Македонскиот народен театар на 5 јуни оствари исклучително успешно гостување во Казалиште „Марин Држиќ“ во Дубровник, Република Хрватска, изведувајќи ја повеќекратно наградуваната претстава „12“, работена според култното дело „12 Angry Men“ од Реџиналд Роуз, во адаптација и режија на Синиша Евтимов.

Ансамблот на Македонскиот народен театар, заедно со директорот Никола Кимовски, беше пречекан со особена срдечност и искрено гостопримство од страна на домаќинот – Казалиште „Марин Држиќ“ и директорот Паоло Тишљариќ.

Во пресрет на изведбата, домаќините организираа прошетка низ историското јадро на Дубровник, а членовите на ансамблот имаа можност одблиску да се запознаат со богатото културно и историско наследство на градот, еден од најзначајните културни центри на Медитеранот.

Изведбата на „12“ беше проследена со извонреден интерес и воодушевување од дубровничката публика, која со големо внимание ја следеше претставата од почеток до крај. Моќната актерска игра на: Ѓорѓи Јолевски, Гораст Цветковски, Тони Михајловски, Никола Ристановски, Благој Веселинов, Александар Микиќ, Игор Џамбазов, Јордан Симонов, Нино Леви/Сенко Велинов, Дамјан Цветановски/Оливер Митковски, Владо Јовановски и Сашко Коцев, прецизната режиска концепција и темите кои ги отвора претставата наидоа на извонреден прием кај публиката, која изведбата ја проследи со превод на хрватски јазик.

Актерите беа наградени со долг, искрен аплауз, како силна потврда за уметничката вредност на претставата.

„12“ е претстава која во изминатиот период оствари значаен успех кај публиката и стручната јавност, а на 59-от МТФ „Војдан Чернодрински“ беше наградена со признание за уметничко остварување во целина, специјална награда за колективна игра и награда за машка епизодна улога „Димче Трајковски“, доделена на Оливер Митковски.

Гостувањето во Дубровник претставува уште една можност за претставување на продукцијата на Македонскиот народен театар пред регионалната публика и за понатамошно развивање на соработка со најголемите театарски институции во регионот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Вкупно 14.587 матуранти се пријавени за полагање на испитите со кои го заокружуваат средното образование и стекнуваат услов за продолжување на високообразовните установи или за вклучување на пазарот на трудот.

Полагањето се спроведува во училиштата каде што се обезбедени сите законски и организациски услови, а дел од учениците, по барање на училиштата, полагаат во амфитеатрите на најблиските факултети.

Министерката за образование и наука проф. д-р Весна Јаневска и директорката на Државниот испитен центар, Даниела Михајловска го посетија Економскиот факултет при Универзитетот „Св. Кирил и Методиј“ во Скопје, каде полагаат учениците од СУГС „Васил Антевски – Дрен“.

Во изјава за медиумите, министерката Јаневска на сите матуранти им посака успех во полагањето и истакна дека годинава матурата се реализира според нов концепт кој овозможува поправеден пристап кон оценувањето на учениците.

„За првпат државната матура се спроведува според новата Концепција која предвидува државна, стручна и уметничка матура. На овој начин учениците ќе бидат тестирани според наставните содржини што реално ги изучувале во текот на средното образование, што претставува значаен исчекор кон поголема правичност и еднакви можности за сите матуранти“, изјави Јаневска.

Информираше дека типот на матура може да се избере и во зависност од тоа дали и каде би сакал матурантот да продолжи да се надградува. Како што рече, високообразовните установи уште кон крајот на минатата година известија со каква матура еден ученик може да се запише на нивните студиски програми.

Матурантите денес го полагаат првиот од двата екстерни испити – странски јазик, математика или историја, во зависност од избраниот тип на матура. Вториот екстерен испит, по мајчин јазик, ќе се реализира на 11 и 12 јуни.

„Очекувам процесот да помине во најдобар ред и во фер атмосфера. Заедно со училиштата, тестаторите и набљудувачите работевме на создавање услови за регуларно спроведување на испитите. Ги повикувам учениците да се потпрат на сопственото знаење, бидејќи секој обид за препишување носи сериозни последици и може да го одложи стекнувањето на дипломата за цела година“, нагласи министерката.

Директорката на Државниот испитен центар, Михајловска информираше дека од вкупниот број пријавени матуранти, 12.184 се пријавиле да полагаат државна матура, 2.276 ученици за државна стручна матура и 127 се пријавени за државна уметничка матура.

„Организацијата на државната матура според новата Концепција, бара поголем ангажман, но Државниот испитен центар во координација со министерството и училиштата успешно ќе одговори на предизвикот, во чиј фокус се интересите на учениците“ изјави Михајловска.

За непречено и регуларно спроведување на матурата ангажирани се околу 2.500 тестатори и 200 набљудувачи. Резултатите ќе бидат објавени најдоцна еден месец по полагањето на вториот екстерен испит.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

„Воодушевени сме што Формула 1 ќе продолжи во Лас Вегас уште многу години. Отсекогаш верувавме дека Лас Вегас ќе биде камен-темелник на нашето присуство во САД и ова продолжување нè поврзува со овој важен пазар на долг рок“, рече претседателот и извршен директор на Формула 1, Стефано Доменикали, пренесува официјалната веб-страница на Формула 1. ж

Лас Вегас ја освои трката во 2023 година, а досега се одржаа три, Макс Верстапен победи на две, а Џорџ Расел на една. За да се обезбеди успехот на проектот, Формула 1 инвестираше околу 500 милиони долари во купување земјиште во центарот на Лас Вегас, каде што беа изградени нов комплекс во боксот и падок.

Според податоците на Формула 1, Гран При на Лас Вегас генерираше вкупен економски ефект од 3,2 милијарди долари од 2023 година, додека само изданието во 2025 година му донесе на градот околу 43 милиони долари даночни приходи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.