Живот

ЕЕБ: Со правилни одлуки во Европа може да има и доволно храна и енергија и обновена природа

Според ЕЕБ, како Зелениот договор на ЕУ се спроведува во пракса, така се разжештува дебатата за тоа дали земјиштето треба да се користи за производство на храна, за добивање енергија од обновливи извори или за заштита на природата.

Потребите за струја во ЕУ би можеле да се задоволат со енергија добиена од ветерници и соларни колектори, без притоа да се предизвикаат штети во производство на храна или животната средина, но тоа зависи од човечкиот фактор, односно од одлуките и изборите на индивидуално и политичко ниво, се посочува во најновиот извештај на невладината организација Европско биро за животна средина (ЕЕБ).

Според ЕЕБ, како Зелениот договор на ЕУ се спроведува во пракса, така се разжештува дебатата за тоа дали земјиштето треба да се користи за производство на храна, за добивање енергија од обновливи извори или за заштита на природата.

- Во Европа има доволно земјиште за остварување сите овие цели, доколку го направиме вистинскиот избор, се наведува во извештајот на ЕЕБ насловен „Земјиште за обновливи извори“.

Во документот се посочува дека со поставување на ветерници и соларни панели на само 2,2 отсто од земјиштето во ЕУ може се обезбеди до 2040 година целиот електроенергетски систем на блокот да функционира со енергија од обновливи извори и да се обезбеди нулто ниво на емисија на штетни гасови во енергетскиот сектор.

- Нема причина да се верува дека обновливите извори на енергија би биле пречка за производство на храна и за обнова на природата, смета раководителот на тимот што го изработи извештајот Козимо Тансини.

Во анализата се наведува дека дури и ако се исклучат обработливото земјоделско земјиште и областите со висока биолошка разновидност, во ЕУ и натаму има многу слободен простор за поставување системи за производство на енергија од ветерот и Сонцето.

Сепак, таквиот заклучок важи за ЕУ во целина, додека некои земји, како на пример Италија и Германија, немаат доволно простор за поставување на ветерници и соларни панели кои би произведувале доволно количество на енергија за задоволување на нивните потреби, па би биле принудени увезуваат струја од други држави од блокот.

Во извештајот се посочува и можноста за „двојна употреба“ на земјиштето со обезбедување на „поблиска интеграција“ на земјоделството и производството на еолска и сончевата енергија. Според авторите на анализата, околу 10 отсто од земјоделското земјиште има услови за „двојна употреба“. Станува збор за недоволно продуктивни земјишта и на нив би можеле да се постават повеќе ветерни и соларни инсталации.

Во извештајот, сепак, се наведува дека за остварување на целта за целосно задоволување на потребите за енергија со производството од ветерниците и соларните панели, ќе бидат потребни промени во однесувањето на луѓето и намалување на потрошувачката на струја.

- Промените во животниот стил би можеле да ја намалат потребата за обновлива енергија и да ослободат повеќе земјишен простор. На пример, денес 2,5 отсто од вкупното земјиште во ЕУ се користи за производство на храна за животните. Намалувањето на потрошувачката на месо би резултира со намалување на потребите за животинска храна, се наведува во извештајот.

Авторите на анализата се осврнуваат и на можноста на противење на локалните заедници на поставување на ветерници и соларни инсталации на нивното земјиште, па затоа е потребно да се работи на подигање на свеста на припадниците на овие заедници за важноста на обновливите извори на енергија со што ќе се овозможи изградба на доволно капацитети за производство на струја од ветер и сончева светлина.

- За повисоко ниво на енергетска транзиција исто така е важен и политичкиот пристап. Потребен е сеопфатен и интегриран пристап, бидејќи во спротивно капацитетите за обновливи извори на енергија можеби нема да бидат доволни за постигнување на климатска неутралност според предвиденото, вели Тансини.

Во изјава за „Еурактив“, Тансини посочи и дека за капацитети за производство на енергија од водород, за што се залагаат некои политички структури, се потребни поголеми површини од оние за инсталациите за обновливи извори, што би резултирало со „помалку ефикасна употреба на земјиштето“ за добивање на струја

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Директорот на МНТ Никола Кимовски го назначи Јордан Симонов на уметнички директор

Директорот на Македонскиот народен театар, Никола Кимовски, денес го назначи актерот-првенец Јордан Симонов за уметнички директор на Македонскиот народен театар.

Имајќи ја предвид неговата долгогодишна актерска кариера, која започнува во 1989 година, како и неговото богато театарско и филмско искуство, како и режисерско назначувањето претставува природен и значаен чекор напред – како за него како актер, така и за развојот и идните цели на институцијата.

Неговото долгогодишно искуство и работата во различни жанрови – од драма, комедија и трагедија до мјузикл – претставуваат значаен придонес во уметничкиот развој на МНТ и создавањето нови професионални и творечки импулси во работата со колегите и соработниците.

Јордан Симонов е актер кој има добиено голем број на индивидуални награди за неговите улоги, како и колективни, тоа е резултат на неговата долгогодишна работа во претставите: Јуда (Евангелие по Јуда, 1993), режисер: Горан Тренчовски, продукција: Народен театар „Антон Панов“ - Струмица;Раскажувачот, Терсит (Троил и Кресида, 1993), автор: Вилијам Шекспир, режисер: Златко Славенски, продукција: Македонски народен театар; Кирил (Буре барут, 1994), автор: Дејан Дуковски, режисер: Сашо Миленковски, продукција: Македонски народен театар; Спасе (МКС, 1995), автор: Војдан Чернодрински, адаптација и режија: Сашо Миленковски, продукција: Македонски народен театар; Мулино (Кројач за дами, 1996), автор: Жорж Фејдо, режисер: Димитрие Османли, продукција: Македонски народен театар;Марк (Шопинг анд факинг, 1998), автор: Марк Рејвенхил, режисер: Срѓан Јаниќијевиќ, продукција: Македонски народен театар;Рилов (Будење на пролетта 2000, 2000), автор: Франк Ведекинд, адаптација: Златко Славенски и Огнен Георгиевски, режисер: Златко Славенски, продукција: Македонски народен театар;Викон де Валмон (Опасни врски, 2002), автори: Шадорло де Лакло и Кристофер Хемптон, режисер: Љупчо Ѓоргиевски, продукција: Македонски народен театар;Христов (Црнила 005, 2005), автор: Коле Чашуле, режисер: Слободан Унковски, продукција: Македонски народен театар;(Ревизор, 2006), автор: Николај Василевич Гогољ, режисер: Владимир Милчин, продукција: Македонски народен театар;Жан Пол Мара, Маркиз де Сад (Мара /САД, 2008), автор: Питер Вајс, режисер: Васил Христов, продукција: Македонски народен театар;Џонатан Харкер (Дракула, 2008), автор: Дејан Дуковски, режисер: Срѓан Јаниќијевиќ, продукција: Македонски народен театар;Пандар (Троил и Кресида, 2010), автор: Вилијам Шекспир, режисер: Љубиша Ристиќ, продукција: Македонски народен театар,

Адолф (Изгубени германци, 2012), автор: Дејан Дуковски, режисер: Слободан Унковски, продукција: Македонски народен театар;Гијом (Подемот и падот на кабарето, 2013), автор: Артур Шницлер, режисер: Владимир Милчин, продукција: Македонски народен театар;Соломон (Вечната куќа, 2013), автор: Јордан Плевнеш, режисер: Дејан Пројковски, продукција: Македонски народен театар; Понтиј Пилат (Мајсторот и Маргарита, 2015), автор: Михаил Булгаков, режисер: Иван Поповски, продукција: Македонски народен театар;Месарот (Дух, 2018), автор: Дејан Дуковски, режисер: Срѓан Јаниќијевиќ, продукција: Македонски народен театар;Филип (Мој термин, 2019), по мотивите на Лорен Бафи и Висенте Виљануева, режисер: Синиша Евтимов, продукција: Македонски народен театар; Пиерпоинт (Бесачи, 2019), автор: Мартин Мекдона, режисер: Јавор Грдев, продукција: Македонски народен театар; Павле (Лагата, 2022), автор: Флоријан Зелер, режисер: Бесфорт Идризи, продукција: Македонски народен театар;(12, 2024), во адаптација и режија на Синиша Евтимов, работена по мотивите (12 Angry Men) од Реџиналд Роуз, продукција: Македонски народен театар;Спиро (Народен пратеник, 2024), автор: Бранислав Нушиќ, режисер: Егон Савин, продукција: Македонски народен театар;Доктор Макаров (Варвари, 2025), автор: Максим Горки, режисер: Владимир Милчин, продукција: РСМ НУ Македонски народен театар; (Сценски спектакл „Сонцето, колку е блиску сонцето“ Made in МNT, 2025), режисер: Дејан Пројковски, драматизацијата е на: Дејан Пројковски и Андреј Цветановски, продукција: Македонски народен театар;(Као какао, 2026), автор: Венко Андоновски, режисер: Дејан Пројковски, ко-продукција: Македонски народен театар и Баги продукција и многу други.

Симонов пред назначувањето на уметнички директор беше член во уметничкиот совет на МНТ.

Тагови: МНТ

Живот

Сушата во Швајцарија открива остатоци од римски бањи, патишта, куќи...

Археолозите ги прецртуваат римските карти на Швајцарија откако се појавија траги од одамна закопани урнатини за време на најжешкото лето во земјата досега.

Сушата може да открие скриени археолошки локалитети преку „траги во посевите“ – обрасци што се формираат кога вегетацијата над закопаните градби венее; ова е само една од последиците на овогодишните топлотни бранови, кои исто така ги открија потонатите бродови од Втората светска војна на речните дна.

Археолозите во швајцарскиот кантон Во, известени од еден љубител на историјата, користеа дрон за секојдневно воздушно снимање на полињата околу Авентикум – некогашниот главен град на римска Хелвеција, основан пред 2.000 години откако Јулиј Цезар ги поразил локалните племиња.

Денес, на тоа место се наоѓа малиот град Аванш. „Ова се најбогатите откритија таму во последните 50 години – барем во рамките на последните две генерации археолози“, изјави Џордан Анастасов, археолог од кантонот Во.

Снимките открија претходно непознати или слабо проучени траги од термални бањи, куќи, патишта и можен храм, од кои многу се наоѓаат во делови од градот што претходно никогаш не биле истражувани со ископувања.

Градот процветал под римска власт, но потоа постепено почнал да опаѓа како што се засилувале упадите на германските племиња од 3-тиот век па натаму. Петчлен тим од археолози ги внел новите откритија на мапите со виолетова боја, пополнувајќи ги празнините и корегирајќи ги погрешните ознаки.

„Сега поставуваме навистина интересни прашања што инаку не би ги поставиле“, изјави археологот Уго Аморосо. Некои од трагите забележани во периодот од јуни до август исчезнале по косењето и со падот на температурите; сепак, работ на еден нов базен во рамките на комплексот бањи останал видлив во полето со делумно исушена детелина, бидејќи невообичаено топлото време продолжило и во септември. Други закопани историски остатоци се појавиле и на други места во Швајцарија и Европа, иако многу од нив се потешки за толкување бидејќи се изолирани и немаат посветени истражувачи. Швајцарските археолози ќе ги претстават своите наоди пред колегите, а подоцна можеби ќе спроведат и насочени ископувања. „Нема да посакуваме суши“, рече Пјер Блан, директорот за ископувања на локалитетот. „Но, ќе го искористиме ова максимално и ќе продолжиме со потрагата“, додаде тој.

Култура

НУ Народен театар Битола со „Секстет“ на „Денови на комедијата“ во Куманово

Од 23 септември до 5 октомври во НУ ЦК „Трајко Прокопиев“ во Куманово се одржува 29. меѓународен фестивал „Денови на комедија“.

Во текот на фестивалските денови, публиката има можност да проследи театарски претстави исполнети со хумор, квалитетна актерска игра и препознатлива фестивалска атмосфера преку изведба на театрите од Македонија и земјите од регионот.

Претставата која секогаш го полни гледалиштето до последното место, комедијата од Марк Камолети, во режија на Марјан Георгиевски, на Битолскиот театар е дел од овој фестивал и ќе биде изведена на 2 октомври од 20 часот.

Недоразбирања, тајни, љубовни заплети и урнебесни пресврти секогаш ја тераат публиката да се смее од почеток до крај.

Зошто комедија? Затоа што премногу долго сме сериозни.

Живееме во време на прегласни информации и постојани кризи.

Научивме како да бидеме загрижени, заборавивме да се смееме.

Затоа сега е време за Камолети – светскиот крал на фарсата и мајсторот кој знае како хаосот да го претвори во лек.

„Секстет“ е комедија која остава без здив.

Оваа претстава е создадена за да биде вечер за чиста радост.

Темпо кое не дозволува здив и актери кои во овој хаос влегуваат со смртна сериозност.

Во претставата играат: Бернар -Николче Пројчевски, Жаклина-Катерина Аневска Дранговска, Роберт -Александар Димитровски, Сузан-Сандра Грибовска Илиевска, Сузет -Анастасија Чипуровска, Џорџ-Борче Ѓаковски.

Костимографијата е на Андреј Георгиевски, сценографијата на Влатко Чачоровски, музика -Александар Димовски.

Ова не е претстава што се раскажува – ова е претстава што мора да се доживее. Во фестивалската програма се десет театарски претстави од Македонија и од земјите од регионот, исполнети со хумор и квалитетна актерска игра. Ќе бидат доделени награди во повеќе категории, меѓу кои за најдобра претстава, режија и актерски остварувања. Фестивалот ќе биде затворен со претстава надвор од конкуренција, посветена на годинашниот лауреат Игор Џамбазов. Фестивалот е поддржан од Министерството за култура и туризам и од Општина Куманово.