Во денешното сведочење за Рекет, Рустеми, кажа дека постапил по наредбата на Јанева и ја пресметал штетатат што осомничените ја направиле со кривичните дела во финансиската истрага „Поштенска банка“, но предложил и ублажени затворски казни, адекватни на признание на вина со спогодба, а не како што му наредила шефицата, само со плаќање на штетата.

Во сведочењето Рустеми спомена дека кога требало да се замрзне имотот на осомничените Томе Главчев и Ратко Димитровски, Јанева побарала еден стан од имотот на Главчев кој се наоѓа во Скопје да биде тргнат од предлогот за замрзнување бидејќи тој бил продаден на како што рече Рустеми, нејзина пријателка или пријатели.

-Се работеше за голем имот, па тој стан немаше голема улога. После неколку месеци разговарајќи со колешката Лиле Стефанова, таа знаеше за станот, и по нејзините проверки дознала дека можно е сопственик на станот е Сашо Василевски, екс директор на МЕПСО и член на Советот на јавни обвинители. Таа информација не ми беше пријатна. – кажа Рустеми.

Во друг момент Јанева побарала да му се врати пасошот на осомничениот Главчев, со имотна гаранција, односно машини за производство на кошули во вредност од еден милион евра, рече Рустеми. За ова, тој дал позитивно мислење, бидејќи заклучил дека во ред била замената.

Овие одлуки на Јанева за да се затворат истрагите, Рустеми ги поврзал со начелното правно мислење на Врховниот суд , кое го спореди со амнестијата на поранешниот претседател Иванов.

Освен обвинителката, прашања до Рустеми не поставија ниту Јанева, ниту Бојан Јовановски. Според адвокатката на Јанева, Ирена Фрчкоска во исказот немало ништо спорно.

За утре се повикани да сведочат водителката Лила Филиповска, шефицата на кабинет на Јанева, Сања Димовска, Весна Костовска и Агапи Дика.