Српските медиуми пишуваат дека Ивица Дачиќ ќе го назначи поранешниот шеф на разузнавачките служби БИА, наследничката на УДБА, Раде Булатовиќ за амбасадор токму во Македонија.
Како ќе ја разбере земјава оваа порака ако се знае дека се испраќа повторно за висок дипломат човек кој е од повисок ранг и место во однос на Горан Живаљевиќ агентот на БИА фатен во Собранието за време на инцидентот од 27 април лани, кого официјален Белград мораше да го повлече од амбасадата во Македонија пишува новинарот Лакиќевиќ за Пешќаник.
Во неговиот текст се коментира и молкот на српската влада но и на српската опозиција во однос на потпишувањето на историскиот договор меѓу Скопје и Атина со кој се предлага решение за новото име на поранешната југословенска република.
Тој ја отвора дилемата дали на Белград му е жал за така наречената Јужна Србија, и дали зад ваквите сопки на Србите на својата држава на патот кон ЕУ се кријат лични причини од раководството на Србија бидејќи сега некој друг станува омилен балкански политичар во Брисел, Берлин и Вашингтон, кој ги решава проблемите.
Екс шефот на БИА Раде Булатовиќ во моментов е амбасадор во Украина откако претходно Турција одбила да го прими за амбасадор во Истанбул.
Според српските медиуми Булатовиќ својата дипломатска кариера ја почнал во 1988.. Од 2000 до 2003 бил советник за национална безбедност на српскиот претседател Коштуница.
По убиството на српскиот премиер Зоран Ѓинѓиќ , Булатовиќ е уапсен во полициската акција „Сабја“ осомничен за „здружување поради непријателско дејствување а по три месеци целосно ослободен.
Од 2004 до 2008 за време на владата на Коштуница е директор на Безбедносната – информативна агенција. Неговото име се поврзуваше со мрежата на помагачи на криењето на Ратко Младиќ, но додека беше шеф на БИА беа испорачани и најголем број на обвинети од Србија.
Во отсуство на официјални реакции по предлогот, Булатовиќ да биде амбасадор во Македонија, единствено се огласи Алијансата за Албанците со став дека ова е тешка провокација за Македонија со барање до сите надлежни да ги преземат сите неопходни мерки за да не се прифати една таква провокација без претходно да се обелодени улогата на српскиот вработен во Амбасадата кој беше дел од толпата која насилно влезе во Собранието на 27 април, каде покрај другите страдаа претседателот на Алијансата Зијадин Села и сегашниот премиер Зоран Заев.