Од 5 часот утрово два полициски хеликоптера го гасат пожарот во реонот на Блаце. До овој момент, како што информира МВР, исфрлени се повеќе од 30 тони вода, а хеликоптерите се уште интервенираат на локацијата.

-Од 5 часот денеска полициски службеници од Хеликоптерската единица за полициски намени при МВР, со два хеликоптера на единицата за полициски намени, бел 412 и агуста бел 212, се активни во гасењето на пожарот во реонот на Блаце. До овој момент исфрлени се повеќе од 30 тони вода и се уште активно оперираат, соопшти Министерството за внатрешни работи.

Активни се пожарите во Општина Прилеп: село Бешиште, каде е зафатена мешана шума, во Општина Македонски Брод во село Црешнево каде гори деградирана дабова шума и грмушки. Во Општина Чашка под Солунска глава, помеѓу изворите на Бабуна и Бабина дупка – само чад во карпест дел (шумски пожар).

Во Општина Чучер Сандево: помеѓу село Блаце и село Чучер зафатена е мешана шума и ниска вегетација. За негово гаснење од утрово во пет часот ангажирани се два полициски хеликоптера, еден армиски хеликоптер, како и три возила на Дирекцијата за заштита и спасување - еден хермелин со цистерна, еден пинцгауер на и едно теренско возило „амарок", дејствуваат како поддршка на скопската БППЗ (Бригада за противпожарна заштита Скопје) која со повеќе пожарникари и возила го гаси големиот пожар на отворен простор на територијата на општина Чучер Сандево над магистралниот пат Скопје - Блаце, кој изби вчера во попладневните часови.

Како што изјави директорот на ДЗС Стојанче Ангелов, најверојатна причина за пожарот во оштина Чучер Сандево е фрлен отпушок од цигара од возило во движење или намерно потпалување.

-Од мое непосредно забележување можам да кажам дека овој пожар изби непосредно до магистралниот пат кон Блаце и можна причина е фрлен отпушок од цигара од возило во движење или намерно потпалување. Затоа, апелираме до граѓаните да се однесуваат совесно и никогаш да не фрлаат отпушоци од цигари надвор од возило, дури и тогаш кога се убедени дека се изгаснати, апелира Ангелов.

Доколку забележат пожар, посочи тој, граѓаните веднаш да се јават на бројот 112.

МВР утрово соопшти дека патниот сообраќај до граничниот премин Блаце ноќеска е нормализиран и укината е и забраната за товарните моторни возила и за автобусите. Сообраќајот на оваа делница синоќа поради пожарот над магистралниот пат А4 Скопје – Блаце кај тунелот, кој се прошири, беше пренасочен за патнички возила, а беше воведена забрана за товарни моторни возила.

Инаку, локализиране е пожарот во општина Делчево каде гореше Градска депонија.

Изгаснати се пожарите во Општина Сара во село Љубин каде гореше ниска вегетација и борова шума, во Општина Ѓорче Петров во населба Даме Груев, покрај река Лепенец каде беше зафатена ниска вегетација, потоа во Општина Карпош кај болницата во Бардовци каде гореа грмушки и ниска вегетација. Во Општина Прилеп пожарот кај Фабриката Партизанка со кој беше зафатена ниска вегетација и дрвен праг од железничка пруга, стрниште гореше во Општина Чешиново-Облешево во село Чешиново, како и ѓубре и ниска вегетација на ул.„Октомвриска револуција“ кај My market и гуми и ѓубре кај автопатот близу бензинска пумпа Макпетрол во општина Куманово.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.