Изборот на Зејнула доаѓа откако партијата склучи коалициски договор со ВМРО-ДПМНЕ, со што пратеникот од ДПТ Бејџан Иљас кој претходно беше дел од Европскиот фронт предводен од ДУИ, а потоа и кратко време делуваше и независно, се приклучи на владејачкото мнозинство. Коалицијата предводена од ВМРО-ДПМНЕ сега брои 59 пратеници.

Премиерот Христијан Мицкоски образложувајќи го предлогот пред пратениците побара поддршка, посочувајќи дека институциите треба да ги раководат луѓе кои имаат одговорност и капацитет да ги решаваат проблемите на граѓаните. Потребна е политика што обединува , а не што создава нови ровови, порача Мицкоски.

-Денес пред вас не барам поддршка само за еден кандидат, барам поддршка за принципот дека институциите треба да ги водат луѓе кои можат да понесат одговорност, да носат одлуки и да работат во интерес на сите граѓани без разлика на нивната етничка или политичка припадност. Верувам дека во ова се гледа зрелоста на една Влада. Да ги отвори институциите за сите што имаа знаење, капацитет и искрена намера да придонесат, да не прашува кој од каде доаѓа туку што знае и што може да направи, изјави Мицкоски.

И оваа собраниска седница не помина без политички пресметки меѓу власта и опозицијата, меѓусебни обвинувања но и навреди и барања за извинувања. Од СДСМ денешниот предлог го оценија како уште еден политички пазар и не дадоа поддршка.. Прашуваат дали за новото министерско место без ресор вистинската причина е застапеноста на Турците во владата или за да се реши проблемот на власта со Бадентеровото мнозинство.

Според премиерот Мицкоски, пак, на следната седница во вторник ќе се знаат задолженијата на Зејнула во Владата, а на опозицијата и порача дека сега членовите на Владата работат, наместо да играат фудбал по канцеларии.

Изборот на Зејнула, беше одвоен од останатите новоизбрани членови на Владата пред неколку дена, за да се запази правилото на реконструкција на најмногу една третина од министрите, што може да ја предложи премиерот за да не се оди на избор на нова влада.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

По три месеци поминати во притвор, поранешниот претседател на Фудбалската федерација на Македонија, Муамед Сејдини, ќе се брани од слобода. Скопскиот кривичен суд ја прифатил гаранцијата во вредност од над 1.150.000 евра, обезбедена со хипотека на недвижен имот, по што му е укинат притворот. Одлуката е донесена откако обвинителството дало позитивно мислење за прифаќање на гаранцијата. Истовремено, одземена му е патната исправа и му се определени мерки за обезбедување на неговото присуство во постапката.

-По поднесениот предлог за укинување на мерката притвор со определување гаранција и добиено позитивно мислење од Јавниот обвинител, судијата на претходна постапка донесе решение со кое го уважи предлогот и ја прифати понудената гаранција, а со оглед дека против решението не беше изјавена жалба, истото стана правосилно, по што осомничениот е пуштен да се брани од слобода,- -Основен Кривичен суд Скопје.

Сејдини беше уапсен на 23 април годинава во истрага што ја води скопското обвинителство. Во првиот предмет е осомничен за проневера на околу 700 илјади евра средства од УЕФА, наменети за изградба на трибина на стадионот „Билјанини Извори“ во Охрид. Во овој слуачј тој е осомничен за проневера во службата.

Во меѓувреме, истрагата беше проширена и од Обвинителството за гонење организиран криминал и корупција.

Во новиот предмет се опфатени 18 физички и 8 правни лица, меѓу кои и Сејдини, поранешниот претседател на ФФМ Илчо Ѓорѓиоски и други лица.

Според обвинителството, преку стотици фиктивни исплати и договори била предизвикана штета од над 180 милиони денари, односно речиси три милиони евра. Осомничените се товарат за проневера во службата и перење пари.

Иако при отворањето на истрагата петмина осомничени беа недостапни за органите на прогонот, Обвинителството во меѓувреме ги обезбеди сите лица опфатени со постапката, која се води против 18 физички и 8 правни лица. Од ОЈО ГОКК велат дека истрагата за овој случај е се уште во тек.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Mинистерот за одбрана, Владо Мисајловски, заедно со командантот на 1. пешадиска бригада, бригаден генерал Дејан Чиплаковски, денеска ги посетија припадниците на артилерискиот баталјон во касарната „Мирче Ацев“ во Прилеп и извршија увид на градежните активности, кои во моментов се реализираат во касарната.

Мисајловски порача дека Министерството заедно со Генералштабот континуирано работат на подобрување на инфраструктурата во касарните и посочи дека со реконструкцијата се обезбедуваат услови за соодветно сместување и складирање на новонабавената опрема и возила, хаубиците, Страјкерите и лесните оклопни возила (JLTV), како и за останатата артилериска опрема.

„Оваа инвестиција е од 10.5 милиони денари, но значи многу, бидејќи на овој начин опремата ќе биде целосно заштитена. Како што можете да видите, целосна нова челична конструкција, а направена е нова електрика, заштитен објект, целосно под видео надзор со хидрантска мрежа“, рече Мисајловски и додаде дека во моментов се работи на различни проекти низ касарните во државава во висина од над 850.000 евра.

Мисајловски од прилепската касарна уште еднаш потенцира дека инвестициите во одбраната се инвестиции од македонските граѓани за македонската Армија, која е секогаш подготвена да им помогне на своите сограѓани и во служба на државата.

Во рамки на денешната работна посета на касарната, министерот го посети и Одделението за одбрана на Министерството во Прилеп.

Министерство за одбрана

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.