Финалето на НБА би можело да се игра во забавниот парк на Дизни

Финалето на сезоната во НБА би можело да се одржи во забавниот парк Волт Дизни во Орландо, Флорида.

Раководството на лигата се уште бара решение за да ја продолжи сезоната прекината од епидемијата на коронавирус. Како опција се споменува забавниот парк во Флорида каде играчите би ја поминале сезоната во изолирани услови, јавуваат американските медиуми.

Првично се размислувало и за Лас Вегас, потоа на Бахамите, но се откажале. Сега Волт Дизни Светот е во игра.

Опцијата за продолжување на сезоната во затворено одморалиште се појави откако директорот на Националниот институт за алергија и заразни болести, д-р. Ентони Фаучи за Њујорк Тајмс изјави дека некои професионални спортски лиги можеби ќе треба целосно да ги откажат сезоните заради пандемијата на коронавирус.

„Посакувам сите спортови да се вратат. Но, како здравствен работник , лекар и научник, морам да кажам, кога ќе ја погледнете земјата, ние не сме подготвени за тоа“, рече Фаучи.

Комесарот на НБА-лигата, Адам Силвер во средата оствари конференциски повик со 30 директори на лигата и со клупските доктори за да разговараат за ситуацијата.

НБА во понеделникот објави дека наскоро има измени во правилата што ќе им овозможат на клубовите да ги отворат своите центри за обука, така што играчите ќе можат да учествуваат на ограничени вежби, сè додека градот во кој е објектот го дозволува тоа.

Сè уште ќе има бројни ограничувања за отворањето на објектите, се вели во соопштението на лигата. Исто така, не е одреден точен датум за кога може да се отворат објектите, иако лигата навести дека тоа може да биде 8-ми мај.

притисни ентер