Здравје

Еве како нередот дома влијае врз вашето ментално здравје!

Истражувањата покажале дека постои поврзаност помеѓу вишокот работи во животниот простор и менталното здравје.

Организирањето и чистењето на животниот простор може да ви го поправи расположението и да ја поттикне вашата продуктивност.

Нашето ментално здравје може да биде под влијание на многу надворешни фактори како климатските промени, ескалацијата на глобалното насилство, пандемиите... Експертите тврдат дека лошите вести предизвикуваат чувство на немоќ, но и дека средувањето на нередот во домот може позитивно да влијае врз нашето ментално здравје.

Нередот во домот може да биде одраз на нашата лоша ментална состојба и негативно да влијае на нашата меморија. Нередот може да доведе и до лоши навики во исхраната, да го зголеми ризикот од развој на нарушувања во расположението, да го попречува фокусирањето и носењето одлуки, пренесува studyfinds.org.

Истражувањата покажуваат дека нередот во нашиот животен простор негативно влијае на нашата креативност, ја намалува продуктивноста и ни ја црпи енергијата.

Нередот ја отежнува комуникацијата и може да ги наруши меѓучовечките односи. Ако просторот во кој живеат луѓето е натрпан со непотребни работи, тие доведуваат до расејување на вниманието и ги попречуваат емоциите. Научниците животниот простор го споредија со „психолошкиот дом“, посочувајќи дека просторот во кој живееме треба да се доживува како место на безбедност и удобност.

Реорганизацијата на нередот и хаосот во домот има позитивно влијание врз менталното здравје, дури и повеќе отколку што мислиме. А, ова се придобивките што може да ги донесе:

- го подигнува расположението - го опушта умот

- го подобрува физичкото здравје и навиките во исхраната

- ја зголемува продуктивноста

- ја ублажува анксиозноста

- го подобрува сонот и може позитивно да влијае на нашите односи со другите

Како да се организирате?

Експертите истакнуваат дека е доволен и мал чекор, на пример, можете да почнете со организирање на фиоките и полиците. Размислете колку е добро да имате организиран простор и за каква подобра цел може да послужи. Освен тоа, реорганизирајте ги предметите во четири групи: за чување, за фрлање, за донирање и за преместување. Покрај чистењето на куќата, направете и дигитално чистење: избришете ја непотребната електронска пошта.

Стручњаците советуваат да не размислувате премногу за секој предмет пред да го фрлите. Во добро уреден простор, кој не е преполн со работи, ќе се чувствувате поудобно и полесно ќе се опуштите, а сето тоа позитивно ќе влијае на вашето расположение, креативност и продуктивност.

Извор: srecna.republika.rs

Фудбал

Анчелоти: Ѓулер ќе биде клучен играч на Реал

Турскиот талент Арда Ѓулер следната сезона ќе биде меѓу носителите на играта на Реал Мадрид, најави тренерот на Кралскиот клуб, Карло Анчелоти.

Деветнаесетгодишниот Ѓулер прв пат се најде во почетниот состав во Ла Лига и го постигна својот втор гол во дресот на Реал Мадрид во вчерашната победа од 1-0 на гостувањето против Реал Сосиедад.

Според информациите, турскиот играч за врска е незадоволен од малата минутажа што ја добива и размислува да ја смени клупската средина како позајмен фудбалер во новата сезона, но Анчелоти во него гледа еден од клучните играчи во новата сезона.

„Арда ќе биде многу важен играч за нас во иднина и нема сомнеж дека ќе остане тука следната година. Тој е многу млад, но малку по малку учи каква е неговата улога во овој тим. Тој постигна повеќе голови отколку што одигра натпревари. Тоа е талент“, рече Анчелоти.

Македонија

Сончево со мала до умерена облачност, следува период на релативно топло време

До крајот на денот сончево со мала до умерена облачност. Попладне, особено во северозападните делови ќе има услови за локална нестабилност со краткотраен пороен дожд и појава на ретки грмежи.

Ќе дува слаб ветер од јужен правец, информираат од УХМР.

Максималната температура ќе биде во интервал од 17 до 24 степени.

Во Скопје сончево со мала до умерена облачност. Попладне во делови од котлината ќе има услови за појава на краткотраен пороен дожд.

Од УХМР известуваат дека следува период на сончево и релативно топло време со мала до умерена облачност. Локална појава на нестабилност со пороен дожд и грмежи се очекува кон средината на следната седмица.

Свет

Земјотрес со јачина од 6,9 степени по Рихтеровата скала го погоди југозападниот дел на Јапонија

Земјотрес со јачина од 6,9 степени според Рихтеровата скала ги погоди островите Огасавара во југозападна Јапонија.

Според соопштението на Јапонската метеоролошка агенција (ЈМА), земјотресот се случил во 17:36 часот по локално време. Потресот е регистриран на длабочина од 540 километри.

Островите Огасавара, локално познати како „Острови Бонин“, се наоѓаат на 1.000 километри југоисточно од Токио, главниот град на Јапонија, и 1.600 километри северозападно од островот Гуам во западниот Пацифик.