Вториот голман на Металург, Раде Мијатовиќ, го врати во живот Металург по лошото прво полувреме и негативата од два гола. Со серија одбрани екипата од Автокоманда брзо ја надополни разликата. Вардар цели седум минути во второто полувреме не постигна гол. Кошмарот од претходниот натпревар, што се играше пред десет дена, Дибиров, беше одлично затворен и постигна само 5 гола.

„Првото полувреме го игравме во грч, поучени од првиот натпревар кога мислевме дека ќе го добиеме мечот. Во второто полувреме среќата како да се сврте кон нас. Постигнавме погодоци од тешки ситуации. Мијатовиќ не држеше во игра и не поттикна со своите феноменални одбрани. Овој натпревар значи многу за нас, за поткревање на самодовербата што ја изгубивме во последниот месец“, изјави по натпреварот Наумче Мојсовски.

„Да им се заблагодарам на играчите, да им честитам на големата борба, на дисциплината и на начинот на којшто одиграа“ – беше кус тренерот на металурзите, Лино Червар.

„Фер и коректна борба на играчите на Вардар. Натпреварот беше многу тежок, влеговме порастоварени во него, докажавме дека никој не треба да не отпишува. Дарко Станиќ наметна виски стандарди на голот и партијата што јас ја пружив е можеби желбата за да се наметнам во таа конкуренција“, рече по натпреварот голманот Мијатовиќ.

„Честитки за победата, беше заслужена. Вардар виде што значи да се има голман. Му честитам на Мијатовиќ. Кога ќе се постигнат само два гола во второто полувреме нема што да се бара понатаму, секако дека кај нас е грешката и ќе треба да анализираме. Ќе се обидеме да се пласираме во следната рунда“, коментираше тренерот на Вардар, Андон Бошковски.

Најефикасни во тимот на Металург, покрај 10-те одбрани на Раде Мијатовиќ, беа Наумче Мојсовски и Ренато Вугринец со по 8 голови.
Металург сега има 10 бодови, а Вардар 8.

Согласно распоредот на табелата, Македонија годинава најверојатно ќе има два претставника во фазата топ 16 од ракометната Лига на шампиони.