Еве со што се сè служат угостителите за да дојдат до дополнителна заработка.

Кога ќе отидете во некој ресторан, за само неколку минути доаѓа келнерот со леб. Тоа е толку вообичаено и многумина мислат дека е знак за добредојде, меѓутоа, причините се многу различни - од привлекување внимание до „пумпање“ на апетитот.

Лебот на трпезата е дел од традицијата, како и од добрата услуга, но вистинските мотиви на угостителите се многу поприземни од тоа.

Готвачот Рас Адамс разоткрива некои од стандардните митови.

- Најпрво лебот или пецивата ќе ве ожеднат. Жедните луѓе нарачуваат повеќе за пиење, а тоа значи подобра заработка. Второ, лебот или нешто слично, го покренува варењето и ве прави уште погладни. Токму затоа се случува луѓето да нарачаат повеќе отколку што можат да изедат, а подоцна да кажат дека избрзале. Последната причина е што, кога луѓето во рестораните имаат разонода, во случајов јадење леб, тогаш не им е досадно и не ги викаат постојано келнерите – објаснува Адамс.

Џо Колеља, некогашен сопственик на ресторан, дава уште неколку интересни детали.

- Повеќето луѓе предолго размислуваат што да нарачаат. Единствената причина зошто на гостите им дававме леб пред главното јадење беше да ја одолжиме самата нарачка, односно готвачите да имаат време да подготват сè. Келнерот ги прима нарачките од луѓето по редоследот по кој дошле, а додека чекаат им дава леб. Да заклучиме, ова нема врска со тоа дека келнерите се добри и љубезни, и сакаат да ви дадат леб, туку едноставно го користат овој трик поради себе - рече Колеља.

Кимберли Луис била келнерка и открива дека лебот има манипулативна улога.

- Во италијанскиот ресторан во кој работев имавме околу две минути да донесеме леб на сечија маса откако ќе седнат. Моравме да ја пресметаме количината и парчињата да ги попрскаме со маслиново масло и да ги зачиниме. Потоа требаше да донесеме нов леб во рок од пет минути, доколку претходниот го изеле. Зошто? Затоа што гостите се многу напорни. Лебот е само алатка. Кога седите и чекате, сè се чини долго, а лебот ги држи луѓето зафатени и времето едноставно им поминува побрзо. Да скратиме: лебот се служи затоа што гостите се нетрпеливи - тврди Кимберли, а пренесува firstforwomen.com.

Повеќето од овие тврдења се потврдени од науката, а едно од наједноставните објаснувања е дека лебот, особено ако е бел, го зголемува нивото на шеќер во крвта и го поттикнува апетитот.

Извор: srecna.republika.rs

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.