Една година Еврокомисија „Фон дер Лајен 2“: Амбиција за изградба на понезависна, поконкурентна и побезбедна Европа - Канал 5

Европа

Една година Еврокомисија „Фон дер Лајен 2“: Амбиција за изградба на понезависна, поконкурентна и побезбедна Европа

Актуелната Европска комисија на Урсула фон дер Лајен утре ја одбележува првата годишнина од нејзиниот избор под слоганот „Работејќи за независност на Европа“. 

Една година Еврокомисија „Фон дер Лајен 2“: Амбиција за изградба на понезависна, поконкурентна и побезбедна Европа

По повод годишнината, оваа втора Европска комисија на Фон дер Лајен порача дека во изминативе 12 месеци во услови на итност во носењето одлуки, работела да испорача за европските граѓани и бизниси.

- На 1 декември 2024 година, Комисијата „Фон дер Лајен 2“ ја презеде функцијата со јасна посветеност да ја направи Европа понезависна, поконкурентна и побезбедна, бидејќи светот станува поконфронтациски настроен. Во својата прва година, Комисијата работеше на претворање на Европа во континент каде што традиционалните и новите индустрии напредуваат, а воедно обезбедува добар квалитет на живот за нашите граѓани, посочува Европската комисија во освртот на резултатите од својата едногодишна работа.

Во прегледот се нагласува дека изминатава година Европска комисија работела на „заокружување на нашата Унија“ овозможувајќи Македонија, Албанија, Молдавија и Црна Гора да се приклучат на Единствената зона за плаќање во евра со што банкарските трансфери во евра за граѓаните и бизнисите се вршат побрзо и претворајќи го проширувањето во реална можност во наредните години со оглед на забрзаното темпо на пристапниот процес на некои земји кандидати за членство. Дополнително, Комисијата потсетува и дека на нејзин предлог Молдавија и Украина ќе се приклучат кон зоната без роаминг на ЕУ од 1 јануари 2026 година.

- Се фокусиравме и на помагање на индустриите да се снајдат во променливата глобална средина, на подобрување на условите и квалитетот на живот за граѓаните, на поттикнување на транзицијата кон чиста енергија и на искористување на можностите на дигиталната трансформација, оценува Европската комисија во освртот на резултатите од својата едногодишна работа.

Во прегледот се посочува и дека Комисијата работела на зголемување на социјалната отпорност и зајакнување на европските демократии, на диверзификација и проширување на партнерствата на глобално ниво, на преземање поголема одговорност за одбраната и безбедноста на Европа, како и на одржување на непоколебливата солидарност со Украина.

- Со транзицијата кон чиста енергија и брзиот пораст на вештачката интелигенција, сакаме Европа да ги искористи овие можности и да го зајакне своето глобално лидерство. Ги прошируваме нашите трговски партнерства, создавајќи нови можности за големите и малите европски компании, посочува Еврокомисијата.

Таа нагласува и дека ги поддржува Европејците да развијат подобри вештини, да ја зголемат социјалната отпорност и да ги зајакнат демократиите.

- Додека продолжува војната на Русија против Украина, оваа Комисија тесно соработува со земјите членки со цел Европа да преземе поголема одговорност за сопствената одбрана и да ја зголеми нашата внатрешна безбедност, а воедно да ја одржи нашата непоколеблива солидарност со Украина. Свртени кон иднината, предложивме и амбициозен, модерен и поедноставен долгорочен буџет на ЕУ за 2028-2034.

Меѓу своите остварување во изминативе 12 месеци ЕК ги наведува својот план за закрепнување „Следна генерација ЕУ“, Компасот за конкурентност, отворањето на 19 фабрики и 13 подружници за вештачка интелигенција низ цела Европа, иницијативата за истражувачи и иноватори „Избери Европа“, поставувањето нови климатски цели и презентирањето на седум пакети за поедноставување и нова визијата за земјоделство и храна и поддршка на земјоделците.

Комисијата меѓу постигнувањата ги посочува и инструментот „Безбедносна акција за Европа“ (САФЕ), регулативата за воена мобилност т.н. „Воен Шенген“, Стратегијата за подготвеност, Законот за критични лекови, патоказот за енергетска независност „РЕПауерЕУ“, безбедносната стратегија „ПротектЕУ“, имплементацијата на Пактот за миграција и азил, иницијативата за спротивставување со манипулациите со информации и дезинформациите „Европскиот штит на демократијата“, Патоказот за правата на жените, Стратегијата за еднаквост на ЛГБТИК+ заедницата и формирањето Советодавен одбор за млади.

Во прегледот се потсетува и на постигнатите трговски договори и партнерства, сеопфатната поддршка за Украина, петте нови пакети санкции кон Русија, поддршката за Палестинската автономна управа и формирањето на Донаторската група за Палестина, Пактот за Медитеранот и програмата за инвестиции ширум целиот свет „Глобална Порта“.

- Комисијата предложи амбициозен долгорочен буџет за периодот 2028-2034 година во вредност од речиси 2.000 милијарди евра, опремувајќи ја Европа за денешниот несигурен свет склон кон кризи. Во следниот период, Комисијата ќе продолжи да се држи до својата посветеност да ја направи Европа понезависна, поконкурентна и побезбедна, порачува Еврокомисијата по повод годишнината од нејзиниот избор.

Тагови: ЕК Урсула фон дер Лајен

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Милиони луѓе присуствуваа на погребната поворка на Али Хамнеи

Според извештајот на иранската официјална новинска агенција ИРНА, милиони Иранци учествуваа во погребната поворка за врховниот лидер Али Хамнеи во светиот град Ком на 7 јули, како дел од седумдневниот период на жалост.

Милиони луѓе присуствуваа на погребната поворка на Али Хамнеи

Погребната поворка започна од џамијата Џамкаран и продолжи по авенијата на Пророкот Мухамед, на растојание од околу седум километри, до светилиштето на Хазрат Фатима Масуме.

Од раните утрински часови, областа околу светилиштето и патиштата што водат до центарот на Ком беа исполнети со луѓе од целиот Иран, кои дојдоа да се збогуваат со Хамнеи и неговото семејство.

ИРНА објави дека, во атмосфера на жалост, собраните по патеката постојано скандираа религиозни и револуционерни слогани, додека свештениците држеа погребни говори.

Што се однесува до церемонијата во Ирак, премиерот Али ал-Заиди ќе присуствува на официјалното пречекување на останките на врховниот лидер Хамнеи на меѓународниот аеродром Наџаф.

Се очекува голем број високи ирачки и ирански функционери да присуствуваат на церемонијата на пречек, со што ќе се означи почетокот на комеморативните и погребните церемонии во Ирак на 8 јули.

Управата за светилиштето Имам Али во Наџаф објави дека сите подготовки за погребните церемонии во Ирак се завршени, со координација на надлежните органи, вклучувајќи ги безбедноста, логистиката, јавните услуги и услугите за управување со толпи.

Според планот, погребната поворка ќе тргне од Куфа за Наџаф наутро на 8 јули, а потоа ќе продолжи кон Кербала истиот ден.

Се очекува милиони луѓе да учествуваат на церемониите во двата свети града.

Во меѓувреме, Црвената полумесечина од иранската покраина Хузестан испрати 15 тимови со вкупно 55 членови во Наџаф и Кербала, Ирак, за да обезбедат медицинска помош, спасувачки операции и да одговорат на итни случаи за време на погребните церемонии.

Седумдневниот период на жалост за врховниот лидер Али Хамнеи започна на 3 јули во Техеран, со присуство на високи функционери од десетици земји.

По комеморациите и збогумските церемонии во Техеран, погребната поворка продолжува низ светите места во Иран и Ирак, пред да заврши во Машхад на 9 јули.

Извор: Б92

Тагови: Али Хамнеи

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Трамп: Разочаран сум од НАТО, ако самитот не беше во Турција, можеби немаше ни да присуствувам

Трамп по пристигнувањето во Анкара за самитот на НАТО упати остри критики кон Алијансата.

Трамп: Разочаран сум од НАТО, ако самитот не беше во Турција, можеби немаше ни да присуствувам

Американскиот претседател Доналд Трамп по пристигнувањето во Анкара за самитот на НАТО упати остри критики кон Алијансата, оценувајќи дека сојузниците не им дале доволна поддршка на Соединетите Американски Држави во нивните акции против Иран. За време на средбата со турскиот колега, Ердоган, Трамп рече дека е разочаран од односот на сојузниците, посочувајќи дека сад со години вложуваат огромни средства во безбедноста на земјите-членки на НАТО. Toj воедно повторои дека би сакал да ја преземе контролата врз Гренланд и предупреди дека „може“ да ги повлече сите американски трупи од Европа.

-Бев многу разочаран од НАТО. Но не бевме добро третирани, затоа што направивме нешто во Иран. Не ни треба ничија помош. Не ја ни сакав нивната (НАТО) помош, но пред да прашам рекоа дека нема да бидат таму. Ние инвестиравме трилиони долари во НАТО. Зошто? За да ги заштитиме европските земји.- изјави Трамп.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

ЕУ има нови правила за патниците во авиосообраќајот

Европскиот парламент денес ги одобри ревидираните правила на ЕУ за патниците во авионот, потврдувајќи го правото на бесплатен рачен багаж и финансиска компензација во случај на доцнење на летовите.

ЕУ има нови правила за патниците во авиосообраќајот

Авиокомпаниите предупредуваат дека ова ќе доведе до повисоки цени на билетите, додека здруженијата на патници го поздравуваат зачувувањето на правата на патниците, пишува „Euronews“.

Пратениците дадоа конечно зелено светло за договорот постигнат со земјите-членки по повеќе од една деценија преговори. Предлогот беше усвоен на пленарна седница со 646 гласови „за“, 12 „против“ и три „воздржани“.

Компензација за доцнења и откажувања

Авионските патници во Европската Унија ќе продолжат да имаат право на компензација помеѓу 250 и 600 евра ако нивниот лет доцни повеќе од три часа или е откажан. Новиот текст наведува дека за летови подолги од 3.500 километри, компензацијата ќе биде 300 евра, а ќе се зголеми на 600 евра ако доцнењето надмине четири часа или летот е откажан.

Патниците ќе имаат девет месеци да поднесат барање, а авиокомпаниите ќе мора да платат компензација во рок од 30 дена или да побараат вонредни околности за да избегнат плаќање.

Правила за рачен багаж

Новите правила, исто така, ја разјаснуваат политиката за надоместоците за рачен багаж. Патниците сè уште ќе имаат право на еден бесплатен личен предмет, како што е мал ранец или торба, со димензии до 40 x 30 x 15 см.

Нискобуџетните превозници како што се „Рајанер“ и „Изиџет“ моментално наплаќаат за помали торби на тркала, но според новата регулатива, сите авиокомпании ќе мора да ја прикажат цената на билетот што вклучува рачен багаж на почетокот на процесот на резервација, особено на посредничките и пребарувачките портали. Сепак, тие ќе можат да понудат поевтини билети на патниците кои доброволно ќе изберат да патуваат без рачен багаж.

Дополнителни права на патниците

На патниците повеќе нема да им биде дозволено да им се наплаќаат дополнителни такси за корекција на мали грешки во името на билетот. Тие, исто така, ќе имаат право да добиваат дигитални карти за влез во авионот при пријавувањето за нивниот лет, без никаков дополнителен услов или обврска да имаат сметка или специфична апликација за авиокомпанија.

Ревизијата на регулативата на ЕУ за заштита на патниците беше започната во 2013 година. Оттогаш, европратениците се залагаат за проширени права за багаж и заштита на патниците, но се соочија со отпор од некои земји-членки и од воздухопловната индустрија. Новите правила ќе стапат на сила во 2027 година.

Извор: Б92

Тагови: авиосообраќајот ЕУ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер