во начинот на гласање, така што во одлуката за наградите со 60 проценти ќе учествува жирито, а 40 отсто публиката. Овојпат се враќа и учеството на публиката во наградување на композициите. Износите на наградите се драстично намалени од претходно зашто, како што рече Глишиќ, тие треба да бидат и оптимални и почит кон авторите. Првата награда ќе биде 1.500 евра, втората 1.000 евра и третата 750 евра. Жирито ќе има седум члена, а се исфрла телевоутингот како начин на гласање. Во периодот на гласање мал концерт ќе има босанската фолк-пејачка Ханка Палдум со нејзиниот оркестар.

Министерот за култура Роберт Алаѓозовски рече дека оваа манифестација во нејзините најдобри времиња презентирала песни кои потоа станале толку популарни што многумина веќе не ги доживуваат како авторски, туку како народни песни. Рече дека сакаат да го вратат тој квалитет на фестивалот и дека ќе имаат спротивен пристап од тоа што на фестивалите се случувало изминатите неколку години.

- Се плаќаа по 20.000 или 10.000 евра за прво место, суми што предизвикаа многу клиентелизам, коруптивно однесување, во некои случаи јавноста со денови се занимаваше и со наводи за обиди за измама на гласања на телевоутинг и слично. Спротивно на тоа, ние ќе се фокусираме на подигање на целокупниот квалитет на манифестацијата, вреднување на нашите истакнати автори кои одлично соработуваат со врвните изведувачи, и негување на оние белези на нашата народна музика, по која сме препознатливи во целиот свет, истакна Алаѓозовски.

Цветанка Ласкова, која неколкупати има учествувано на овој фестивал, во својство на советник за култура на премиерот Зоран Заев, рече дека сакаат да претстават фестивал во ново руво од кој ќе произлезат песни што ќе се слушаат во иднина.

- Мојата заложба отсекогаш била вистинските вредности во културата да си го заземат своето место. Тоа е заложба и на оваа Влада. Емотивно сум врзана со Фолк-фест Валандово и многу добро ги знам чувствата на учесниците и на публиката. Сакаме да им го вратиме тоа чувство на граѓаните зашто и ден-денес си ги потпевнуваме рефрените од „Бисер балкански“, „Една песна“ - композиции кои останаа да живеат. Се надевам дека и од овој фестивал ќе останат рефрени што ќе ги пеат идните генерации, рече Ласкова.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Едношалтерска контрола на граничниот премин „Ќафасан“ - стартуваше системот „one stop shop“

Крај за двојните запирања на границата со Албанија. Од денеска на преминот Ќафасан кај струга стартува системот „Оne stop shop“, со кој патниците ќе поминуваат само една заедничка гранична контрола, наместо да запираат на двете страни од границата..

Едношалтерска контрола на граничниот премин „Ќафасан“ - стартуваше системот „one stop shop“

Целта е помалку чекање, побрз проток на патници и стока и поедноставни гранични процедури. Системот го промовираа премиерите на двете земји, Христијан Мицкоски и Еди Рама, кои најавија понатамошно унапредување на соработката и ваков систем и на другите премини кон Албанија.

На граничниот премин Ќафаса само лани се регистрирани 2,3 милиони преминувања на патници што е повеќе од половина од регистрираните преминувања кон Албанија. Со ова олеснето преминување се очекува развој на туризмот и помали трошоци за стопанството.

Македонија ваков модел на заеднички контроли со едно застанува прв пат воведе со Србија во 2019 година на преминот Табановце, а со Косово на преминот Блаце е воведена од лани.

Со воведувањето на системот и со Албанија, се прави уште еден чекор кон поедноставно движење меѓу земјите во регионот. Особено значајно е тоа за Коридорот 8, кој ги поврзува Македонија и Албанија и претставува важна транспортна и економска врска меѓу Јадранското и Црното море.

YouTube video

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Од воена вежба до спасувачка мисија: Припадници на армиските Волци спасија планинар

Припадниците на армиската специјална единица „Волци“ со брза и храбра интервенција успеале да спасат 61-годишен алпинист од Србија, кој тешко се повредил при искачување на карпите кај Демир Капија.

Од воена вежба до спасувачка мисија: Припадници на армиските Волци спасија планинар

Од редовна воена обука до вистинска борба за спасување човечки живот. Припадниците на армиската специјална единица „Волци“ со брза и храбра интервенција успеале да спасат 61-годишен алпинист од Србија, кој тешко се повредил при искачување на карпите кај Демир Капија.

Повреден, со скршеници и обилно крварење, алпинистот останал на висина од околу 15 метри над земјата, откако при искачувањето му се откорнало парче карпа, а неговиот пад бил запрен со безбедносно јаже.

Несреќата се случила во саботата, кај старите тунели во Демир Капија. Според полицијата, станува збор за главен инструктор од планинарското друштво „Стена“ од Белград, кој се искачувал заедно со уште шестмина алпинисти од Србија.

За среќа, во непосредна близина, припадниците на Баталјонот на специјални сили „Волци“ изведувале редовна обука за планински операции па веднаш излегле во пресрет на повредениот.

Како изгледала драматичната спасувачка акција, ексклузивно за Канал 5 раскажува еден од старешините кој непосредно учествувал во извлекувањето на повредениот. Неговиот идентитет не го откриваме од безбедносни причини.

-На вчерашниот датум, нели, околу 13:30 часот, при извршување на задачи од редовен карактер. ...наслушнавме повици за помош од страна на туристи, алпинисти, коишто спортуваа во непосредна близина на реонот каде што ние ги извршувавме тие задачи. При што веднаш пристапивме кон спасување, односно извлекување на ранетиот. Значи, побараа помош, воочивме дека има повредено лице, се организиравме – објаснува соговорникот.

Веднаш започнала трка со времето. Војниците успеале да стигнат до повредениот, да му укажат прва помош и да го извлечат од тешко пристапниот терен. Старешината вели дека вакви ситуации за време на обука се исклучително ретки, но токму присуството на специјалците во близина било пресудно за брзата интервенција.

-Лицето коешто беше повредено, беше утврдено на лице место дека има скршеници, обилно крварење. Беа санирани неговите повреди и лицето беше успешно извлечено надвор од непристапниот терен. Сосема професионално, онака како што и баталјонот веќе со години реализира такви активности. Знаете, сепак, на оваа единица приоритет е безбедноста на граѓаните, така што сметам дека и со оваа активност којашто ја извршивме вчера, тоа само го потврдивме. На повредениот му посакуваме брзо опоравување, брзо закрепнување. И среќа што тука ние се најдовме во истата близина да му пружиме помош – појаснува тој.

За само 50 минути од падот, повредениот алпинист веќе бил во возило на Итната медицинска помош од Неготино. Во Општата болница во Велес му биле констатирани тешки телесни повреди, а за неговата понатамошна здравствена состојба засега нема дополнителни информации.

Она што започнало како редовна воена обука, за припадниците на „Волци“ завршило како вистинска спасувачка мисија, во која нивната подготвеност и навремена реакција помогнале да се спаси човечки живот.

YouTube video

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Зеленски: Русија лансираше 2.700 дронови и 165 ракети за една недела

-Во текот на изминатата недела, Русија ја нападна Украина со приближно 2.700 беспилотни летала, речиси 1.460 наведувани авионски бомби и 165 ракети од различен тип, соопшти украинскиот претседател Володимир Зеленски.

Зеленски: Русија лансираше 2.700 дронови и 165 ракети за една недела

Овие напади погодија дваесет украински региони.

Зеленски предупреди дека руските сили ги засилуваат нападите врз енергетската и другата критична инфраструктура, додека температурите опаѓаат. Оштетувањата на електроенергетската мрежа оставија многу жители без електрична енергија, вода или греење.

Украинскиот претседател особено укажа на недостигот од пресретнувачки ракети за американските системи за противвоздушна одбрана „Патриот“, кои се клучни за пресретнување на руските балистички ракети.

„Во вакви околности, особено е тешко да се разберат доцнењата во испораката на средства за одбрана од балистички ракети за Украина“, наведе Зеленски во објава на „Телеграм“.

Тој го повика Вашингтон да ја одобри испораката на ракети за системите „Патриот“, кои сојузниците на Украина веќе ги платиле преку програмата PURL на НАТО. Оваа програма им овозможува на европските и другите партнери да го финансираат купувањето американско оружје за Украина.

„Од витално значење е Америка да го одобри трансферот на ракети за системите ’Патриот‘, кои нашите партнери веќе ги платиле преку програмата PURL“, рече Зеленски, додавајќи дека Украина мора да ја зајакне својата противвоздушна одбрана.

Зеленски изјави дека значителен дел од ракетите со кои Русија ја нападна Украина во текот на изминатата недела биле балистички. Меѓу нив, тврди тој, имало и ракети произведени во Северна Кореја.

Еден од најтешките напади во изминатата недела се случи на 20 ноември, кога руски балистички ракети погодија три главни моста преку реката Днепар во Киев, предизвикувајќи сериозни прекини во сообраќајот.

Погодени беа мостовите „Подилско-Воскресенски“, „Дарницки“ и Јужниот мост, кои ги поврзуваат двете страни на украинскиот главен град. Поради оштетувањата, градските власти беа принудени да го затворат или ограничат сообраќајот на неколку од овие премини.

Руските напади, исто така, оштетија енергетска инфраструктура и станбени објекти. Зеленски предупредува дека, без дополнителни системи за противвоздушна одбрана и ракети, Украина тешко ќе успее да ги запре последователните бранови на напади со балистички ракети.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер