Се очекуваат нови мутации на коронавирусот, па едно од можните сценарија според министерот за здравство Венко Филипче е граѓаните да примат и трета доза анти-ковид вакцина, а исто така не се исклучува можноста таа да стане сезонска. Тој од Гевгелија, каде што беше во увид на реконструираната болница, порача дека ќе се следи состојбата, а ќе се разговара и за евентуални рестриктивни мерки за оние кои што досега не се имунизирале.

„Ќе разговараме за евентуални рестриктивни мерки, прво насочени кон оние кои што не се вакцинирани, затоа што нема потреба да ставаме дополнителен ризик на луѓето кои што се вакцинирани, знаејќи дека е единствениот начин ние нормално да функционираме и животите да ги вратиме назад.“

Според него, иако во изминативе денови има пораст на бројот на новодијагностицирани пациенти, состојбата е прилично мирна и болниците фунцкионираат без притисок.

„Нема притисок во болниците, ниту во амбулантите, каде што се става индикација дали некој пациент е за прием или не. Околу 15 пациенти се лекуваат на клиниката за инфективни болести. Будно ја пратиме ситуацијата, иако сега е прилично мирно, можно е да продолжи трендот на пораст и понатаму.“

Министерот потенцираше дека вакцинацијата се одвива непречено во вакциналните пунктови ширум земјава, а исто така се одвива и теренската имунизација. Во текот на вчерашниот ден вакцина примиле околу 12.500 граѓани.

Со последните бројки 63% од населението над 70 години примиле барем една доза вакцина, над 65 години, барем една примиле 65%, а најниска е бројката над педесет години, односно со најмалку една доза се вакцинирале 45%.