Европската комисија предлага пет мерки за пензионерите во Хрватска - Канал 5

Балкан

Европската комисија предлага пет мерки за пензионерите во Хрватска

 Европската комисија во својот извештај предлага пет мерки за Хрватска во системот на пензиско осигурување, јавија хрватски медиуми. 

Европската комисија предлага пет мерки за пензионерите во Хрватска

Поради лошите демографски движења, односно стареењето на населението, целта е да се поттикне подолго да се работи до пензионирање, но и да се обесхрабри предвременото пензионирање.

Тука доаѓаме до омразениот предлог за постепено зголемување на старосната граница за старосна пензија. Но, Европа укажува и на работи од кои имаат корист пензионерите, а тоа се зголемување на неоданочениот дел од пензијата, поправеден модел на усогласување и заштита на пензионерите со ниски примања, наведуваат медиумите.

Европа сака да ја зголеми старосната граница за пензионирање на хрватските граѓани. Сепак, извештајот на Европската комисија дава поширок контекст на оваа непопуларна мерка, која беше прекината во Хрватска во 2019 година со иницијативата за референдум на синдикатот „67 е премногу“. Тогаш, не помалку важно, пенализацијата за предвремено пензионирање беше намалена на 0,2 отсто месечно.

„Извештајот за адекватноста на пензиите, кој Комисијата и земјите-членки го усвојуваат преку Комитетот за социјална заштита на секои три години, дава вредна анализа која може да придонесе за политичките дискусии за пензиските реформи во ЕУ. Извештаите содржат меѓусекторска и специфични анализи за земјата. Што се однесува до Хрватска, извештајот за 2024 година забележува дека, со оглед на неповолните демографски движења, неопходно е да се намали одливот на работна сила, да се зголеми стапката на вработеност на постарите работници (што е значително под просекот на ЕУ), да се промовира подолготрајна работа и да се обезбедат соодветни и одржливи пензии“, наведуваат од претставништвото на Европската комисија во Хрватска.

Од тој документ може да се прочитаат пет важни препораки.

Првата е Владата да продолжи со мерките кои го обесхрабруваат предвременото пензионирање и поттикнуваат одложено пензионирање.

Во таа смисла, премиерот Андреј Пленковиќ веќе за следната година најавува зголемување на бонусот за оние кои продолжуваат да работат по исполнување на условите за старосна пензија. Бонусот сега изнесува 0,45 отсто за секој месец подоцнежно пензионирање, а најмногу за пет години, што теоретски носи 27 отсто повисока пензија.

Втора препорака - постепено зголемување на старосната граница за пензионирање од 65 години за мажи и 63 години и шест месеци за жените. Сепак, нема детален предлог кога и за колку. Почнувајќи од следната година, жените ќе можат да се пензионираат кога ќе наполнат 63 години и девет месеци.

Секоја наредна година условот се зголемува за три месеци до 2030 година кога се изедначува старосната граница за пензионирање на мажите и жените. Жените годинава можат да одат предвремена пензија доколку имаат 58 и пол години и имаат 33 и пол години стаж.

И во двата случаи, правото на жените годинава е две и пол години поповолно од правото на пензија за мажите. Порано разликата беше пет години, а по завршувањето на преодниот рок условите ќе бидат исти за сите. Европската комисија предлага и трета работа, да се промени начинот на оданочување на пензиите и да се зголеми неоданочливиот дел од пензијата.

Само по јулското усогласување, 70.000 нови корисници паднаа во даночната замка, бидејќи пензиите во просек пораснаа за околу 40 евра. По секое усогласување има се повеќе даночни обврзници, бидејќи со зголемувањето на пензиите ја надминуваат личната одбивка од сегашните 560 евра.

Се препорачува и примена на моделот на индексирање, односно усогласување на пензиите, со цел во иднина да се зголеми учеството на пензиите во платите. Учеството на просечната пензија од 623 евра исплатена во ноември е 47,1 отсто од просечната плата од 1.322 евра за септември. Соодносот на овие два приходи го достигна нивото од 2016 година, но тогаш пензиите беа дури 75 отсто помали од денешните. Растот на платите ја девалвира реалната вредност на пензиите, која не го следеше целосно трендот преку корекции.

Европската комисија сака да ги заштити пензионерите со ниски примања преку обезбедување пристап до минимален приход или бенефиции за домување во случај на високи трошоци за домување или енергија. Во оваа смисла, државата двапати годишно исплаќа еднократен паричен надоместок во износ од 60 до 160 евра за оние чија пензија не надминува 840 евра. Ваков надоместок очекуваат корисниците на странски пензии во Хрватска овој месец.

Исто така, има ваучери за струја од 70 евра, но тие не се наменети конкретно за пензионери, иако најголемиот дел од ваучерите ги добиваат „постарите“ домаќинства.

И покрај тоа, на државата и треба сеопфатна политика за да ги заштити пензионерите со најниски примања од сиромаштија во старост, а еден од начините е да ги зголеми најниските пензии, за што владата засега молчи, објави Н1. Во 2025 година пензионерите може да очекуваат воведување на поповолна формула за усогласување, постојан додаток на пензија, дополнителна година стаж за секое дете и поголем бонус за подоцнежно пензионирање, што е во согласност со препораките на Европската комисија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Нов потег на Путин: Русите вежбаат со Кинезите, пристигна нуклеарно предупредување

Рускиот претседател Владимир Путин вчера присуствуваше на воена вежба на планините Урал, во која учествуваа војници од Кина и од неколку други земји.

Нов потег на Путин: Русите вежбаат со Кинезите, пристигна нуклеарно предупредување

Путин го посети воениот полигон во регионот Чељабинск за да ја следи завршната фаза од вежбата „Центар-2026“. Вежбата се одржа во склоп на вежбата „Интеракција-2026“, спроведена од членките на Организацијата на Договорот за колективна безбедност – безбедносен сојуз предводен од Москва, составен од неколку поранешни советски републики.

Путин изјави дека 47.000 војници учествуваат во вежбата „Центар-2026“, вежбајќи одбивање напади на 11 полигони и во Каспиското Море. Вежбата започна во понеделникот, а завршува денес.

Путин предупреди дека нема да се двоуми да употреби нуклеарно оружје за одбрана на Калининград.

„Околу 6.000 војници од Русија и од други земји учествуваа во завршната фаза на полигонот Чебаркул“, рече Путин.

YouTube video

Тој додаде дека делегации од 55 земји учествувале како набљудувачи.

Според извештаите на руските медиуми, во вежбата учествуваат воени единици од Белорусија, Киргистан и Таџикистан, заедно со војници од Кина, Монголија и Пакистан. За време на посетата, Путин изврши увид во различни видови вооружување, вклучително и новите беспилотни летала „Геран“ на млазен погон, кои руската војска ги користи во нападите врз Украина.

Посетата на Путин уследи еден ден откако Русија го предупреди НАТО дека нема да се двоуми да употреби нуклеарно оружје за одбрана на Калининград, доколку некоја членка на воениот сојуз се обиде да ја отсече таа руска ексклава на западот на земјата од остатокот на Русија.

Извор: Б92

Тагови: Владимир Путин

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Мечки влегуваат во дворови во Русија: 16 лица загинаа за еден месец

Според анализата на „CNN“ на извештаите од руските медиуми, само во септември најмалку 16 лица загинале во напади од мечки низ Русија.

Мечки влегуваат во дворови во Русија: 16 лица загинаа за еден месец

Најтешко погоден е огромниот регион Краснојарск во централен Сибир, каде што оваа година седум лица ги загубиле животите во напади од мечки.

Руското Министерство за природни ресурси и животна средина наведува дека во земјата годишно вообичаено се регистрираат меѓу 20 и 30 напади од мечки врз луѓе. Оваа година, мечките навлегле во населени места во повеќе од 40 руски региони.

Жена нападната веднаш откако излегла од својот дом

Минатата недела во регионот Краснојарск, мечка убила 51-годишна жена откако таа излегла од својата куќа. Два дена претходно, еден чувар загинал во напад на паркинг за камиони во шумска област.

Претходно во септември, биле пронајдени и телата на две постари жени кои одделно отишле да берат печурки, нивните повреди укажувале на напад од мечка.

Смртоносни напади се случиле и на други места во Сибир. Во Тува, таткото на рускиот НХЛ-играч Андреј Кузменко загинал во напад од мечка додека рибарел кон крајот на септември. Во август, во регионот Алтај, мечка искинала шатор, одвлечкала 29-годишна жена во шумата и ја убила.

Зошто се приближуваат до луѓето?

Експертите со кои разговараше „CNN“ наведуваат неколку можни причини за порастот на опасните средби во одредени делови на Сибир.

Зоолозите како клучен фактор го посочуваат исклучително слабиот род на борови јатки и шумски плодови, што им го отежнува наоѓањето храна на мечките пред зимскиот сон. Големите шумски пожари исто така уништиле делови од нивното природно живеалиште.

Во есенскиот период, мечките интензивно бараат храна за да натрупаат доволно масни резерви за зимскиот сон. Доколку нема доволно храна во дивината, тие сè почесто се приближуваат до населби, депонии за отпад и други локации каде што храната е лесно достапна. Експертите исто така предупредуваат дека ширењето на индустриските активности во претходно оддалечени природни предели ја зголемува веројатноста за средби меѓу луѓето и мечките.

Полициски часови и затворање на паркови

Во текот на изминатите два месеца, властите во најмалку десет региони низ Сибир и рускиот Далечен Исток ги предупредија жителите за зголемена активност на мечките.

Во делови од регионите Алтај и Бајкал се воведени ноќни ограничувања на движењето, додека властите во Краснојарск го затворија Националниот парк „Краснојарски столбови“ и популарната планинарска патека на гребенот Торгашински.

Регионалните власти исто така формираа мобилни ловни тимови и нудат парични награди за убивање мечки. Во регионот Краснојарск се нуди награда од над 35.000 рубљи – приближно 420 долари – за нивно отстрелување.

По смртта на еден турист во регионот Алтај, убиени се повеќе од 50 мечки, а издадени се дозволи за отстрел на уште 157. Властите во регионот Краснојарск најавија отстранување на повеќе од 180 животни кои се сметаат за потенцијално проблематични.

Експерти: Масовниот отстрел нема да го реши проблемот

Зоологот Сергеј Колчин смета дека, иако отстрелот на агресивна мечка што навлегува во населено место понекогаш е неопходна итна мерка, сепак предупредува дека масовното убивање животни нема да го намали бројот на инциденти на долг рок.

Според него, суштинскиот проблем е лесно достапниот отпад што ги привлекува мечките кон населбите. Ако се убие една мечка во близина на депонија, друга може едноставно да го заземе нејзиното место.

Како долгорочни решенија, експертите ги наведуваат подоброто обезбедување на отпадот, едукацијата на жителите за тоа како да се однесуваат во живеалиштата на мечките, како и употребата на електрични огради и други средства за одвраќање.

Извор: Индекс.хр

Тагови: мечки русија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Метео

Утре сончево и релативно топло

Утрото ќе биде ведро и студено, а преку денот сончево и релативно топло. 

Утре сончево и релативно топло

Ќе дува слаб ветер од северен правец. Минималната температура ќе биде во интервал од -3 до 8, а максималната ќе достигне од 20 до 28 степени.

Во Скопје, сончево и релативно топло со слаб ветер од северен правец. Минималната температура ќе се спушти до 3, а максималната ќе достигне до 26 степени.

Во следните денови времето ќе биде релативно топло. До среда утрата ќе бидат ведри и студени, а во текот на денот ќе преовладува сончево време. Од четврток ќе има зголемување на облачноста и услови за локален дожд, a утринските температури ќе бидат во пораст.

Тагови: сончево

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер