По него беа распишани централна и меѓународна потерница, а МВР соопшти дека бил лоциран и лишен од слобода во Скопје, по што е спроведен во полициска станица за понатамошна постапка.

-Вчера по добиени оперативни информации за лице за кое од страна на МВР е распишана централна и меѓународна потерница, од страна на полициски службеници од СВР Скопје-Потраги од слобода е лишен Александар Лазаров (41) од Кочани. За Александар Лазаров беше распишана потерница по барање на Основен суд Кочани осомничен за сторено кривично дело по член 215 став 1 од Кривичниот законик,- изјави – Гоце Андреевски – Портпарол на МВР.

Лазаров беше приведен во петокот поради сомнение за кривично дело поврзано со недозволена трговија со дрога. Но, додека се наоѓал во полициската станица во Кочани, успеал да избега преку прозорец по што во јавноста се отворија сомнежи за евентуални пропусти во полициското постапување. Директорот на Бирото за јавна безбедност, Александар Јанев, најави дека ќе биде спроведена внатрешна контрола за да се утврди како дошло до бегството и дали имало пропусти или одговорност кај полициските службеници кои биле задолжени за негово обезбедување.

-Со пронаоѓањето на бегалецот не завршува и нашата обврска за целосно расчистување на случајот. Внатрешната истрага продолжува и секој што со постапување или непостапување придонел за овој настан ќе сноси одговорност согласно закон и утврдените процедури.- -Александар Јанев – Директор на БЈБ.

По приведувањето Лазаров повторно ќе биде изведен пред надлежните органи, а истрагата продолжува и во делот на околностите под кои успеал да избега од полициската станица. Инаку тој беше спомнат и на судењето за трагедијата во Кочани, кога сведок го наведе како „главен дилер на дрога“ во дискотеката „Пулс“, кој бил повеќепати апсен и пуштан.

Во меѓувреме продолжија и политичките препукувања. Од СДСМ претходно оценија дека бегството е доказ за сериозни пропусти во безбедносниот систем и побараа политичка одговорност. ВМРО-ДПМНЕ пак ја поздрави брзата акција на полицијата, оценувајќи дека МВР покажало професионално постапување и бескомпромисна борба против криминалот. Според нив, со приведувањето на Лазаров се демантираат обвинувањата на СДСМ дека министерот Панче Тошковски сакал да му овозможи слобода.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Брендан Вард пред Националниот совет за евроинтеграции посочи дека ќе настојуваат Црна Гора да ги заокружи преговорите со Унијата до крајот на годинава и да постигнат суштински напредок со останатите три земји кандидатки кои ги започнаа преговорите по кластери. Во однос на Македонија најавува дијалог во рамките на Унијата за земјава да го направи потребниот исчекор.

-Проширувањето на Унијата е значителен приоритет за Ирска и ние ќе работиме кон завршување на пристапните преговори со Црна Гора и ќе настојуваме да постигнеме суштински напредок во преговорите со Албанија, Украина и Молдавија. Исто така, силно ја поддржуваме и Македонија и нејзиното пристапување во ЕУ и ќе работиме заедно со партнерите во Унијата и со властите тука во Скопје за да видиме кој напредок ќе може да се направи на тоа поле,- -Брендан Вард амбасадор на Ирска во Македонија со седиште во Романија.

Поддршка за европските вредности кои во минатото биле занемарени од некои земји членки е еден од трите приоритети на Ирското претседателство, изјави амбасадорот Вард. Да се почитуваат европските вредности упатија повик заменик претседателот на националниот совет за евроинтеграции – Антонијо Милошоски како и пратеничката од опозициските редови – Моника Зајкова. Милошоски од Ирското претседателство побара како што рече, почит и партнерски пристап но и поголема поддршка за „порационално однесување од одредени членки на ЕУ.„

-Македонија е спремна да разговара за тоа што треба да се направи дополнително за владеење на правото, за реформи во администрацијата, но навистина многу ни е тешко да разговараме за поглавја како политички суети и историски фрустрации. Таквите поглавја на историски фрустрации што се случило пред 150 години да биде детерминанта за тоа што треба да се случи утре како наша заедничка европска иднина, сметаме дека не се релевантни параметри за процесот на проширување,- -Антонијо Милошоски, заменик-претседател на Националниот совет за евроинтеграции.

-Апел до Ирското претседателство – ЕУ мора конечно да испрати јасна порака дека вредностите што ги проповеда, навистина и ги применува. Ако се бараат реформи тие треба да бидат мерени по ист критериум, за сите земји, ако се бара доверба, тогаш и европските ветувања мора да бидат предвидливи и исполнети,- - Моника Зајкова, претседателка на ЛДП.

Иако лидерот на СДСМ и претседател на Националниот совет за евроинтеграции – Венко Филипче не беше присутен од како што рече неговиот заменик – Милошоски, оправдани причини, сепак од неговата партија упатија критики за тоа дека како што велат „додека другите напредуваат кон ЕУ, Македонија останува во изолација„ .

Додека четири земји направија нов чекор напред кон Европската унија, Македонија повторно останува заглавена...Наместо да ја искористи оваа шанса, Мицкоски ја држи Македонија во изолација. Со блокирање и со неисполнување на реформите, тој свесно ги затвора вратите за европските фондови, за инвестиции и за подобар животен стандард.

Се вели во партиското соопштение во однос на вчерашниот т.н „Супер вторник„ кога Брисел оддржа дури четири меѓувладини пристапни конференции со првенците – Црна Гора, Албанија, Украина и Молдавија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Премиерот Мицкоски не очекува дека нешто ќе се смени и во следниот период, иако за важноста на ова прашање вели дека добивме потврда и од европкомесарката Марта Кос неодамна во Скопје. Тој вината ја лоцира во опозициските партии за кои вели дека се неодговорни а имаат шанса да договорат што сакаат. Го повтори ставот на владејачката коалиција дека единствен услов кој го имаат е да се најде механизам за поедноставно гласање на дијаспората.

-Не сум оптимист за носењето на Изборниот законик затоа што имаме работа со неодговорни и незрели политичари во опозицијата. Поминаа денови, тие се натегаа кој кого ќе го викне, каде ќе се одржи состаноко. Денеска ги повикувам на зрелост, на одговорност и претседателиот на ДУИ, на СДСМ, на Левица, крилата на Села и Таравари, како опозициски партии да седнат заедно и да се договорат и да донесат закон во кој ќе биде вклучено гласањето на дијаспората. Тогаш, кога тие ќе кажат дека е завршено, ние ќе го прифатиме без воопшто да полемизираме на таа тема. Не знам што друго поконкретно ние како Влада може да направиме,- Христијан Мицкоски – претседател на Влада.

Од друга страна опозициските партии се обвинуваат меѓусебе за договор со власта и си ја префрлаат топката за тоа кој ги закочил преговорите. Според СДСМ, Левица е сателитска партија на ВМРО-ДПМНЕ која го спречува секој обид за опозициско обединување.

-Се знаат сите од Левица кои одеа на средби со Мицкоски. Се знае и кои пратеници останаа во собраниската сала заедно со ВМРО-ОКГ во моментот кога опозицијата ја напушти седницата по напредите на Мицкоски. Тоа не е опозициско однесување. Тоа е јавна и јасна соработка со власта. Левица нема таен договор со Мицкоски. Договорот е јавен и јасен,- СДСМ.

Левица пак тврди дека токму СДСМ е партијата која не сака воопшто да се отвора постојниот Изборен законик, а за тоа заемен интерес имале со ВМРО-ДПМНЕ. Целта велат е да не се изгласа една изборна единица туку да се гласа по старите правила со кои двете партии добиваат повеќе пратенички места.

-СДСМ останаа цврсто на тајниот договор со ДПМНЕ за Изборниот законик да остане недопрен - како оперативна спогодба меѓу актерите на стариот поредок со цел овој модел да преживее бидејќи токму тој модел ги храни нив и оди на штета на Левица. Секој обид Изборниот законик реално да се допре во суштината, наидува на идентична одбрана - различна по реторика, идентична по исход- Левица.

Предлог-измените на Изборниот законик кои се предложени во Собранието се заглавени со над 13 илјади амандмани од СДСМ, Левица и ЛДП, а Комисијата за политички систем воопшто нема ниту почнато со расправа за нив. Пропаднатиот обид за измени значи дека Македонија нема да ги земе предвидените 4,2 милиони евра од европскиот фонд.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.