Македонија

Фискалниот совет предлага од 2026 година зголемување на старосната година за пензионирање

Ќе се зголеми ли старосната граница за пензија на 67 години?

Ова прашање се отвори во јавноста откако од Фискалниот совет, државна институција чиј основач е Собранието, во својата стратегија за 2025-2029 година доставена до Парламентот цврсто препорачува старосната граница за остварување на право за пензија на мажи и жени да се помести на 67 години, почнувајќи од 2026 година.

Според мислењето на на Фискалниот совет буџетската дупка во Фондот за пензиско и инвалидско осигурување е голема, а линеарните зголемувања од 2.500 денари ќе придонесат Фондот на долг период да не биде одржлив. Кога на ова според нив би се додало стареењето на населението, а со тоа и секоја година зголемувањето на бројот на пензионери за околу 1.500-1.700 нови пензионери секоја година, придружено и со иселувањето на младите во странство, проблемот велат станува уште покомплексен.

-Фискалната одржливост на Фондот за ПИОМ претставува посебен фискален ризик. Имајќи го предвид значителното намалување на невработеноста, недостатокот од квалификувана и професионална работна сила, Фискалниот совет цврсто препорачува од почетокот на 2026 година да се зголеми старосната граница за пензионирање за мажи и жени на 67 години и истовремено да се зголеми стапката за пензиско осигурување за 0,7 процентни поени, односно да изнесува 19,5 проценти“, пишува во мислењето.

Од Владата, пак, која треба да ги земе предвид анализите на Фискалниот совет за макроекономските и фискалните состојби за Буџетот, за Канал 5 велат дека во моментов не се разговара за покачување на старосната граница, ниту се прави проценка за таква состојба. Според владината портпаролка Марија Митева, Владата внимателно ги следи состојбите во пензискиот фонд.

Фискалниот совет беше формиран лани со цел да биде еден вид контролен механизам на властите против високи буџетски дефицити и нивоа на јавен долг. Претседател на ова тело е Глигор Бишев, долгодишен банкар, а членови се и академик Абдулменаф Беџети, како и Марина Трпеска, редовен професор на Економскиот факултет при УКИМ.

Свет

Позната е причината за трагичната авионска несреќа на јужнокорејски патнички авион (ВИДЕО)

Инспекторите пронашле птичји пердуви и крв во двата мотори на авионот Боинг 737-800 кој се урна во Јужна Кореја кон крајот на декември, изјави денеска за Ројтерс лице запознаено со истрагата.

Министерството за транспорт на Јужна Кореја се уште не ги коментирало овие наводи, пренесе Ен-Би-Си Њуз.

Во авионската несреќа на патничкиот авион Боинг 737-800 управуван од јужнокорејската компанија Џеџу Ер на линија од Бангкок до Муан, со 181 патник, на 29 декември загинаа 179 лица, а две лица беа спасени, објавија властите во Сеул.

Сите 175 патници и четворица членови на екипажот загинале, а двајца членови на екипажот преживеале, кога авионот принудно слетал, удрил во бетонски ѕид, експлодирал и се запалил.

Медиумските извештаи сугерираат дека можните причини за несреќата може да вклучуваат удар на птица, проблеми со тркалата или ѕидот на крајот од пистата.

Свет

Барак Обама со пример докажа дека не се разведува од Мишел поради Џенифер Анистон

Поранешниот американски претседател Барак Обама денеска повеќе од сликовито ги отфрли гласините за развод објавувајќи емотивна посвета на „љубовта на неговиот живот“ – Мишел Обама, по повод нејзиниот 61 роденден!

Шпекулациите дека парот, кој е во брак повеќе од 30 години, има проблеми, почнаа да кружат откако обожавателите забележаа дека Мишел неодамна не е видена во јавноста со нејзиниот сопруг.

Сепак, поранешниот претседател покажа дека нивната врска е сè уште силна, споделувајќи трогателна порака до својата сопруга на нејзиниот денешен роденден.

„Среќен роденден на љубовта на мојот живот, @MichelleObama“, напиша тој покрај фотографијата на која се држат за рака за време на вечерата.

„Ја исполнуваш секоја соба со топлина, мудрост, хумор и грациозност и изгледаш одлично кога го правиш тоа. Многу сум среќен што можам да се впуштам во животните авантури со тебе. Те сакам“, рече тој.

На сликата Барак е насмеан во сива кошула и црни панталони, додека спроти него Мишел е облечена во темен фустан со V-деколте и шарен украс за коса. И двајцата нежно се држат за раце додека гледаат во камерата. Мишел ја сподели објавата на својот профил со едноставен коментар - Те сакам мили!

Мишел, која денес наполни 61 година, не присуствуваше на погребот на поранешниот претседател Џими Картер на 9 јануари поради „конфликт со распоредот“. Беше објавено и дека таа нема да присуствува на инаугурацијата на Доналд Трамп во понеделник.

Од кабинетот на Барак и Мишел Обама за АП изјавија дека „поранешниот претседател Барак Обама ќе биде присутен на инаугурацијата, но поранешната прва дама Мишел Обама нема да присуствува“.

Веднаш по оваа објава, обожавателите на оваа позната и влијателна политичка двојка изразија загриженост дека можеби имаат проблеми во бракот. Се појавија дури и шпекулации дека Барак има афера со холивудската ѕвезда Џенифер Анистон, што ѕвездата од „Пријатели“ претходно остро го демантираше.

Свет

Шолц и Маск ја продолжија кавгата: Милијардерот е опасност за европската демократија

„Технолошкиот милијардер Илон Маск претставува опасност за демократијата во Европа поради неговата наклонетост кон крајната десница“, изјави денеска германскиот канцелар Олаф Шолц.

„Маск ја поддржува крајната десница насекаде во Европа, во Велика Британија, во Германија, во многу, многу други земји и тоа е нешто што е целосно неприфатливо“, рече Шолц на прес-конференција во Берлин.

„Ова го загрозува демократскиот развој на Европа, ја загрозува нашата заедница и мора да се критикува“, додаде германскиот лидер, според Политико.

Маск ја даде својата поддршка на десничарските фигури и иницијативи ширум светот, вклучително и поддршката на екстремно десничарската Алтернатива за Германија (AfD) на претстојните предвремени федерални избори во земјата, закажани за 23 февруари.

Могулот на социјалните мрежи е исто така еден од најжестоките поддржувачи на Доналд Трамп, што му обезбеди место во потесниот круг на новоизбраниот претседател на САД и ја поддржа десничарската партија Реформска Британија во Британија, со шпекулации дека наскоро би можел да започне финансирање на партијата.

Шолц рече дека нема ништо против правото на Маск на слободен говор, но:

„Неговата поддршка за екстремната десница, без разлика дали е од бизнис интереси или од негови сопствени политички ставови, е неприфатливо“.

Коментарите на социјалистичкиот канцелар се најнови во серијата кавги со Маск, кој пак го нарече Шолц „будала“ и тврдеше дека ќе ги „изгуби“ германските сојузни избори.

притисни ентер