Полска денеска потврди 21.897 нови случаи со коронавирус и го сруши својот дневен рекорд петти ден по ред. Во земјата се одржуваат протести против одлуката на Уставниот суд за речиси целосна забрана за абортус во мнозинската католичка нација.
Владејачката Партија на закон и правда (ПиС) предупреди дека протестите ќе доведат до нагло зголемување на случаите со коронавирус. Но, некои имунолози истакнаа дека повеќето од демонстрантите носеле маски и се држеле на растојание и биле на отворено, намалувајќи го ризикот од инфекција.
Владата е критикувана дека не тестира доволно луѓе и не се подготвува за вториот бран на пандемијата. Здравствениот систем е преоптоварен и недостасуваат респиратори, пишуваат локалните медиуми.
Пациентите со Ковид-19 заземале 16.144 болнички кревети, а 1.305 биле на апарати за дишење. Земјата со 38 милиони жители потврди вкупно 362.731 случаи на коронавирус и 5.631 смртни случаи. До вчера, полската влада тврдеше дека нема да ги затвора гробиштата за Денот на сите светци, но тоа го стори денеска.
Унгарија потврди рекордни нови 3.908 инфекции, а бројот на хоспитализирани за прв пат надмина 4.000, објави денеска владата. Уште 51 лице почина, вкупно 1750.
Владата на премиерот Виктор Орбан во моментов се спротивставува на воведувањето нови ограничувања на големите настани. Училиштата се отворени, а продавниците работат како и обично. Орбан вчера за една локална радиостаница изјави дека треба да се почитуваат постојните правила за носење маски, но не објави нови ограничувања.
Украина пријави 87,52 нови случаи на ковид-19 во последните 24 часа.Вкупно, повеќе од 387.000 луѓе биле заразени, објави Советот за национална безбедност, пренесува Ројтерс.
Уште 155 лица починале во Украина како резултат на инфекција со корона вирусот.Вкупно починале 7.198 пациенти.Постојат повеќе од 220.000 активни случаи.
Коронавирусот продолжува да се шири и во Чешка каде се потврдени нови 13.605 инфекции и 216 смртни случаи, покажаа денеска податоците од Министерството за здравство. Во земјата со 10,7 милиони жители има вкупно 323.673 заразени и 3.078 жртви.
Во Германија има 19.059 нови случаи со коронавирус, вкупно 518.753, објави денеска Институтот Роберт Кох. Уште 103 лица починале, со што бројот на жртвите достигнал 10.452.