Македонија

Еден месец од трагедијата во Кочани - со истрагата досега опфатени над 60 физички и три правни

Денеска се навршува еден месец од трагедијата во дискотеката „Пулс“ во Кочани во која загинаа 61 лице, а околу 200 беа повредени. Ова е најголемата несреќа од независноста на државата.

Досегашната истрага покажа дека постоеле системски грешки и пропусти во изминатите години поради што досега со истрагата опфатени се вкупно над 60 физички и три правни лица меѓу кои сопственикот на дискотеката, сегашни и поранешни градоначалници на Кочани, поранешни министри за економија, поранешни директори на Државниот пазарен инспекторат, полициски службеници.... Истрагата се уште трае, а во неа се вклучени 13 обвинители. Досега се извршени голем број претреси, сослушани сведоци и собрани над илјада материјални докази.

Првично со истрагата беа опфатени 34 физички и три правни лица меѓу кои и поранешниот министер за економија Крешник Бектеши, актуелниот градоначалник на Кочани, Љупчо Папазов, кој поднесе оставка по несреќата, двајцата претходни градоначалници Ратко Димитриевски и Николчо Илијев, како и поранешниот директор на Пазарниот инспекторат.

Викендов, истрагата беше проширена со нови 19 лица меѓу кои тројца поранешни министри за економија, актуелниот и двајца поранешни директори на Дирекцијата за заштита и спасување, тројца овластени градежни инспектори во Општина Кочани, три службени лица во Министерство за економија, двајца државни секретари во Министерството за економија и четири пазарни инспектори во Државниот пазарен инспекторат (ДПИ). Со истрагата не е опфатен актуелниот министер за економија Бесар Дурмиши, бидејќи според Обвинителството, досега нема ниту еден доказ дека од него било побарано продолжување на лиценцата на дискотеката „Пулс“.

Вчера по наредба на јавен обвинител почна и приведувањето на уште седум полициски службеници кои во текот на денешниот ден се очекува да бидат изведени пред судија на претходна постапка. Државниот јавен обвинител Љупчо Коцевски не ја исклучува можноста да бидат приведени уште лица до завршување на истрагата.

Коцевски во интервју за телевизија „Телма“ рече дека објектот „Пулс“ не и бил познат само на полицијата, туку и на целиот град и дека 13 години не е извршен никаков инспекциски надзор.

- Објектот „Пулс“ не и бил познат само на полицијата, бил познат на целиот град. И бил познат и на локалната самоуправа, на сите надлежни институции кои што требало да функционираат што значи дека 13 години во Кочани не е извршен никаков инспекциски надзор на објектот, рече Коцевски.

Соопшти дека се прибавени и лиценците што ги поседувала дискотеката од 2012 до 2017 година и дека сите се издадени без целосната потребна документација. Во однос на приротехниката што е користена за време на концертот кога настана пожарот, Коцевски рече дека се испитува од каде е таа набавена, дали соодветно била користена....

Министерот за внатрешни работи Панче Тошковски ветува дека секој за кој постојат докази ќе биде изнесен пред лицето на правдата. Во изјава дадена во понеделникот, Тошковски рече дека истрагата не е завршена и дека никој нема да биде толериран.

- Истрагата се води од Јавното обвинителство, МВР ги поднесе кривичните пријави кои до моментите на преземање дејствија сметаше дека треба да бидат поднесени. Против секој еден за кој има докази е пооднесена пријава од страна на МВР, рече меѓу другото Тошковски.

Дел од осомничените, кои се опфатени со истрагата, се во притвор, дел во куќен притвор, а на некои од нив им се определени мерки на претпазливост.

Низа пропусти во Законот за угостителска дејност утврди и Државната комисија за спречување на корупцијата. Упис на физички лица во Регистарот за вршење угостителска дејност без претходна проверка од надлежен орган за исполнетоста на минимално-техничките услови, е само една од слабостите што ги нотира ДКСК. Регулаторен ризик, според Комисијата, се забележува и во однос на проверката на условите за вршење угостителска дејност, во постапката и условите за давање лиценца, во однос на казните, а не е јасно и кои дополнителни дејности покрај угостителската се опфатени со Законот.

Во несреќата животот го загубија 61 лице меѓу кои и членови на музичката група „ДНК“

Пожарот во дискотеката во Кочани настана ноќта на 15 кон 16 март за време на настапот на групата „ДНК“. Животот го загубија вкупно 61 лице од кои 59 уште истата вечер. Починатите беа на возраст од 16 до 48 години. Најголем број од нив на возраст од 24 и 26 години. Меѓу нив беа и пејачот на бендот „ДНК“ Андреј Ѓорѓиески, професорката на Факултетот за музичка уметност Сара Пројковска, тапанар Ѓорѓи Ѓорѓиев, како и Филип Стевановски, Александар Коларов и Александар Ефремов.

Двајца починаа дополнително како последица на тешките повреди. Еден од нив беше и управителот на дискотеката Александар Каракадовски, кој почина во Литванија каде се лекуваше. И тој беше еден од осомничените, но за него сега истрагата е прекината.

Повредени беа вкупно 193 лица од кои најголем дел, по првично укажаната медицинска помош во болниците во земјава, беа испратени на лекување во странство. Трошоците за лекување и сместување на семејствата на повредените беа целосно покриени од страната на државата.

Според последно објавените информации што министерот за здравство Арбен Таравари ги сподели во понеделникот на прес-конференција во болниците во земјава и странство остануваат да се лекуваат 57 пациенти од кои двајца се во критична состојба. Деветмина пациенти се лекуваат во земјава, а 48 надвор од државата.

По трагедијата во Кочани почина и возачот на Брза помош Иле Гоцевски кој цела вечер успеа да превезе до Скопје голем дел од повредените. Министерот за здравство најави дека тој постхумно ќе биде одликуван за неговата пожртвуваност.

Преку протести граѓаните бараат одговорност

По трагедијата во Кочани, во земјава беше прогласена седумдневна жалост. Откажани беа сите музички активности и настаните во установите од областа на културата, а отворени беа книги на жалост во Собранието, Министерството за надворешни работи и во македонските амбасади низ светот. Во знак на сочувство за настраданите во пожарот ден на жалост беше прогласена и во Србија, Бугарија, Босна и Херцеговина и Црна Гора.

Преку мирни протести беше оддадена почит кон загинатите и повредените во пожарот и побарана одговорност од институциите на системот.

Еден ден по пожарот, во Кочани се одржа протест на кој граѓаните побараа одговорност за трагедијата во дискотеката „Пулс“. Тогаш беше демолиран кафе барот „Класик“ чиј сопственик е истиот од дискотеката.

Протести се одржаа и во Скопје и во другите градови од државата.

Во Кочани, на 5 април под мотото „Марш за ангелите“ во 12 часот и 5 минути, како симбол на задоцнетата институционална реакција, протест одржаа и семејствата на починатите кои побараа правда за своите деца. Според нив, ако сите институции си ја вршеле својата работа, немало да дојде до оваа трагедија.

Трагедијата во Кочани ги натера институциите да преземат интензивни мерки за проверка на јавните објекти и угостителските објекти во државата односно дали тие ги исполнуваат минималните технички услови за работа и безбедносни стандарди.

Во Собранието беа донесени и измени на Законот за прекршоци против јавниот ред и мир со кој се забрани употреба на приотехнички средства во затворен простор, а се предвидуваат и прекршочни глоби за физички и правни лица кои постапуваат спротивно на забраната.

Тагови: Панче Тошковски Пожарот во Кочани

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Технологија

Можете ли да го користите телефонот додека се полни?

И дали треба да ја оставите батеријата целосно да се испразни пред повторно полнење?

Денес, толку сме приврзани за нашите паметни телефони што чувствуваме потреба да ги користиме дури и додека се полнат. Но, можеби се прашувате дали користењето на телефонот додека се полни може да влијае на животниот век на батеријата.

Краткиот одговор е не. Иако вашиот телефон може да се полни побавно ако не го оставите сам да го заврши процесот, користењето на телефонот додека се полни генерално не влијае на животниот век на батеријата. Ова во голема мера се должи на технологијата за полнење со бајпас и системите за дисипација на топлина.

Со полнењето со бајпас, кога ќе го вклучите телефонот во полнач и ќе продолжите да го користите, вашиот телефон ја пренасочува енергијата од полнењето на батеријата кон директно стартување на апликациите, ефикасно паузирајќи го полнењето. Ова обезбедува добро корисничко искуство, но исто така ја штити батеријата на вашиот телефон од топлина што може да ја оштети. Користењето на телефонот за тешки активности, како што е играње игри, може да предизвика уредот да се прегрее, па оваа функција помага да се спречи тоа.

Недостатокот е што кога ќе го исклучите телефонот по напорна активност како што е видео монтажа или играње игри, процентот на батеријата веројатно нема да се зголеми многу, ако воопшто се зголеми. Тоа е затоа што енергијата оди директно до уредот за да го напојува, а не до батеријата.

Еден од првите примери за премостено полнење беше на „Sony Xperia 1 II“ во 2020 година, наречен „Heat Suppression Power Control“. Денес, оваа функција е достапна на многу врвни паметни телефони од водечки брендови, вклучувајќи ги „Samsung“, „Google“, „Xiaomi“ и „ZTE“. Сепак, имајте на ум дека „Apple iPhone“ сè уште не ја поддржува оваа функција. Дури и без неа, вашиот телефон ќе се полни побавно ако го користите додека е на полначот. Ако забележите дека вашиот телефон се прегрева, престанете да го користите за да спречите оштетување на батеријата. Повеќето модерни телефони имаат напредно управување со батеријата и системи за дисипација на топлина кои помагаат во контролата на зголемувањето на температурата.

Значи, иако користењето на телефонот додека се полни не е лоша навика само по себе, добра идеја е да го избегнувате кога е можно. Ако треба да проверите порака, да се јавите некому, да фотографирате или да објавите нешто брзо – можете да го направите тоа без никакви проблеми. Кога треба да го користите за потешки задачи, внимавајте на прегревање, но не грижете се дека тоа ќе ја оштети батеријата на вашиот телефон. Телефонот едноставно нема да се полни со вообичаената брзина.

Заблудата дека не треба да го користите телефонот додека се полни е само еден од многуте митови за полнењето и продолжувањето на животниот век на батеријата. Друга заблуда е дека не треба да го оставате телефонот на полначот преку ноќ. Ова не е вистина. Иако ова значи дека мала количина „скриена“ електрична енергија се влече од штекерот, вашиот телефон нема да се „преполни“. Сите најнови телефони имаат вградени заштити што престануваат да се полни штом уредот достигне 100 проценти. Уште повеќе, многу паметни телефони ги учат вашите навики и го оптимизираат полнењето со забавување на полнењето на самиот крај за да ја зачуваат батеријата и во исто време да обезбедат телефонот да биде целосно наполнет до утрото.

Исто така, не треба да дозволите батеријата целосно да се испразни пред да се полни. Всушност, за да го продолжите животниот век на батеријата на вашиот телефон, подобро е да ја полните кога нивото на полнење е помеѓу 20 и 80 проценти, отколку да чекате целосно да се испразни.

Заклучок: Користењето на телефонот додека се полни не треба да ѝ наштети на батеријата, освен ако не предизвика прегревање. Сепак е добра идеја да ја ограничите употребата кога е можно - првенствено за да ја наполните батеријата што е можно побрзо, а не за да ја заштитите.

Извор: Б92

Фото: ВИ

Тагови: Батерија мобилен телефон

Шоу биз

На Џорџина и велат дека е дебела, одговорот на Роналдо е хит

Џорџина Родригез одговори на постојаните критики за нејзиниот физички изглед објавувајќи интимен разговор со Кристијано Роналдо.

Славниот пар испрати порака за важноста на љубовта кон себе и дека вредноста на една личност не треба да се мери според нејзиниот изглед или мислењата на другите.

Секое лето, откако ќе објави фотографии во бикини, социјалните мрежи се преплавени со коментари за тежината и облините на Џорџина Родригез. Овој пат, таа призна на Инстаграм дека јавниот притисок влијае и врз неа, но наместо директна конфронтација, реши да ги сподели своите мисли за естетскиот притисок и важноста на внатрешниот мир.

Поддршката на Роналдо

За време на одмор на брод, Родригез прочита негативни коментари за нејзините најнови фотографии и му призна на Кристијано: „Се грижам што сега ме нарекуваат дебела, бидејќи живеам според мојот имиџ“. Одговорот на Роналдо беше многу јасен: „Не живееш според својот имиџ. Живееш според тоа кој си. Совршена жена. Убава, со одлично тело, мајка, добра личност, успешна и некој што го живее животот со љубов. Што повеќе би можела да посакаш? Нормално е да ти завидуваат“.

View this post on Instagram

A post shared by Georgina Rodríguez (@georginagio)

Овие зборови длабоко ја трогнаа Родригез и ја потсетија што е навистина важно. Таа призна дека е горда на Кристијано за вредностите што ги отелотворува како татко и маж. Таа нагласи дека вредноста на една личност никогаш не може да зависи од нејзиниот физички изглед или од мислењата на странци.

Љубов кон сопственото тело

Џорџина нагласува дека не се плаши од промените во своето тело бидејќи тие значат дека таа продолжува да живее. За неа, вежбањето никогаш не било борба за губење тежина, туку извор на здравје, дисциплина и ментален мир. Таа изјави: „Ги сакам моите облини. Ја сакам слободата да живеам во телото што го избирам“.

Порака до идните генерации

Како мајка на шест деца, Џорџина нагласува дека нејзината најголема мотивација е примерот што им го дава на своите ќерки. Заедно со Кристијано, таа сака да ги научи дека вредноста на една личност не зависи од нејзиниот физички изглед, туку од вредностите што ги носи во себе. На крајот, таа рече: „За мене, вистинскиот успех никогаш не бил вклопување во стандард што никој не знае кој го измислил. Вистинскиот успех е да се живее во мир, да се биде опкружен со луѓе што ги сакам, да се ужива во семејството и пријателите и да се грижи за своето здравје.“

Фото: Инстаграм

Извор: Индекс.хр

Тагови: Кристијано Роналдо Џорџина Родригез

Свет

Падна снег во Нов Зеланд (ВИДЕО)

Антарктички студен бран погоди делови од Јужниот Остров на Нов Зеланд, носејќи снег на нивото на морето и ниски температури што ги затворија патиштата и го нарушија работењето на училиштата.

Снегот го покри Данидин, вториот по големина град на Јужниот Остров, поради што полицијата ги повика луѓето да избегнуваат секакви патувања освен неопходните, предупредувајќи на заледени патишта, објави Ројтерс.

„Полицијата утрово доби бројни пријави за сообраќајни несреќи низ Данидин, при што некои возила се лизнаа од патот. За среќа, немаше повредени“, соопшти полицијата на Нов Зеланд на социјалните медиуми.

Antarctic Polar Blast Brings Rare Sea-Level Snow to New Zealand | Asia One News

A powerful Antarctic polar blast has swept across parts of New Zealand's South Island, bringing rare snowfall to sea level and freezing temperatures that forced road closures and disrupted… pic.twitter.com/vGOvoHw6TF
— ASIA ONE NEWS (@AsiaOne_News) August 4, 2026

Скијачите и сноубордерите ги искористија снежните врнежи за да се тркаат по улицата Болдвин во Данидин, за која се вели дека е најстрмната станбена улица во светот, објавија локалните медиуми.

Посеверно, снег падна и на плажата Њу Брајтон во Крајстчерч, каде што беше видлив на песокот.

Времето предизвика откажување на сите автобуски услуги во градот, додека фериботските услуги помеѓу Северните и Јужните Острови се суспендирани поради силни ветрови и високи бранови.

Новозеландската метеоролошка служба соопшти дека се очекува студениот бран да трае уште два дена, со снег или лапавица што ќе паѓа речиси до нивото на морето низ источниот дел на Јужниот Остров.

Метеоролозите предупредија дека четврток наутро може да ги донесе најниските температури во годината во многу делови од Нов Зеланд.

Извор: Б92

Тагови: Нов Зеланд снег