Ако ви треба уште една причина денот да го започнете со топла шолја црн напиток, студија од истражувачи при Универзитетот Џон Хопкинс открила дека консумирањето најмалку една шолја кафе дневно може да го намали ризикот од акутно оштетување на бубрезите (АКИ).

Наодите, објавени во списанието „Kidney International Reports“, покажуваат дека оние кои секојдневно пиеле било каква количина кафе имале 15% помал ризик од АКИ, при што најголемо намалување е забележано кај групата што пиела две до три шолји дневно (22 - 23% помал ризик).

„Веќе знаеме дека редовното пиење кафе е поврзано со превенција од хронични и дегенеративни болести, вклучувајќи дијабет тип 2, кардиоваскуларни заболувања и заболувања на црниот дроб“, истакна авторот на студијата, нефрологот Чираг Парих, директор на Одделението за нефрологија и професор по медицина на Медицинскиот факултет при Универзитетот Џон Хопкинс, пишува Б92.

„Сега можеме да го додадеме и можното намалување на ризикот од АКИ на сè подолгата листа на здравствени придобивки од кофеинот“, додаде д-р Парих.

АКИ, како што ја опишува Националната фондација за бубрези, е „ненадеен настан на отказ или оштетување на бубрезите кој се случува во рок од неколку часа или неколку дена“. Ова предизвикува натрупување на отпадни производи во крвта и ја отежнува способноста на бубрезите да ја одржуваат правилната рамнотежа на течности во телото.

Симптомите на АКИ варираат во зависност од причината и може да вклучуваат:

-мала количина урина

-оток на нозете, глуждовите и околу очите

-замор

-отежнато дишење

-конфузија

-мачнина

-болка во градите

Во потешки случаи, може да дојде до бубрежен напад или кома.

Овој пореметувач најчесто се забележува кај хоспитализирани пациенти чии бубрези се погодени од медицински и хируршки стрес и компликации.

Користејќи податоци од студијата „Atherosclerosis Risk in Communities Study“, која е тековна и ги следи кардиоваскуларните болести во четири американски заедници, истражувачите следеле 14.207 возрасни лица со просечна возраст од 54 години во голема популациска студија.

Учесниците бележеле колку шолји кафе пиеле дневно во текот на 24 години. За време на студијата биле забележани 1.694 случаи на акутно оштетување на бубрезите.

Според д-р Чираг Парих, кафето станува сојузник на бубрезите благодарение на биолошки активните соединенија во комбинација со кофеинот – или дури само кофеинот – кој го подобрува протокот на крв и поефикасното користење на кислородот во бубрезите.

Истражувачкиот тим истакнал дека додатоците како млеко, шлаг, шеќер или засладувачи може да влијаат на здравствениот ефект од кафето и нагласиле потреба од понатамошни истражувања за прецизно разјаснување на активните механизми што го прават кафето ефективно за зачувување на здравјето на бубрезите, особено на клеточно ниво.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.