Министерот Венко Филипче очекува масовната имунизација се планира во април и таа ќе почне со поголемите количини кои треба да стигнат од Кина и Русија. Од претставници на руската амбасада и претставници на компанијата е добиена потврда за втората количина од вакцината, а воедно се очекуваат информации и за останатите количини од 200 илјади Спутник вакцини, како и за онаа на кинески Синофарм. Филипче вели дека очекува и механизмот на солидарност да профункционира по надминувањето на проблематичните елементи.
-Тоа значи дека тој механизам на солидарност на ЕУ дефинитивно ќе профункционира по сите надминувања на проблематичните елементи, а тоа, пред се, беше што и самите компании не испорачаа доволно дози кон земјите членки на ЕУ. Ова не се однесува никако на билатералните директни разговори на која било земја од Западен Балкан со која било компанија, вклучувајќи ги и европските производители,-Венко Филипче.
Регулативата на ЕК вклучува 17 земји меѓу кои се и оние од западен балкан кои досега беа изземени од механизмот за надзор на извозот. Поради проблеми со испораката од фармацевтските компании и недостиг на дози за масовна вакцинација водечки принципи на дозволите за извоз кон трети земји ќе бидат пропорционалност и реципроцитет.
Пропорционалната распределба ќе се утврдува според епидемиолошката состојба, стапката на вакцинација и пристапот до вакцините. Со реципроцитетот пак ќе се следи дали државата која што ги произведува вакцините го ограничува сопствениот извоз.
Според претседателката на Европската комисија, Урсула Фон дер Лајен, промените се потребни затоа што земјите на ЕУ се соочуваат со трет бран од Ковид-19, додека некои компании не си ги почитуваат обврските од склучените договори за испорака на дози во ЕУ.
Попрецизни информации за доаѓањето на кинеската вакцина ќе се знае до крајот на месецот, а нив ќе ги добиеме најверојатно од министерот за одбрана на Кина, смета премиерот Заев.