Во Македонија луѓе кои се без рака и нога, во инвалидски колички на секои шест месеци лутаат од врата на врата низ клиники, чекаат ред и се матретираат низ болничките лавиринсти за да направат прегледи и снимки само за да потврдат дека имаат инвалидитет и да го приложат сето тоа на лекарска комисија, за да можат да земаат финансии од државата за туѓа нега. Министерот за здравство Азир Алиу вели дека се труди да го реши проблемот, бидејќи системот не треба да си игра со луѓе кои де факто се со траен инвалидитет, а тоа според првичните пресметки се загуби од за милион ипол до 2 милиони евра годишно дадени без потреба.

На Алиу, кој на денешен ден пред една година почна да министерува со здравството, поголема главоболка му се листите на чекање на пациенти за операција и злоупотребите од страна на дел од докторите. И тој има сознанија дека не мора секаде да се чека ако се дадат стотици евра под рака, но тврди дека бара начин да стави крај на ваквата пракса.

Алиу вели дека нема да се откаже од намерата за поголема контрола на вработените во јавното здравство и очекува да се смени начинот на размислување на новините - лекарите наместо со картичка, со скенирање на прст да се евидентираат на работа и во секој момент да се знае што и на кој оддел работат. Фикгерпринтот веќе е во пилот фаза на Инфективната, Клиниката за транфузиологија и во дел од ТОАРИЛУЦ, а целосно функционира во Министерството за здравство.

+

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

За изработката на лични карти, пасоши и возачки дозволи граѓаните во последниве пет години од свој џеб платиле над 70 милиони евра, иако МВР обрасците за истите документи ги набавило за 29 милиони евра – покажало истражувањето на Центарот за граѓански комуникации за периодот од 2021-ва до 2025-та година. Причина за разликата од 44 милиони евра, од центарот велат дека се непознати, оти од МВР им посочиле дека договорите врз кои се реализира целиот систем се водат како доверливи и не се достапни за јавноста. Според истражувањето, изработката на обрасците ја вршела иста странска компанија, со која договор бил склучен во 2005 година, со важност од 11 години, но останува нејасно на кој начин соработката била продолжена до денеска.

Врз основа на кој закон се склучени тековните договори, неприфатливо е според нас е што МВР не го кажува ни законскиот основ, дали врз закон на јавни набавки или безбедност за одбрана, и ако е така врз кој член, за да ние како јавност знаеме дека оваа тајност е оправдана, во спротивно, се поставува дилемата за рационално и ефикасно трошење на јавните пари-- Сабина Факиќ – Центар за граѓански комуникации.

Од МВР пак, на прашања на Канал 5 посочија дека постапката за набавка на обрасци се спроведува согласно одредбите од законот за јавни набавки, во која се утврдуваат цените за нивната набавка.

-Цените кои граѓаните ги плаќаат за обрасци се утврдени согласно решение и одлука на Влада. Воедно, ве известуваме дека не се работи за таен договор, туку за повеќе постапки кои содржат различни класифицирани сегменти. – МВР.

„Под лупа“ на ЦКГ се најдоа и авионските евакуации од Блискиот Исток по стартот на конфликтот во организација на МНР. Тие забележуваат дека министерството исплатило целосен аванс од 967 илјади евра, наспроти законските прописи од 20% од сумата, а воедно, ангажираната компанија не дала никаква банкарска гаранција, па, велат, останува нејасно, врз кој законски основ е одобрен целосен аванс.

-Интересно е дека понудата која е побарана, е доставена на 6 март, во 14 часот, во тој истот ден, понудата е прифатена, договорот е склучен, фирмата издала фактура и МНР ја платило првата фактура за првите два лета. Ваквото постапување не е во согласност со законот за јавни набавки. Законот е дециден. Точно, можете да спроведете постапка која е итна во случај кога безбедноста на граѓаните е загрозена, но немате право 100% да ги реализирате трошоците за таа набавка. Оттука, тоа што за четирите лета, во три фактури е плаќано неколку дена пред летовите да се реализираат не се согласност со законот. -Сабина Факиќ – Центар за граѓански комуникации.

Од МНР ги демантираат ваквите наводи во извештајот на ЦГК. Од таму велат дека постапката била спроведена согласно законските прописи, врз основа на заклучоци на Владата, со единствена цел, како што наведуваат, навремена и безбедна евакуација на нашите граѓани. Првично биле доставени биле покани до 9, но ниту една компанија не се пријавила на повикот.

-Дури по неуспешното завршување на првата постапка, беше отпочната постапка со единствениот субјект кој во тие околности можеше со сигурност да ја реализира услугата. Условот средствата да бидат исплатени пред реализацијата на летовите не беше утврден од Министерството, туку претставуваше објективен услов, наметнат од локалните превозници и специфичните пазарни услови во регионот на Блискиот Исток во услови на воена криза. – Министерство за надворешни работи.

Велат од министерството, од каде посочија дека остануваат целосно отворени за проверка на сите аспекти од постапката.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Државниот обвинител Ненад Савески вели истражните дејствија во завршна фаза и дека наскоро ќе има јавнообвинителска одлука. Минатиот месец обвинителството соопшти дека отворило предистрага откако добило известување од МВР за настан од ноември лани дека од информатичкиот систем во претседателскиот кабинет неовластено биле извлекувани податоци. Савески потврди и дека МВР ги доставило снимките од видео надзорот за кои тогаш обвинителството соопшти дека не добило известување.

-Се направи еден план за понатамошни истражни дејствија. Според она во кое имав увид да се запознаам и од надлежниот јавен обвинител и од истражителите, во завршна фаза се истражните дејствија така да сметам дека во скоро време би имало и јавнообвинителска одлука во врска со тој случај. Видео снимките се предадени и се предмет на анализа.- изјави – Ненад Савески – Јавен обвинител на РМ.

Савески и денеска рече дека нема да ги коментира политичките изјави прашан за изјавите на премиерот Мицкоски дека трпението му е при крај и дека не гледа ништо спорно што телефонски разговарал со републичкиот обвинител. Не смета дека ваквата комуникација може да влијае врз самостојноста на Обвинителството.

-Не знам во колкава мера е тоа надлежност на премиерот – покрај останатото – да се јавува кај јавен обвинител, меѓутоа, како и секој друг што има право да ми се јави, ми се јави и премиерот, односно претседателот на Владата, и тука не гледам ништо спорно. Самостојноста е неспорна и е предвидена и во Уставот и во матичните закони по кои постапува Јавното обвинителство. Така што, било каква реакција не можам да ја сметам како влијание врз мене при носењето одлуки или постапувањето. Во оваа прилика испраќам порака и до сите јавни обвинители – без оглед на различни активности, дејствија или изјави – да не дозволат тоа да се одрази врз нивното секојдневно постапување и одлучување- изјава – Ненад Савески – Јавен обвинител на РМ.

Премиерот Мицкоски пред еден месец откри дека му се јавил на државниот обвинител Савески да го праша за запирањето на истрагата за набавката на мазутот во ТЕЦ Неготино, разговор што го потврди и Савески. Овој случај јавната обвинителка Катерина Коларевиќ го затвори поради недостиг на докази. Државната ЕСМ поднесе жалба до Вишото јавно обвинителство со која бара преиспитување на оваа одлука, рокот од 30 дена за одлука се уште тече а Савески рече дека очекува во разумен рок да биде донесена одлука и за овој случај.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.